ەكسپورتتاۋشىعا قارجىلاي ءارى زاڭدىق تۇرعىدان كومەكتەسەتىن – KazakhExport ساقتاندىرۋ كومپانياسى جۇمىس ىستەيدى ءبىزدىڭ ەلدە.
KazakhExport-تىڭ كومەگىنە جۇگىنگەن 60-قا تارتا وتاندىق كومپانيا شەتەلدىك نارىققا شىعۋعا مۇمكىندىك الدى وسى كۇنگە دەيىن.
– «قازاقستاندا جاسالعان» تاۋارلار ءبىرتالاي مەملەكەتتىڭ دۇكەن سورەلەرىندە تۇر وسىنىڭ ناتيجەسىندە. «بۇل ەل شيكىزاتقا تاۋەلدى، قىل اياعى ينە ساباقتايتىن ءجىپ وندىرۋگە دە جاراماي وتىر» دەگەن تۇسىنىكتى بۇزدىق، باستىسى.
«قازاقستاندا جاسالعان» ونىمدەر سىرتقى نارىقتا ءوز تۇتىنۋشىسىن تاپتى. ءبىراق، بۇل از. تىم از. ءونىمىن ەكسپورتتاعىسى كەلەتىن كاسىپكەردىڭ قاتارى تولىعا تۇسكەنىن قالايمىز. ۇلتتىق ەكونوميكانى تىعىرىقتان شىعارۋدىڭ ءبىر تەتىگى وسى
– دەيدى كومپانيا ماماندارى.
ايتپاقشى، ەسكە سالا كەتەلىك ەل قويناۋىنداعى قازبا بايلىقتى شەتەلگە تاسىپ تابىس تاباتىن كاسىپورىندار KazakhExport-تىڭ ارىپتەسى اتانا المايدى.
KazakhExport-پەن قويىن-قولتىقتاسىپ جۇمىس ىستەيتىن كاسىپورىننىڭ ءبىرى – كەنتاۋ ترانسفورماتور زاۋىتى.
«قالا مەن دالا» گازەتىنىڭ تۇركىستان ءوڭىرىن ارالاعان اپتالىق ساپارى بارىسىندا ارنايى ات باسىن بۇرىپ، كاسىپورىننىڭ تىنىس-تىرشىلىگىمەن تانىسقانبىز. قازاقستانداعى ەڭ ىقپالدى 50 كاسىپكەردىڭ ءبىرى سايدوللا قوجابايەۆ ىرگەسىن قالاعان Alageum Electric حولدينگىسىنىڭ قۇرامىنا كىرەدى بۇل زاۋىت.
ترانسفورماتوردىڭ 400-گە تارتا ءتۇرىن وندىرەدى ەكەن. ايىنا 1000 دانا ترانسفورماتور ازىرلەپ شىعارادى. تاۋارى سىرتقا نارىقتا ءتاپ-تاۋىر سۇرانىسقا يە. «كەنتاۋ ترانسفورماتور زاۋىتىنىڭ» تاڭباسى بار قۇرىلعىلار تمد-عا تۇگەل تارالادى.
ەكونوميكانىڭ بارلىق تارماعى – ەلەكتر ەنەرگەتيكاسىنان باستاپ، مەتاللۋرگيا، كولىك قۇراستىرۋ، ترانسپورت، مۇناي-گاز كەشەنى، ءتۇرعىن-ۇي كوممۋنالدىق سالاسىنا دەيىن ترانسفورماتور قۇرىلعىلارىمەن قامتاماسىز ەتەدى. ەكسپورتتىڭ شەكاراسى كەڭىگەنى كەنتاۋ قالاسىنىڭ كوركەيۋىنە دە وق ىقپال ەتۋدە.
“قالانىڭ كوسەگەسىن كوگەرتىپ وتىرعان وسى زاۋىت”، – دەيدى جەرگىلىكتى جۇرت. مىڭنان استام ادامدى جۇمىسپەن قامتىعانى ءوز الدىنا، قالا بيۋدجەتىنىڭ 70 پايىزى زاۋىت تولەگەن سالىقتان قۇرالادى.
«بىلتىرعى جىلدىڭ 8 ايىندا عانا ترانسفورماتور زاۋىتى 12 ملرد. تەڭگەنىڭ ءونىمىن ءوندىردى. بۇل 2016 جىلدىڭ ءدال وسى ارالىقتاعى كورسەتكىشىنەن 50 پايىزعا ارتىق»، – دەدى بىزگە كتز تەحنيكالىق ديرەكتورى نۇربول تىلەمىسوۆ.
ءوندىرىس ورنىن باسىنا اياعىنا دەيىن ءبىر ءسۇزىپ شىقتىق. جۇمىسشىلارمەن تىلدەستىك. ترانسفورماتور جاساۋدىڭ ءادىل تاسىلدەرىمەن تانىستىق.
بىردەن كوزگە تۇسەتىنى، ءتارتىپ بار. تاپ-تۇيناق تازالىق بار. جۇزدەگەن ادام جۇمىس ىستەيتىن جەردە ايعاي دا جوق، شۋ دا جوق. ءار زات ءوز ورنىندا تۇر. اركىم ءوز جۇمىسىن بىلەدى. العان زات تۇرعان ورنىنا قايتادى. بوس تۇرعان قۇرىلعى جوق. قۇنى 1 ميلليون ەۋرودان اسىپ جىعىلاتىن تەحنولوگيالاردىڭ ءتىلىن تەز مەڭگەرىپتى زاۋىت ۇجىمى.
سويتسەك مۇنداعى جۇمىس ەرەجەسى جاپوننىڭ كايدزەن باسقارۋ ۇلگىسىنە باعىنىپتى. ستراتەگيا قاعيداسى ءوزىن-وزى ۇزدىكسىز جەتىلدىرۋگە، دامىتۋعا سايادى ەكەن. كايدزەنگە باعىنعان كاسىپورىن ءبىرىنشى كەزەكتە تۇتىنۋشىنىڭ ويلايدى، ونىڭ تالعامىنان شىعۋدى ماقسات تۇتادى. بۇعان باسشىلىق قانا ەمەس، جۇمىسشىلار دا ۇلەس قوسۋى ءتيىس.
كايدزەننىڭ جولىمەن جۇرەتىن كاسىپورىننىڭ ەڭ باستى كاپيتالى – ادام.
كاسىپورىن جۇمىسىنان شيكىلىك شىقسا، ءبىرىنشى كەزەكتە كىنالىنىڭ سوڭىنا ءتۇسۋ كايزدەننىڭ تۇسىنىگىنە جات، كەرىسىنشە كەمشىلىكتى بىرلەسىپ شەشۋ باستى ورىندا تۇرادى. جاپوننىڭ ءبىرتالاي كاسىپورنى وسى ستراتەگيانىڭ ايتقانىمەن ءجۇرىپ، جەتىستىككە جەتكەن دەيدى.
ترانسفورماتوردىڭ كوكەسىن دە وسى ارادان كوردىك. ءبىر عانا بىلتىرعى جىلى زاۋىت – ەلەكترلى موتور، گەنەراتور، ترانسفورماتورلاردى قوسا العاندا 10 988 دانا ءونىم ءوندىرىپتى.
بيلىكتىڭ بيزنەس وكىلدەرىنە قاراتا «شەتەلدىك نارىققا شىعىڭدارشى» دەگەن ءوتىنىشىن جەرگە قالدىرماي، ءىس جۇزىندە ورىنداعان – وسى كەنتاۋ زاۋىتى. ءونىمدى ەكسپورتتاۋدى ترانسفورماتور زاۋىتى دوسايەۆتىڭ سوزىنەن كوپ بۇرىن باستاپ كەتكەن. وندىرگەن ءونىمىنىڭ 40 پايىزىن رەسەيگە، قىرعىزستانعا، وزبەكستان مەن تاجىكستانعا ەكسپورتتاۋدا قازىرگى تاڭدا.
مۇنىمەن شەكتەلمەك ەمەس. بيىلعى جىلى كاسىپورىن اۋعانستان نارىعىنا كىردى. جىل اياعىنا دەيىن كەنتاۋ زاۋىتى اۋعان نارىعىنا جالپى قۇنى 10 ملن. دوللاردىڭ ترانسفورماتورلارىن تاسىمالداپ تاستاماق.
«وسىعان وراي اۋعانستانعا ارنالعان ترانسفورماتورلاردىڭ جاڭا ءتۇرىن ازىرلەدىك. بۇل ەلدىڭ ەلەكتر ەنەرگياسىنىڭ زاماناۋي جۇيەسىنە كوشكەنى كەشە عانا. سول سەبەپتى ولارعا ترانسفورماتورلاردىڭ جاڭا تۇرلەرىن جەتكىزەتىن بولامىز، – دەيدى زاۋىتتىڭ ساتۋ ءبولىمىنىڭ ديرەكتورى مۇحتار كەنجەبەكوۆ.
كاسىپورىننىڭ اۋعان نارىعىنا شىعۋىنا KazakhExport-تىڭ شاراپاتى تيگەن.
زاۋىت ءتوراعاسى حايرۋللا قوجابايەۆتىڭ ايتۋىنشا، اۋعانستانعا ترانسفورماتور تاسىمالداۋ يدەياسى العاش 2014 جىلى كوتەرىلگەن.
– KazakhExport اۋعان تاراپى پەن Alageum Electric اراسىنداعى كەلىسىمشارتتى ساقتاندىردى. وسىنىڭ ناتيجەسىندە ءوز تاۋارىمىزدى ساتىپ الۋشىعا ەمىن-ەركىن جەتكىزۋگە مۇمكىندىك الدىق. 2014-2016 جىلداردىڭ ارالىعىندا KazakhExport ساقتاندىرعان ترانسفورماتور زاۋىتىنىڭ كەلىسشارت سوماسى 945 ملن. تەڭگەنى قۇرادى، – دەيدى ول.
ىلگەرىدە ايتتىق، مۇندا قۇنى ميلليون ەۋرودان اسىپ جىعىلاتىن تەحنولوگيانرىڭ ءتۇرى-تۇرى بار دەپ. بۇلاردىڭ ءتىلىن ءتۇسىنۋ ءۇشىن سىرتتاي وقىپ بىلگەننىڭ ازدىق ەتەتىنى كورىنىپ جاتىر. ونىڭ ۇستىنە جۇمىسشىلاردىڭ دەنى جاستار.
– ءدال سولاي. وقۋ ءبىلىمدى تاجىريبەمەن ۇشتاعان ماڭىزدى. وسى ماقساتتا زاۋىتتىڭ ىرگەسىنەن ءوز كوللەدجىمىزدى اشقانبىز. مۇندا 500-گە تارتا ستۋدەنت ءدۋالدى وقىتۋ جۇيەسى بويىنشا ءبىلىم الادى. وقۋ مەن تاجىريبەنى قاتار الىپ جۇرگەسىن قۇرىلعىلاردى قولدانۋعا كەلگەندە قينالمايدى. وسىنىڭ ناتيجەسىندە ەڭبەك ونىمدىلىگىن ارتتىردىق. سوڭعى 20 جىلدا زاۋىتتاعى ءوندىرىس كولەمى 20 ەسەگە ءوسىپتى، – دەدى ن.تىلەمىسوۆ.
زاۋىتتاعى تىرشىلىك كۇندىز-تۇنى دامىلدامايدى. كاسىپورىنداعى مىڭنان اسا ادام ءۇش اۋىسىممەن جۇمىس ىستەيدى مۇندا. ايتپاقشى، نازاربايەۆ بيىلعى جولداۋدا مەملەكەتتىڭ ەكسپورتتاۋشىلارعا بۇرىنعىدان دا كوبىرەك كوڭىل بولەتىنىن ايتتى.
Alageum Electriس حولدينگىنە قاراستى كاسىپورىندار مۇنى جاقسىلىق بەلگىسى دەيدى.
– مەملەكەتتىڭ ەكسپورتتى قولداۋعا باعىتتالعان باستامالارى ءبىر ىزگە ءتۇستى. ەكسپورتتى قولداۋعا بولىنگەن قارجى كولەمى 500 ملرد. تەڭگەگە جەتتى.
مەملەكەت باسشىسى ەكسپورتتى ايتا كەلە مۇنداعى جول شىعىنى ماسەلەسىنە توقتالىپ ءوتتى. بۇل تالاي كاسىپكەردى تولعاندىرىپ جۇرگەن ساۋال-تۇعىن، – دەيدى نۇربول تىلەمىسوۆ.
دايىنداعان، دۋمان بىقاي
