بۇرىن قوراسىنداعى جالعىز سيىرىن ساتسا دا بالاسىن وقىتۋدى ارماندايتىن قازاق ۇرپاعىن سوت، زاڭگەر بولسا، ءتىپتى بولماعاندا قاراپايىم كەڭسە مامانى بولىپ پاپكە ۇستاپ جۇرسە دەيتىن. كاسىپتىك-تەحنيكالىق ماماندىقتى «قارا جۇمىسقا» بالايتىن.

بۇگىندە ەكونوميست پەن زاڭگەر ماماندىعىن العان كوپ جاس جۇمىس تاپپاي جۇرگەنى، ال كاسىپتىك-تەحنيكالىق ماماندىقتىڭ ءباسى كۇن وتكەن سايىن جوعارىلاپ، بەدەلى ارتىپ كەلە جاتقانى شىندىق.

مەملەكەت باسشىسىنىڭ ءوزى ۇنەمى جاستاردى كاسىپتىك-تەحنيكالىق ءبىلىم الىپ، قاراپايىم جۇمىسشى ماماندىعىن يگەرۋگە شاقىرىپ، بۇل سالانىڭ مەملەكەت ءۇشىن ماڭىزدىلىعىن ءجيى ايتادى. «مەن جاستارىمىزدى جۇمىسشى ماماندىعىن بەلسەندى مەڭگەرۋگە شاقىرامىن. كەزىندە مەن دە جۇمىسشى كيىمىن كيۋدەن باستادىم، دومنا پەشى وت-جالىنىنىڭ جانىندا تۇردىم. ۇلگى الىڭدار! جىلدار وتەدى، ءبىراق، وسى ومىرلىك تاجىريبەلەرىڭ، سەندەر قانداي ءومىر جولىن تاڭداپ الساڭدار دا مىندەتتى تۇردە كادەلەرىڭە جارايدى. ءبىزدىڭ اينالامىزداعى نارسەنىڭ ءبارى جۇمىسشىلاردىڭ قولىمەن جاسالعان. وسىنى ەشقاشان ەستەن شىعارماڭدار. مىسالى، تاماق جەيتىن قولدارىڭداعى قاسىق پەن شانىشقىنى جۇمىسشىلار جاساعان. ول ءۇشىن مەتالدى بالقىتتى. سەندەر تۇراتىن ءۇيدى، كولىكپەن جۇرەتىن جولدى سالعان جۇمىسشىلار. داستارقانداعى جەيتىن ناندى پىسىرۋگە اۋىلداعى جۇمىسشىلار دايىندايدى. سەندەردى تاماقتاندىراتىن اسحاناداعى اسپاز دا جۇمىسشى ماماندىعىنا جاتادى. اينالامىزداعىنىڭ ءبارى جۇمىسشىلاردىڭ التىن قولىمەن جاسالعان. سوندىقتان مەن ەڭبەك ادامىنا ارنايى وردەن تاعايىندادىم. ويتكەنى ءبىز ەڭبەك ادامىنىڭ داڭقىن ارتتىرۋىمىز كەرەك»، – دەگەن بولاتىن ەلباسى.

قازاقستانعا گەولوگ ماماندارى، تاۋ-كەن ينجەنەرى، اۆتوماتتاندىرۋ جانە باسقارۋ سالاسىنىڭ ماماندارى، قاۋىپسىزدىك تەحنيكاسى ينجەنەرلەرى، ەلەكترسلەسارلار، مۇنايشى-وپەراتورلار جەتىسپەيدى. ال، مۇنداي ورتا بۋىن مامان دايىنداۋدا كاسىپتىك-تەحنيكالىق باعدار بەرەتىن كوللەدجدەرگە ارتىلار مىندەت ۇلكەن. دەگەنمەن، كاسىپتىك ءبىلىم بەرۋدى كوزدەيتىن ستاندارتتارعا سوڭعى كەزدە عانا مۇقيات زەر سالىپ، كوڭىل بولە باستاعانىمىزبەن ناتيجەسىز ەمەسپىز.

اتىراۋداعى الەمدىك دەڭگەيدەگى العاشقى كاسىپتىك ءبىلىم ورداسى بۇگىنگى تاڭدا كاسىپتىك-تەحنيكالىق ءبىلىم بەرۋ باعىتىندا جۇيەلى جۇمىستار جاساپ جاتىر. "كاسىپقور" حولدينگىنىڭ قاراماعىنداعى «APEC Petrotechnic» جوعارى تەحنيكالىق مەكتەبى پرەزيدەنت تاپسىرمالارىنىڭ ناقتى جۇزەگە اسقانىنا دالەل. ءقازىر مۇندا وقۋ تەگىن جانە ستۋدەنتتەردىڭ ءبىلىم نارىمەن سۋسىنداۋىنا بارلىق جاعداي جاسالعان. الىستان كەلگەندەر ءۇشىن جايلى جاتاقحانا، اسحانا، سپورت كەشەندەرى، ەلەكتروندى كىتاپ قورى، سوڭعى ۇلگىدەگى عىلىمي زەرتحانا، ءدال وندىرىستەگىدەي مۇناي-گاز ءوندىرۋ تەحنيكالارى ورناتىلعان شەبەرحانالار سەكىلدى بارلىق جابدىقپەن قامتىلعان. اتاپ ايتقان ءجون، بيىل جوعارى تەحنيكالىق مەكتەبىنىڭ العاشقى قارلىعاشتارى – 270 تۇلەك مەملەكەتتىك جانە حالىقارالىق ۇلگىدەگى ديپلوم مەن سەرتيفيكاتقا يە بولادى. ەڭ باستىسى، الەمدىك دەڭگەيدە ءبىلىم العان جاستارعا جۇمىس بەرۋشىلەر تاراپىنان دا سۇرانىس جەتكىلىكتى كورىنەدى. وسى تەكتەس كوللەدجدەردە مەملەكەتتىك وقىتۋ ستاندارتى دەگەن بار، ول بارشا وقۋ ورنىنا ورتاق. ال ءبىلىم بەرۋ تەحنولوگياسى، ادىستەمەسى، مازمۇنى بۇل مەكتەپتە ءبىرشاما وزگەشە. وقۋ باعدارلامالارى مودۋلدىك نەگىزدە قۇرىلعان. مىسالى، مۇناي-گاز سالاسى كومپانيالارىندا جاڭا تەحنولوگيا ەنگىزىلگەندە، جالپى بارلىق وزگەرىستەر مەن جاڭاشىلدىقارعا ساي وقىتۋ باعدارلامالارى دا ىسكە قوسىلادى. كومپانيالارداعى ءوندىرىس تەحنولوگيالارى ۇنەمى جەتىلدىرىلىپ وتىرادى عوي، سوعان ساي بۇل كوللەدج دە وقىتۋ باعدارلاماسىن جەتىلدىرەدى. جۇمىس بەرۋشى كومپانيالارمەن ارادا يندۋستريالدىق كەڭەس قۇرىلعان. وسى كەڭەس وقىتۋ باعدارلاماسىنىڭ مازمۇنىن ۇنەمى كەلىسىپ، تالقىلايدى. بۇل كەڭەس وندىرىسكە ەنگىزىلگەن جاڭا جۇيە، تەحنولوگيالىق وزگەرىسكە بايلانىستى ۇسىنىستارىن، پىكىرلەرىن ايتادى. سوعان سايكەس تەحنيكالىق مەكتەپتەردىڭ وقىتۋ مودۋلدەرى جاڭا وزگەرىسكە سايكەستەندىرىلەدى. وندىرىسپەن تىعىز بايلانىستا ءبىلىم العان ستۋدەنتتەر سول سەبەپتەن ەڭبەك نارىعىندا سۇرانىسقا يە بولىپ، بىردەن ءوز ورنىن تاۋىپ كەتەدى. بۇگىندە ءجيى تالقىعا ءتۇسىپ، سىنعا الىناتىنى دا وسى ماسەلە: ستۋدەنتتەردىڭ تەوريامەن قوسا، تاجىريبەنى قاتار الىپ ءجۇرۋى. بۇل تۇرعىدا كاسىبي-تەحنيكالىق ءبىلىم بەرۋ مەكەمەلەرى بىلەك سىبانىپ جۇمىس ىستەۋدە.

نازىم رىسبەتوۆا