كاسىپكەرلەردى 126 ميلليون تەڭگەگە الداعان الاياق قىرعىزستاندا ۇستالىپ، قازاقستانعا ەكستراديسيالاندى، دەپ حابارلايدى Dalanews.kz.
الماتى وبلىسىنىڭ اۋماعىندا ءبىرقاتار الاياقتىق ارەكەتتەر جاساعانى ءۇشىن كۇدىكتى باس پروكۋراتۋراسىنىڭ سۇراۋ سالۋ بويىنشا قىرعىز رەسپۋبليكاسىنان ەكستراديسيالاندى.
تەرگەۋ بارىسىندا 2019–2022 جىلدار ارالىعىندا قاسكۇنەمنىڭ الدىن الا ءسوز بايلاسۋ ارقىلى وزگە ادامدارمەن بىرگە وڭىردەگى ەڭ ءىرى ازىق-تۇلىك بازارلارىنىڭ بىرىندە ساۋدا بۋتيكتەرىن ساتۋ سىلتاۋىمەن ازاماتتاردى جۇيەلى تۇردە الداپ كەلگەنى انىقتالدى. الاياقتىق ارەكەتتەرىنىڭ ناتيجەسىندە ول 11 كاسىپكەردىڭ جالپى 126 ميلليون تەڭگە كولەمىندەگى قاراجاتىن يەمدەنگەن.
قىلمىستاردى جاساعاننان كەيىن كۇدىكتى قۇقىق قورعاۋ ورگاندارىنان جاسىرىنىپ، حالىقارالىق ىزدەۋگە جاريالانعان. قازاقستان مەن قىرعىزستاننىڭ قۇزىرەتتى ورگاندارىنىڭ ءوزارا ءتيىمدى ءىس-قيمىلىنىڭ ناتيجەسىندە بيىلعى تامىز ايىندا ول بىشكەك قالاسىندا ۇستالدى. قازاقستان رەسپۋبليكاسى باس پروكۋراتۋراسىنىڭ رەسمي سۇراۋى نەگىزىندە ول قىلمىستىق جاۋاپتىلىققا تارتۋ ءۇشىن بەلگىلەنگەن تارتىپپەن ەلىنە ەكستراديسيالاندى.
قازىرگى ۋاقىتتا كۇدىكتى تەرگەۋ يزولياتورىنا قامالدى. قىلمىستىق زاڭمەن ايىپتالعان ارەكەت ءۇشىن مۇلكى تاركىلەنىپ، 5 جىلدان 10 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
