كانديدات ساپارى حالىقتىڭ رۋحاني دامۋىنا زور ۇلەس قوسقان ۇلى تاريحي قايراتكەرلەر – اباي قۇنانباي ۇلى مەن مۇحتار اۋەزوۆتىڭ ەسكەرتكىشتەرىنە گۇل شوقتارىن قويۋدان باستالدى. ۇلىلار رۋحىنا تاعزىم – تاعزىم مەن تاعىلىمدى قاتار ۇستاعان «اۋىل» پارتياسىنىڭ باستى قۇندىلىعى.
ودان كەيىن جيگۋلي دايرابايەۆ جانە ونىڭ كومانداسى اباي وبلىستىق كىتاپحاناسىندا جەرگىلىكتى زيالى قاۋىممەن كەزدەسۋ وتكىزدى. كەزدەسۋدە كانديدات باعدارلاماسىنىڭ ماڭىزدى باعىتتارى – دالا دەموكراتياسىنىڭ قاعيداتتارى، قوعامنىڭ قازاق حالقىنىڭ مادەنيەتى مەن ادەبيەتىن، قازاق ويشىلدارى ەڭبەكتەرىنىڭ قۇندى ۇلگىلەرىن ساقتاۋعا قاتىسۋى تالقىلاندى.
«مەنىڭ ويىمشا، ايماقتارداعى جەرگىلىكتى زيالى قاۋىمدى قولداۋ قاجەت. جاسىراتىنى جوق، ولار ءوز قاراجاتى ەسەبىنەن ءومىر سۇرەدى، مەملەكەت ولارعا قارجىلىق قولداۋ كورسەتپەيدى. دەگەنمەن، ولاردىڭ ۇسىنىس-پىكىرلەرى ەڭ بيىكتەگى بيلىككە جەتۋى ءۇشىن جاعداي جاساۋ ماڭىزدى.
ول ءۇشىن جەرگىلىكتى قاۋىمداستىقتار جۇيەلى تۇردە كەزدەسۋلەر وتكىزىپ، ۇسىنىستار قالىپتاستىرىپ، تالداۋلار جۇرگىزىپ، ولاردى جەرگىلىكتى بيلىككە جەتكىزۋى كەرەك.
مۇنداي تاجىريبە جەتەكشى الەمدىك دەرجاۆالاردا، مىسالى، جاپونيادا ءساتتى ىسكە اسقان. بۇل دالا دەموكراتياسىنىڭ «حالىق دانالىعى – ەل يگىلىگى ءۇشىن» اتتى نەگىزگى باعىتتارىنىڭ ءبىرى»، - دەدى جيگۋلي دايرابايەۆ.
زيالى قاۋىمنان سوڭ كانديدات ەڭ ءىرى جانە زاماناۋي ماي ەكستراكسيالاۋ زاۋىتى – «Qazaq Astyq Group» ج ش س قىزمەتكەرلەرىمەن كەزدەستى. كانديدات قازاقستاننىڭ شيكىزاتتى ەكسپورتتاماۋى، كەرىسىنشە، ەل ىشىندە قايتا وڭدەۋمەن اينالىسۋى كەرەكتىگىنە توقتالدى. قايتا وڭدەۋدەگى قوسىمشا ءونىم وسىلايشا، جەرگىلىكتى نارىققا شىعادى.
سوندىقتان بيزنەسكە قازىرگىدەن دە كوپ قايتا وڭدەۋ زاۋىتتارىن سالۋ، ال مەملەكەتكە جان – جاقتى قولداۋ مەن ىنتالاندىرۋ شارالارىن كورسەتۋ قاجەت. قىزمەتكەرلەر كانديداتتىڭ باستامالارىنا قولداۋ ءبىلدىرىپ، سايلاۋدا ساتتىلىك تىلەدى.
