قازىرگىدەي قيىن زاماندا ەل مۇۇدەسىن كوزدەپ، قولىنداعىسىن وزگەمەن بولىسۋگە دايار تۇراتىن ازاماتتار كوپ ەمەس. سولاردىڭ ءبىرى، ءھام بىرەگەيى – ورالبەك بوتباي. ەلىمىزدە شىعاتىن باسپا ءسوز بەتتەرىن پاراقتاعان ادام ونىڭ الەۋمەتتىك جاعدايى تومەن كوپتەگەن ادامدارعا قول ۇشىن بەرىپ، قايىرىمدىلىق شاراسىنا بەلسەنە قاتىسىپ جۇرەتىنىن بىلەر ەدى. 27 ءساۋىر كۇنى ەردىڭ جاسى 50-گە تولىپ، ەلباسىنىڭ «رۋحاني جاڭعىرۋ» باعدارلماسى اياسىندا «50 يگى ءىس» جوباسىن قولعا العان اپتال ازاماتتى اڭگىمەگە تارتىپ، سىر سۋىرتپاقتادىق.
– بيىل مەن ءۇشىن ەرەكشە جىل بولىپ تۇر. 50 جاسقا تولىپ، جۇرتشىلىققا قاندايدا ءبىر پايدامىزدى تيگىزىپ، ەلىمىزدىڭ وركەندەۋىنە ءوز ۇلەسىمىزدى قوسا تۇسۋگە ىقىلاسىم اۋدى. تاۋەلسىزدىك جىلدار ەلىمىز ەكونوميكالىق تۇرعىدان بارىنشا دامىپ، ەلباسى نۇرسۇلتان نازاربايەۆتىڭ سارابدال ساياساتىنىڭ ارقاسىندا الەم تانيتىن ەلگە اينالدى. وسى 26 جىل ىشىندە ەل-جۇرت ارقا سۇيەيتىن كاسىپكەرلىك ورتا قالىپتاستى. ءوز باسىم ەلىمىزدەگى ءاربىر كاسىپكەردى ەلىمىزدىڭ نىعايتۋعا بار كۇشىن جۇمساعان ازاماتتار دەپ قابىلدايمىن. وسى رەتتە تاۋەلسىزدىك جىلدار پرەزيدەنتىمىز شاعىن جانە ورتا بيزنەستىڭ دامۋىنا بارىنشا جاعداي جاسادى. قازىرگى تاڭدا قازاقستاندا بيزنەس اشۋ، ونى جۇرگىزۋدىڭ بارىنشا دامىعانىن باتىس ەلدەرىنىڭ ءوزى مويىنداپ وتىر. ءوز باسىم تاۋەلسىزدىك جىلدار بيزنەسكە بەت بۇرىپ، بۇگىندە جەتىستىككە قول جەتكىزگەن ازاماتتاردىڭ جۇرتشىلىققا قايىرىمدىلىق جاساۋى بۇل ەلىمىزدە ازاماتتىق قوعامنىڭ تولىقتاي قالىپتاسقانىن ايعاقتاي تۇسەدى. ەندى ءوزىمنىڭ قولعا العان ءىس-شارالارىم جايىندا از-كەم ايتسام، «50 يگى ءىس» جوباسى اياسىندا ل.ن.گۋميليەۆ اتىنداعى ەۇۋ-دە جانە «تۇران» كوللەدجىندە ارنايى شاكىرتاقى تاعايىنداپ، جاعدايى تومەن وتباسىنداعى جاستاردىڭ الاڭسىز ءبىلىم الۋىنا جاعداي جاساپ جاتقان جايىم بار. سونىمەن قاتار ماسكەۋدە ءبىلىم الىپ جۇرگەن ءبىر قازاق بالاسىنىڭ دا وقۋ اقىسىن تولەۋدى موينىما الىپ وتىرمىن، – دەدى ورالبەك قوجامجار ۇلى.
اتا-بابالارىمىز «جاقسىنىڭ جاقسىلىعىن ايت، نۇرى تاسىسىن» دەپ بەكەر ايتماعان. قاراقان باسىنىڭ قامىن عانا ەمەس، قاتارىنداعىلاردىڭ بارلىعىنىڭ باقۋاتتى بولۋىنا تىلەكتەس بولىپ جۇرەتىن ورالبەك مىرزا جايىندا تاڭدى تاڭعا ۇرىپ اڭگىمە ايتۋعا بولادى. ءبىزدىڭ بىلۋىمىزشە، بۇگىن ل.ن.گۋميليەۆ اتىنداعى ەۇۋ وتكەن ءىس-شاراسى ورەكەڭ ۇيىمداستىرعان قايرىمدىلىق شاراسىنىڭ باسى دا، اياعى دا (قولىنداعىسىن ەلمەن بولىسۋگە دايار تۇراتىن اپتال ازاماتقا اللام ۇزاق عۇمىر بەرسىن!) ەمەس. سوندىقتان بولار، ونى بىلەتىندەر، تەك ىسكەر كاسىپكەر عانا ەمەس، ناعىز ازامات رەتىندە قۇرمەتتەيدى. مەن كومەك بەردىم، دەمەۋشىلىك جاسادىم دەپ اڭگىمە قىلعان ورەكەڭدى كورگەن ەمەسپىن.
بۇگىنگى شاراعا قاتىسقانىمىزدا ورالبەك قوجامجار ۇلى ل.ن.گۋميليەۆ اتىنداعى ەۇۋ-دىڭ 13 فاكۋلتەتىنە بىر-بىردەن ءبىلىم گرانتىن تاعايىنداپ، وقۋعا قۇشتار جاندارعا تاپسىردى. بيىلعى وقۋ جىلىنىڭ باسىندا «تۇران» كوللەدجىندە ءبىلىم الىپ جۇرگەن 30 ستۋدەنتتىڭ وقۋ اقىسىن كوتەرىپ العانى جانە بار. ورالبەك قوجامجارۇلىنان قايرىمدىلىق شاراسى جايىندا سۇراي قالساڭىز ءبارىن سانامالاپ ايتىپ جاتپايدى. تۋماسىنان تەكتى جان بەرگەنىن ايتپايتىنى انىق.
ءبىراق ءقازىر باياعى زامان ەمەس. قايىرىمدىلىق شارالارىنا باستاماشىل بولىپ، ەلگە ەت-جۇرەگى بۇرىپ تۇراتىن ازاماتتاردىڭ اتقارعان ءىسىن اتاپ-اتاپ ايتۋدىڭ تۇك تە سوكەتتىگى جوق. قايتا ورەكەڭدەي اتىمتاي جومارتتىڭ ىس-ارەكەتى ميلليونداردى قالتاسىنا باسىپ، شەتەلدەن شىقپايتىن كاسىپكەرلەرىمىزگە ۇلگى بولارى انىق.
ورالبەك قوجامجار ۇلى بۇعان دەيىن قولعا العان قايىرىمدىلىق شارالارى جايىندا اڭگىمەلەيتىن بولساق، اڭگىمە-بايانىمىزدىڭ بىرنەشە ماقالاعا سوزىلاتىنى انىق. سوندىقتان ورەكەڭنىڭ ەلدى ەلجىرەتكەن بىر-ەكى قايىرىمدىلىعى جايىندا ايتا كەتۋىدى ءجون ساناپ وتىرمىز. ول ءار قاشان ءوزىنىڭ كىندىك قانى تامعان بايدىبەك اۋدانىنداعى قوشقار اتا اۋىلىنا بارىنشا قامقورلىق جاساپ كەلەدى. بيىلدىڭ وزىندە 7 شاقىم جولعا اسفالت توسەپ بەردى. سونىمەن قاتار اۋىل ىشىندە 48 شاقىرىمعا سوزىلاتىن نەگىزگى كوشەلەرگە 480 شام ورناتىپ، تاۋعان اۋىلىن سامالاداي جارقىراتىپ قويدى. قازاقتىڭ دارحان دالاسىندا كەڭ پەيىل ورەكەڭنىڭ بويىنان جەرشىلدىكتى مۇلدە تاپپايسىز. ورالبەك مىرزا ءۇشىن «ءار قازاق ونىڭ جالعىزى» دەسەك ارتىق ايتقاندىق بولماس ەدى. ءسوزىمىز دالەلدى بولۋ ءۇشىن مىنا ءبىر جايتتى دا ايتا كەتەيىك. بۇگىندە مەسەنات-كاسىپكەر اقتاۋ قالاسىنداعى 12 مولتەك اۋدانعا جارىق تارتىپ، جۇرتتىڭ ريزاشىلىعىنا بولەندى. الداعى ۋاقىتتا ورەكەڭ ماڭعىستاۋدىڭ شالعايدا جاتقان اۋداندارىنداعى اۋىلدارعا جارىقتاندىرىپ، ءوزىنىڭ قايىرىمدىلىق شاراسىن جالعاستىرماقشى.
جومارت كىسىنىڭ جۇرەگى ءوز بايلىعىنا بايلانباۋى ماڭىزدى. سوندىقتان ەل ىشىندە جۇرەگى ەل دەپ سوققان ورالبەك بوتباي سىندى اپتال ازاماتتار كوبەيگەنى ەل بولىپ قالىپتاسقانىمىزدىڭ بەلگىسى دەپ ەسەپتەيمىن. ەلىنە سۇيەنىش بولاتىن ازاماتتارىمىز كوپ بولسىن!
ن.اۋباكىر.
