28 ناۋرىزدا ق ر ۇلتتىق بانكى ايىرباستاۋ پۋنكتتەرىندە ۆاليۋتا باعامدارى بار جارىق تابلولارىن ورنالاستىرۋعا تىيىم سالۋعا باستاماشىلىق جاسادى. جول بويىندا، عيماراتتاردىڭ قاسبەتتەرىندەگى ادەتتەگى ەلەكتروندى بەلگىلەرگە شەكتەۋ قويىلماقشى. قاۋلى جوباسى «اشىق نقا» پورتالىندا جاريالانىپ، قوعامدىق تالقىلاۋ 14 ساۋىرگە دەيىن جالعاسادى.«اتامەكەن» قازاقستان رەسپۋبليكاسىنىڭ ۇلتتىق كاسىپكەرلەر پالاتاسى 2025 جىلدىڭ تامىزىندا ەنگىزىلۋى كۇتىلەتىن اتالمىش شارالارعا قارسىلىعىن ءبىلدىردى، دەپ حابارلايدى Dalanews.kz.
ۇكپ ساراپشىلارى «بۇل ماسەلەنى بيزنەس-قاۋىمداستىق وكىلدەرىمەن، تۇتىنۋشىلار، ساۋلەت جانە قالا قۇرىلىسى ىستەرى جونىندەگى ۋاكىلەتتى ورگانداردىڭ جانە جول پوليسياسىنىڭ قاتىسۋىمەن مۇقيات پىسىقتاۋ قاجەت» دەپ اتاپ ءوتتى.
نەگىزدەمە رەتىندە ۇلتتىق بانكتە جۇرگىزىلگەن تالداۋعا سىلتەمە جاسالادى: دەرەكتەرگە سۇيەنسەك، ۆاليۋتا ايىرباستاۋدى جۇزەگە اسىراتىن ۋاكىلەتتى ۇيىمداردىڭ اقپاراتتىق ستەندتەرى كولىك قۇرالدارىنىڭ قوزعالىسى قاۋىپسىزدىگىنىڭ تالاپتارىن بۇزادى. الايدا، اپاتقا نە جول بەلگىلەرىنىڭ كورىنبەي قالۋىنا تابلونىڭ اسەرى تۋرالى ناقتى ستاتيستيكالىق مالىمەت پەن دالەلدەر كەلتىرىلمەگەن.
«ۆاليۋتالاردى ساتىپ الۋ/ساتۋ باعامى تۋرالى اقپارات جالپىعا قولجەتىمدى اقپارات بولىپ تابىلادى. عيماراتقا كىرە بەرىستەن تىس ورنالاستىرىلاتىن دەرەكتەر سىرتقى (كورنەكى) جارناماعا جاتادى جانە ولاردى زاڭناما تالاپتارىنا سايكەس جالپى نەگىزدەردە ۆاليۋتا ايىرباستاۋدى جۇزەگە اسىراتىن ۋاكىلەتتى ۇيىمدار بەلگىلەيدى»، - دەپ اتاپ ءوتتى ۇكپ ساراپشىلارى.
سونىمەن قاتار، شارا تۇتىنۋشىلاردىڭ قۇقىعىن بۇزادى. زاڭناماعا سايكەس ازاماتتاردىڭ تاۋار (جۇمىس، قىزمەت) جانە ولاردىڭ جەتكىزۋشىلەرى (دايىنداۋشى، ورىنداۋشى) تۋرالى تولىق، دۇرىس جانە ۋاقتىلى اقپارات الۋعا قۇقىعى بار. كوشە تاقتالارىنا تىيىم سالۋ ايىرباستاۋ پۋنكتىنە بارعانعا دەيىن ۆاليۋتا باعامدارى تۋرالى اقپاراتقا قول جەتكىزۋدى شەكتەيدى. بۇل، «اتامەكەن» ساراپشىلارىنىڭ پىكىرىنشە، اشىقتىق قاعيداتتارىنا قايشى كەلەدى جانە تۇتىنۋشىعا باسەكەلەستىك نارىقتاعى جاعدايلاردى وبەكتيۆتى باعالاۋ مەن سالىستىرۋدى قيىنداتۋى مۇمكىن.
اتالمىش باستاما ق ر كونستيتۋسياسىنا سايكەس، اركىمنىڭ ەركىن اقپارات الۋعا جانە تاراتۋعا قۇقىعى بار دەگەن جانە ق ر كاسىپكەرلىك كودەكسىندە كوزدەلگەن ادال باسەكەلەستىك قاعيداتتارىنا قايشى كەلەدى.
ماسەلەن، ەىدۇ جانە تمد ەلدەرىندە ايىرباستاۋ پۋنكتتەرى قاۋىپسىزدىك نورمالارى مەن كورنەكى وقىلىم ساقتالعان جاعدايدا ءۇي-جايلاردان تىس جەرلەردە ۆاليۋتا باعامىن ەركىن ورنالاستىرادى. پولشا، گرۋزيا، چەحيا، ارمەنيا جانە وزبەكستاندا كۋرستارعا قاتىستى اقپارات جارناما ەمەس، قوعامدىق اقپاراتتىڭ ەلەمەنتى بولىپ ەسەپتەلەدى. بۇل ءوز كەزەگىندە نارىقتىڭ اشىقتىعى مەن ادال باسەكەلەستىك پرينسيپتەرىن قولدايدى.
