"كابينەتتەرىندە تىپ-تىنىش وتىرىپ، تەك تەوريالىق ىزدەنىستەرمەن شەكتەلمەۋ كەرەك" - پرەزيدەنت عالىمدارعا

ساعىنىش سارداروۆا 31 مام. 2024 17:15 3122

پرەزيدەنت قاسىم-جومارت توقايەۆ عالىمدارعا ماڭىزدى مىندەت جۇكتەدى، - دەپ حابارلايدى Dalanews.kz.

"جاھاندىق پوليۋستەر مەن مەملەكەتتەر اراسىندا كۇشەيە تۇسكەن باسەكەلەستىك – جاڭا داۋىرگە قادام باسقانىمىزدىڭ ايقىن دالەلى. بۇرىن ەلدىڭ ءال-اۋقاتى اۋماعىنىڭ كولەمىنە جانە حالقىنىڭ سانىنا بايلانىستى بولسا، ءقازىر تەحنولوگيا مەن ادام كاپيتالىنىڭ ساپاسى الدىڭعى قاتارعا شىقتى. مىسالى، ءحىح عاسىردىڭ باسىندا جەر شارى حالقىنىڭ ۇشتەن بىرىنە جۋىعى قىتايعا تيەسىلى بولعان. بۇل ەلدىڭ الەمدىك ەكونوميكاداعى ۇلەسى دە وسى شامادا ەدى. الايدا ءححى عاسىردىڭ باسىنا قاراي جاعداي تۇبەگەيلى وزگەردى. دۇنيەجۇزى حالقىنىڭ 5 پايىزى عانا تۇراتىن اقش الەمدىك ءجىو-نىڭ 20 پايىزىن يەلەندى.

بۇگىندە ەكونوميكالىق باسەكە گەوساياسي كۇرەستىڭ كەزەكتى كەزەڭىنە ۇلاستى. وسى ورايدا يننوۆاسيانىڭ ماڭىزى ارتا تۇسەدى. الەمدىك دامۋدان شەت قالماۋ ءۇشىن ەلىمىزدى جان-جاقتى جاڭعىرتۋ قارقىنىن ۇدەتۋ كەرەك. ءبىز وركەنيەتتىڭ كوشىن قۋىپ جەتەتىن ەمەس، باسىپ وزاتىن مودەلدى نەگىزگە الۋىمىز قاجەت. ايتپەسە، ساعىم قۋىپ جۇرە بەرەمىز.

قولدا بار رەسۋرستىڭ ءبارىن جانە باسەكەلەستىك جولىنداعى ارتىقشىلىعىمىزدى تولىقتاي پايدالانۋ ماڭىزدى. جاھاندىق عىلىمي-تەحنيكالىق ريەۆوليۋسيا جاعدايىندا عالىمدار مەن ءبىلىمپازداردىڭ ءرولى بىردەن ارتادى. الايدا ەڭ باي ەلدەردىڭ ءوزى بارلىق سالا بويىنشا جوعارى دەڭگەيدە زەرتتەۋ جۇرگىزە المايدى.

تابىسقا جەتۋ ءۇشىن باسىم باعىتتاردى ايقىنداپ الىپ، عىلىمي قاۋىمداستىقتىڭ، مەملەكەت پەن بيزنەستىڭ كۇش-جىگەرىن جۇمىلدىرۋ كەرەك. بۇل رەتتە عالىمدارىمىز كابينەتتەرىندە تىپ-تىنىش وتىرىپ، تەك تەوريالىق ىزدەنىستەرمەن شەكتەلمەي، ناقتى ىسپەن جانە قولدانبالى زەرتتەۋلەرمەن اينالىسۋعا ءتيىس"، - دەدى توقايەۆ.


ۇسىنىلعان
سوڭعى جاڭالىقتار