استانادا 50-دەن استام جۇمىس بەرۋشىنىڭ قاتىسۋىمەن بوس ورىندار جارمەڭكەسى وتەدى،- دەپ حابارلايدى Dalanews.kz ەلوردا اكىمدىگىنىڭ رەسمي سايتىنا سىلتەمە جاساپ.

28 اقپاندا ەلوردادا جۇمىسشى ماماندىقتار جىلىنا ورايلاستىرىلعان بوس ورىندار جارمەڭكەسى وتەدى. نۇرا اۋدانى اكىمدىگىنىڭ ۇيىمداستىرۋىمەن وتەتىن ءىس-شارادا 50-دەن استام جۇمىس بەرۋشى ءبىلىم بەرۋ مەن مەديسينادان باستاپ بيزنەس پەن مەملەكەتتىك قىزمەتكە دەيىنگى ءتۇرلى سالادا 200-دەن استام بوس جۇمىس ورنىن ۇسىنادى.

جارمەڭكە «بارىس ارەنا» مۇز سارايىندا (تۇران داڭعىلى، 57) ساعات 13:00-دەن 20:00-گە دەيىن وتەدى. كىرۋ تەگىن. جارمەڭكەگە بارلىق جاستاعى تۇرعىندار قاتىسا الادى.

كەلۋشىلەر كومپانيا وكىلدەرىمەن تىكەلەي سويلەسىپ، ەڭبەك جاعدايلارى جانە جۇمىس كەستەلەرىمەن تانىسىپ، ءوز تۇيىندەمەلەرىن قالدىرا الادى.

جارمەڭكەگە قاتىسقىسى كەلەتىن جۇمىس بەرۋشىلەر تومەندەگى نومىرلەر بويىنشا حابارلاسا الادى: +7 (776) 111-80-08؛ +7 (771) 111-88-81؛ +7 (776) 978-99-00؛ 55-00-48.