بۇگىن، 24 اقپان كۇنى ماڭعىستاۋ وبلىسىنىڭ اكىمى نۇرداۋلەت قيلىبايدىڭ توراعالىعىمەن وتكەن جيىندا كاسپيي يتبالىعىنىڭ پوپۋلياسياسىن ساقتاۋ ماسەلەسى قارالدى. باسقوسۋعا ەكولوگيا بەلسەندىلەرى، تاۋەلسىز ساراپشىلار مەن تابيعات جاناشىرلارى قاتىستى،- دەپ حابارلايدى Dalanews.kz
جيىندا اقتاۋ قالاسىنداعى نازاربايەۆ زياتكەرلىك مەكتەبىنىڭ ءمۇعالىمى، «ەكوليدەر» ۆولونتەرلىك كلۋبىنىڭ جەتەكشىسى باقىتگۇل جاقسىلىقوۆا كاسپيي يتبالىعى مەن ونى قورعاۋدىڭ ماڭىزدىلىعى تۋرالى باياندادى. ساراپشىنىڭ پىكىرىنشە، يتبالىقتاردىڭ قىرىلۋى تەڭىزدىڭ لاستانۋى، براكونەرلىك جانە وندىرىستىك جۇمىستاردىڭ سالدارىنان بولىپ وتىر.
"تەڭىزدىڭ لاستانۋى يتبالىقتىڭ فيزيكالىق جاعدايىنا اسەر ەتىپ، ونى كاسپييدىڭ ەكولوگيالىق جاعدايىنىڭ ءتىرى ينديكاتورىنا اينالدىرۋدا. كاسپيي يتبالىعى كاسپيي تەڭىزىنىڭ ەندەميگى بولعاندىقتان، ياعني ول الەم بويىنشا باسقا ەش جەردە كەزدەسپەيتىندىكتەن، ونى ساقتاۋ ماڭىزدىلىعى اسا وزەكتى"، - دەدى باقىتگۇل جاقسىلىقوۆا.
جيىن بارىسىندا تابيعات جاناشىرلارى يتبالىقتاردى ساقتاۋ بويىنشا ءبىرقاتار ۇسىنىستار ايتتى.
اتاپ ايتقاندا، ءتىرى يتبالىقتاردى جۇيەلى زەرتتەۋ، وسى سالاداعى تاپشى ماماندىقتارعا گرانت ءبولۋ، تەڭىز مونيتورينگىنە جەرگىلىكتى ساراپشىلاردى تارتۋ، براكونەرلىكپەن كۇرەس شارالارىن كۇشەيتۋ، ەكولوگيالىق زاڭنامانى جەتىلدىرۋ جانە كاسپيي ماڭى ەلدەرىمەن بىرلەسكەن زەرتتەۋلەر جۇرگىزۋ قاجەت ەكەنى ايتىلدى.
وبلىس اكىمى نۇرداۋلەت قيلىباي اتالعان ۇسىنىستاردى سارالاپ، جاۋاپتى ازاماتتارعا ناقتى شارالار قابىلداۋ قاجەتتىگىن تاپسىردى.
"كاسپيي يتبالىعى – تەك تەڭىز ەكوجۇيەسىنىڭ عانا ەمەس، جالپى ءوڭىردىڭ ەكولوگيالىق احۋالىنىڭ ايناسى. يتبالىقتاردى قورعاۋ جۇمىستارى جۇيەلى بولۋى ءۇشىن جانە ولەكسەلەر تابىلعان جاعدايدا ولاردى جويۋ ءۇشىن ناقتى الگوريتم ازىرلەۋ قاجەت. سونداي-اق، پروسەستەردى ءتيىمدى باقىلاۋ ءۇشىن سيفرلاندىرۋ شارالارىن ەنگىزۋ ماڭىزدى. وسى سالاعا قاجەتتى مامانداردى دايارلاۋ ءۇشىن جەرگىلىكتى وقۋ ورىندارى مەن تەڭىز سالاسىنا ماماندانعان جوو اراسىندا كەلىسىم جۇرگىزىپ، گرانت ءبولۋ ماسەلەسىن قاراستىرىڭىزدار. ال وعان دەيىن شۇعىل تۇردە دايىن مامانداردى وبلىسقا تارتۋعا جۇمىستانۋ كەرەك. يتبالىقتاردى ساقتاۋعا باعىتتالعان ناقتى ءىس-شارالار كۇن تارتىبىنەن تۇسپەۋى ءتيىس"، – دەدى نۇرداۋلەت قيلىباي.
