ششۋچينسك قالاسىندا تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى اراسىندا رەسپۋبليكالىق سلەت ءوز جۇمىسىن باستادى. ەلىمىزدىڭ بارلىق وڭىرىنەن كەلگەن 100-دەن استام بەلسەندى جاستار جۇمىسشى ماماندىقتارىنىڭ بولاشاعىن تالقىلاپ، شەبەرلىكتەرىن شىڭداپ، جاڭا سەرپىن مەن شابىت الۋعا جينالدى. ءىس-iارانىڭ اشىلۋىنا ق ر پرەمەر-مينيسترىنىڭ ورىنباسارى ەرمەك كوشەربايەۆ، وقۋ-اعارتۋ ءمينيسترى عاني بەيسەمبايەۆ، اقمولا وبلىسىنىڭ اكىمى مارات احمەتجانوۆ، ق ر پارلامەنتى ءماجىلىسىنىڭ دەپۋتاتتارى قاتىستى.
پرەمەر-مينيستردىڭ ورىنباسارى ەرمەك كوشەربايەۆ سلەت قاتىسۋشىلارىن قۇتتىقتاپ، جۇمىسشى ماماندىقتارىنىڭ ەل دامۋىنداعى ماڭىزدى ءرولىن اتاپ ءوتتى:
– مەملەكەت باسشىسى 2025 جىلدى جۇمىسشى ماماندىقتارى جىلى دەپ جاريالادى. مۇندا ماسەلە تەك ءبىر سالانىڭ ماماندارىن دايارلاۋ تۋرالى عانا ەمەس، جالپى ەڭبەككە دەگەن كوزقاراستى قايتا قاراۋ تۋرالى بولىپ وتىر. ۇزاق ۋاقىت بويى جۇمىسشى كاسىپتەرىنە قاتىستى قوعامدا ستەرەوتيپتەر قالىپتاسىپ كەلدى. بۇگىندە جاعداي وزگەردى. قازىرگى جۇمىسشى – جاڭا تەحنولوگيالاردى مەڭگەرگەن، ەڭبەك نارىعىندا سۇرانىسقا يە بىلىكتى مامان.
مەملەكەت رەتىندە ءبىز ەڭبەكتى قادىرلەۋ ءداستۇرىن قايتا جاڭعىرتىپ، جۇمىسشى ەڭبەگىنە لايىقتى قۇرمەت قايتارۋ ءۇشىن بار كۇشىمىزدى سالىپ جاتىرمىز. ويتكەنى يندۋستريالىق دامۋ، ءوندىرىستى جاڭعىرتۋ، ەكونوميكالىق تۇراقتىلىق – ءبارى ەڭ الدىمەن سىزدەردىڭ ەڭبەكتەرىڭىزگە تىكەلەي بايلانىستى. وسى وزگەرىستەردىڭ وزەگىندە – سىزدەر، جاس ماماندار تۇرسىزدار، – دەدى ەرمەك كوشەربايەۆ.
بيىلعى جىلدىڭ باسىنان بەرى 8 مىڭنان استام كاسىبي باعدار بەرۋشى مامان دايىندالدى، مەكتەپتەردە 352 بەيىندىك سىنىپ اشىلدى، 1300-دەن استام وقۋشى جۇمىسشى ماماندىقتارىنىڭ نەگىزدەرىن مەڭگەرىپ ۇلگەردى. شەفتىك قامقورلىققا العان كاسىپورىندار سانى 7 ەسەگە ارتسا، كاسىپورىندارمەن دۋالدى وقىتۋ كەلىسىمشارتتارىنىڭ سانى 2 ەسەگە كوبەيدى. 185 كوللەدجدە ماتەريالدىق-تەحنيكالىق بازا جاڭارتىلىپ، ستۋدەنتتەردىڭ جاتاقحانامەن قامتىلۋى 96%-عا جەتتى.
1 قىركۇيەكتەن باستاپ تەحنيكالىق جانە كاسىپتىك ءبىلىم بەرۋ ۇيىمدارىنا ارنالعان جان باسىنا شاققانداعى قارجىلاندىرۋ كولەمى 2 ەسەگە ءوسىپ، ءبىر ستۋدەنتكە 437 مىڭ تەڭگەدەن 912 مىڭ تەڭگەگە دەيىن ۇلعايادى.
– قازىرگى ەڭبەك نارىعىندا تەك ديپلوم عانا ەمەس، ناقتى داعدى مەن تاجىريبە ماڭىزدى ءرول اتقارادى. قازاقستاننىڭ تەحنيكالىق جانە كاسىپتىك ءبىلىم بەرۋ جۇيەسى جاڭا دەڭگەيگە كوتەرىلۋدە. ءبىز جۇڭگو، فرانسيا، تۇركيا، جاپونيا، ۇلىبريتانيا، گرۋزيا جانە وزگە دە ەلدەرمەن بىرلەسىپ، 10 حالىقارالىق جوبانى قولعا الدىق. العاش رەت كوللەدجدەرگە حالىقارالىق سەرتيفيكاتتاۋ ەنگىزىلدى. ەندى ءبىزدىڭ ستۋدەنتتەر ءوز قۇزىرەتتەرىن الەمدىك ستاندارتتار بويىنشا دالەلدەپ، شەتەلدىك تاعىلىمدامالارعا، حالىقارالىق ەڭبەك نارىعىنا جول اشاتىن بولادى، – دەدى عاني بەيسەمبايەۆ.
سلەتقا قاتىسۋشىلاردىڭ اراسىندا جامبىل پوليتەحنيكالىق جوعارى كوللەدجىنىڭ 3-كۋرس ستۋدەنتى ايالا بايبولات تا بار. ول مەملەكەتتەن ءبىلىم گرانتى نەگىزىندە وقيدى جانە ونىڭ كوللەدجى ينتەرناسيونالداندىرۋ جوباسىنا العاشقىلاردىڭ ءبىرى بولىپ ەنگەن.
– پرەزيدەنتىمىز جۇمىسشى ماماندىقتارى جىلىن جاريالاعان ساتتە ءبىزدىڭ ەڭبەگىمىزدىڭ ماڭىزدىلىعى مەن قاجەتتىلىگى ايقىندالدى. بۇگىنگى تاڭدا كوللەدجدەر – سانالى ءارى بولاشاعى زور تاڭداۋ. بىزدە زاماناۋي شەبەرحانالار، حالىقارالىق تاعىلىمدامالار اشىلىپ جاتىر، ەڭ باستىسى – ناقتى مۇمكىندىكتەر بار. وسىنداي سەنىم ارتقاندارىڭىزعا العىس ايتامىن، – دەدى ستۋدەنت.
سلەت 24 شىلدەگە دەيىن جالعاسادى. ءۇش كۇن بويى جاستار موتيۆاسيالىق كەزدەسۋلەرگە، شەبەرلىك ساباقتارىنا، ينتەراكتيۆتى ءبىلىم بەرۋ بلوكتارىنا، كوماندالىق تاپسىرمالار مەن مادەني-سپورتتىق باعدارلامالارعا قاتىسادى.
ايتا كەتەيىك، ەلىمىزدە 772 كوللەدج بار، وندا 550 مىڭنان استام ستۋدەنت ءبىلىم الۋدا.
