جاساندى ينتەللەكتتى قولدانۋ اسكەري ارەكەتتەردى جۇرگىزۋ شىعىندارىن قانشالىقتى ازايتادى؟ ال ءجي-دىڭ مەملەكەتتىك قورعانىس جۇيەسىنە ەنۋىنىڭ كەرى جاعى قانداي؟ بۇل سۇراقتارعا Qazaq Expert Club ساراپشىسى، قارجىگەر ۆەنەرا جانالينانىڭ پىكىرلەرى ارقىلى جاۋاپ بەرۋگە بولادى، دەپ حابارلايدى Dalanews.kz.

«ۇنەمدەۋدىڭ ەڭ ايقىن كوزدەرىنىڭ ءبىرى اسكەري تەحنيكانى پايدالانۋ مەن وعان قىزمەت كورسەتۋگە بايلانىستى.

تەحنيكانىڭ ومىرلىك سيكلى بويىنداعى پايدالانۋ شىعىندارى كەيدە ونىڭ ءوز قۇنىمەن تەڭ بولۋى نەمەسە ودان دا اسىپ كەتۋى مۇمكىن.

سوندىقتان بۇگىندە جي قولدانىلاتىن پرەديكتيۆتى قىزمەت كورسەتۋ باستى باسىمدىققا اينالىپ وتىر. الگوريتمدەر داچيكتەردەن الىنعان دەرەكتەر مەن جابدىقتىڭ تەحنيكالىق پارامەترلەرىن تالداپ، ىقتيمال اقاۋلاردى ولار پايدا بولماي تۇرىپ-اق بولجاي الادى.

GAO مالىمەتتەرى بويىنشا، وسىنداي تەحنولوگيالاردى ەنگىزۋ قوسالقى بولشەكتەرگە جۇمسالاتىن شىعىنداردى 12%-عا ازايتۋعا مۇمكىندىك بەردى: AH-64 Apache تىكۇشاقتارى ءۇشىن - 12%، CH-47 Chinook ءۇشىن - 23%، ال UH-60 Black Hawk ءۇشىن - 16%. سونداي-اق GAO دەرەكتەرىنە سايكەس، اقش تەڭىز جاياۋ اسكەرلەرى پرەديكتيۆتى اناليتيكا جۇيەلەرىن ەنگىزگەننەن كەيىن تەحنيكانىڭ بوس تۇرۋ ۋاقىتىنىڭ 32%-عا قىسقارعانىن جانە تەحنيكالىق قىزمەت كورسەتۋگە كەتەتىن ەڭبەك شىعىنىنىڭ 69%-عا ازايعانىن تىركەگەن.

جي «سوعىستىڭ ترانزاكسيالىق شىعىندارىن» دا قىسقارتۋعا مۇمكىندىك بەرەدى: بارلاۋ دەرەكتەرىن وڭدەۋ، وپەراسيالاردى جوسپارلاۋ، بولىمشەلەردى ۇيلەستىرۋ جانە اسكەري ءىس-قيمىلداردى باسقارۋ شىعىندارى ازايادى. بۇل قىمباتقا تۇسەتىن قاتەلىكتەردىڭ ىقتيمالدىعىن تومەندەتەدى، مىسالى اۆياسيانىڭ قايتا ۇشۋى، ارتىق جانارماي نەمەسە ءوق-دارى شىعىنى سياقتى جاعدايلاردى.

الايدا مۇنداي ۇنەمدەۋدىڭ وسال تۇستارى دا بار. اسكەر سيفرلىق جۇيەلەر مەن الگوريتمدەرگە نەعۇرلىم كوپ سۇيەنگەن سايىن، ول بايلانىس ينفراقۇرىلىمىنا، ەلەكتر ەنەرگياسىنا جانە دەرەكتەر ينفراقۇرىلىمىنا سوعۇرلىم تاۋەلدى بولا تۇسەدى. ەگەر قارسىلاس ولاردى ىستەن شىعارسا، سالدارى وتە اۋىر بولۋى مۇمكىن.

سونىمەن قاتار تاعى ءبىر ءقاۋىپ بار - تەحنولوگيا جەتكىزۋشىلەرىنە تاۋەلدىلىك. ەگەر اسكەري قۇرىلىمدار بەلگىلى ءبىر جي مودەلىن ءوز جۇيەلەرىنە تەرەڭ ەنگىزسە، ولار سول مودەلدى جاساعان كومپانياعا تاۋەلدى بولىپ قالادى. مىسالى، باق-تا تالقىلانعان Anthropic كومپانياسىنىڭ Claude مودەلى توڭىرەگىندەگى جاعداي ازىرلەۋشىلەردىڭ تەحنولوگيانى قولدانۋعا ءوز شەكتەۋلەرىن ەنگىزە الاتىنىن كورسەتتى. اسكەري قۇرىلىمدار ءۇشىن بۇل تاۋەكەل تۋعىزادى: سيفرلىق قۇرالدى قولدانۋ مەملەكەتتىك شەشىممەن ەمەس، جەكە كومپانيانىڭ ىشكى ساياساتى ارقىلى شەكتەلۋى مۇمكىن.

ەكونوميكالىق تۇرعىدان بۇل اۋىسۋ شىعىندارىنىڭ ءوسۋىن بىلدىرەدى: مودەلدى شۇعىل تۇردە اۋىستىرۋ، ونى ىشكى جۇيەلەرگە قايتا قوسۋ، قاۋىپسىزدىك پەن تالاپتارعا سايكەستىگىن قايتا تەكسەرۋ، قىزمەتكەرلەردى قايتا وقىتۋ، ال كەي جاعدايلاردا پروسەستەردى ۋاقىتشا باياۋلاتۋ قاجەت بولادى. ياعني «جي-ۇنەمىنىڭ» ءبىر بولىگى ءبىر ساتتە قوسىمشا شىعىندار مەن كىدىرىستەرگە اينالۋى مۇمكىن.

قورىتىندى قاراپايىم: جي باسقارۋ مەن وپەراسيالارعا نەعۇرلىم تەرەڭ ەنگىزىلگەن سايىن، «بولشەكتى اۋىستىرۋ» سوعۇرلىم قىمبات ءارى اۋىر بولادى. سوندىقتان تەك الگوريتمدەردىڭ ءوزى عانا ەمەس، جەتكىزۋشىنى جۇمىستى توقتاتپاي جىلدام اۋىستىرۋعا مۇمكىندىك بەرەتىن ارحيتەكتۋرا دا ماڭىزدى.