شىمكەنتتە جۋرناليست ءارى بلوگەر اراي ەسەنبەك بوپسالاۋ ءىسى بويىنشا 5 جىلعا باس بوستاندىعىنان ايىرىلدى، دەپ حابارلايدى DalaNews.kz
سوت مالىمەتىنشە، ول قىلمىستىق كودەكستىڭ 194-بابى 3-بولىگى بويىنشا كىنالى دەپ تانىلعان.
ءىس ماتەريالدارىنا سايكەس، بلوگەر وتكەن جىلى تانىس شەنەۋنىكتەن 10 ملن تەڭگە تالاپ ەتكەن. ول اقشانى بەرمەگەن جاعدايدا ءوز مەديارەسۋرستارىندا جاعىمسىز ماتەريالدار جاريالايتىنىن ايتىپ قورقىتقان.
كەيىن مەملەكەتتىك قىزمەتكەر قۇقىق قورعاۋ ورگاندارىنا جۇگىنگەن. اقشا بەرۋ كەزىندە ەسەنبەك ۇستالعان.
سوت ونى بوپسالاۋ جاساعانى ءۇشىن كىنالى دەپ تانىپ، 5 جىلعا باس بوستاندىعىنان ايىرۋ جازاسىن تاعايىندادى.
ۇكىم زاڭدى كۇشىنە ەنگەن جوق.
