بۇگىنگى كۇنى ءموبيلدى اۋدارىمداردى تاۋارلار، جۇمىستار مەن قىزمەتتەر ءۇشىن تولەم قابىلداۋ كەزىندە كاسىپكەرلەر كەڭىنەن قولدانادى. بيزنەس وكىلدەرىنىڭ كەيبىرى بۇل قىزمەت ارقىلى ناقتى اينالىمدارىن جاسىرادى. ميكرو-شاعىن بيزنەستى ءۇش جىل بويى تابىس سالىعىنان بوساتقانىنا قاراماستان مۇنداي زاڭسىز ارەكەتتەر ءجيى كەزدەسەدى.
مەملەكەتتىك كىرىستەر كوميتەتى ترانسفەرتتەر مەن تولەمدەردى ءبولۋ جانە فيسكالداۋ بويىنشا ءبىرقاتار شەشىمدەر ازىرلەپ جاتىر. بۇل كاسىپكەرلەردىڭ جەكە اۋدارىمدارى مەن كاسىپكەرلىك ترانسفەرتتەرىن اجىراتۋعا مۇمكىندىك بەرەدى. بۇل جاڭاشىلدىق تەە بيزنەس وكىلدەرىنە عانا قاتىستى. جەكە تۇلعالاردىڭ جەكە اۋدارىمدارىنا اسەر ەتپەيدى، سالىق سالىنبايدى، دەپ حابارلادى مكك باسپا ءسوز قىزمەتى.
كاسىپكەرلىك قىزمەتتەگى اۋدارىمدار مەن تولەمدەردى قابىلداۋ ءۇشىن كوميتەت بيزنەسكە بولەك شوتتار پايدالانۋدى ۇسىنادى.
سونداي-اق، ءبىز كاسىپكەرلىك قىزمەتكە ارنالماعان شوتتاردى پايدالانىپ تابىس الۋ بەلگىلەرىن انىقتايتىن، تاۋەكەلدەردى باسقارۋ جۇيەسىن ىسكە قوسۋدى ۇسىنامىز، - دەپ اتاپ ءوتتى مەملەكەتتىك كىرىستەر كوميتەتى.
مىسالى، ءبىر ادامنىڭ كۇن سايىن بىرنەشە ادامنان اۋدارىمداردى ۇزاق ۋاقىت بويى الۋى كاسىپكەرلىك قىزمەتتىڭ بەلگىلەرى رەتىندە تانىلۋى مۇمكىن.
جالپى، تاۋارلار، جۇمىستار مەن قىزمەتتەر ءۇشىن جاسالعان تولەم بەلگىلەرىن انىقتاۋ بويىنشا جۇمىس باستالدى جانە ەكىنشى دەڭگەيلى بانكتەرمەن، "اتامەكەن" ۇكپ-مەن جانە بيزنەس قاۋىمداستىقپەن بىرلەسىپ تالقىلانادى.
