بۇگىننەن باستاپ اقىلى جولداردىڭ اقاۋى بار ۋچاسكەسىندە جول ءجۇرۋ اقىسى تەگىن. بۇل تۋرالى كولىك مينيسترلىگى مالىمدەدى،- دەپ حابارلايدى Dalanews.kz.
15 قىركۇيەكتەن باستاپ رەسپۋبليكالىق ماڭىزى بار اقىلى جولداردا تولەم ەرەجەلەرى وزگەردى. ءقازىر ەلىمىزدە بارلىعى 27 اقىلى جول بار.
"اقىلى جولدا جول قوزعالىسى قاۋىپسىزدىگىنە اسەر ەتەتىن جانە جوندەۋدى تالاپ ەتىپ تۇرعان جول ۋچاسكەسى بولسا، ءدال سول ارالىق ءۇشىن جوندەۋ جۇمىستارى تولىق اياقتالعانعا دەيىن تولەم الىنبايدى. مىسالى اقىلى جول ۋچاسكەسىنىڭ جالپى ۇزىندىعى 100 شاقىرىم بولسا، ونىڭ 5 شاقىرىمى جوندەۋدى تالاپ ەتسە، وندا جول بويىنداعى اقاۋ جويىلعانعا دەيىن جۇرگىزۋشىلەر 95 شاقىرىم جول ءۇشىن عانا اقى تولەيدى"، - دەپ جازىلعان حابارلامادا.
ءار جۇرگىزۋشى اقاۋ تۋرالى تاۋلىك بويى جۇمىس ىستەيتىن 1403 نومىرىنە قوڭىراۋ شالىپ، حابارلاي الادى. جاڭا ەرەجە رەسپۋبليكالىق جانە حالىقارالىق ماڭىزى بار اقىلى جولدارعا قولدانىلادى.
