ماڭعىستاۋ وبلىسىنىڭ كاسپيي تەڭىزى جاعالاۋىنان 112 ءولى يتبالىقتىڭ دەنەسى تابىلدى. بۇل تۋرالى وبلىستىق ەكولوگيا دەپارتامەنتى مالىمدەدى، دەپ حابارلايدى Dalanews.kz.
يتبالىقتاردىڭ ءولى دەنەلەرى اسان اۋىلىمەن باۋتينو ءمۇيىسىنىڭ ارالىعىنان تابىلعان. ەكولوگتار تەڭىز سۋىنان سىناما الىپ، زەرتحانالىق تالداۋعا جىبەردى.
ايتا كەتەيىك، بۇعان دەيىن كاسپيي تەڭىزى جاعالاۋىندا بالىقتار جاپپاي قىرىلعان ەدى.
فورت-شيەۆچەنكو قالاسىنىڭ ءتۇپقاراعان اۋدانى اۋماعىندا تەڭىز جاعالاۋىنان تابىلعان ءولى بالىقتاردىڭ ۆيدەوسى الەۋمەتتىك جەلىلەرگە جاريالاندى.
7 شىلدە كۇنى وقيعا ورنىنا وبلىستىق ەكولوگيا دەپارتامەنتىنىڭ زەرتحانالىق-تالدامالىق باقىلاۋ ءبولىمىنىڭ ماماندارى باردى. ولار بالىق شارۋاشىلىعى باسقارماسىنىڭ قىزمەتكەرلەرىمەن بىرگە تەڭىز سۋىنان سىنامالار الدى.
ەكولوگتار زەرتتەۋ ناتيجەلەرىن قوسىمشا حابارلايتىنىن ايتتى.
ەسكە سالا كەتەيىك، 1 مامىر كۇنى كاسپيي جاعالاۋىنان 88 يتبالىقتىڭ ولىگى تابىلعان بولاتىن. ال 9 مامىردا ءتۇپقاراعان اۋدانىنىڭ تۇرعىندارى تاعى ونداعان ءولى يتبالىق پەن قۇستى بايقاپ، دابىل قاققان.
مامىر ايىنىڭ سوڭىندا فورت-شيەۆچەنكو قالاسى ماڭىنداعى جاعالاۋدا ەكى كۇننىڭ ىشىندە 117 ءولى يتبالىق تابىلدى. بالىق شارۋاشىلىعى كوميتەتىنىڭ مالىمەتىنشە، بۇل جانۋارلار 2024 جىلدىڭ قاراشا-جەلتوقسان ايلارىندا ولگەن.
