جۋىردا ق ر پارلامەنتى ءماجىلىسىنىڭ دەپۋتاتتارىن قايتا  سايلاۋ ناۋقانى وتەدى. بۇل تۋرالى الىپ-قاشپا اڭگىمە بۇدان بۇرىن دا ايتىلعان. بۇل جولى ناقتى اقپاراتتى الدەبىر بىلىكتى مامان ايتتى (اتىن اتاماۋىمىزدى ءوتىندى). ونىڭ سوزىنە سەنسەك، جۋىق كۇندەرى كەزەكتەن تىس پارلامەنت ءماجىلىسىنىڭ سايلاۋ ناۋقانى بولادى. بيلىك وكىلدەرى قازىرشە ەشكىمگە ءتىس جارماعانىمەن، اياقاستىنان شەشىم قابىلداپ، جەدەل سايلاۋ وتكىزۋ جوسپارىن قۇرىپ جاتىر.

بيلىككە سايلاۋ وتكىزۋ نە ءۇشىن ءتيىمدى؟

مۇنىڭ بىرنەشە سەبەبى بار.

جاعىمدى پىكىرلەر تومەندەگى ويلارعا توعىسادى.

بىرىنشىدەن، پرەزيدەنتتىك سايلاۋدى وزدەرى جوسپارلاعانداي وتكىزگەن بيلىك ەندى جىل اقىرىندا تاعى ءبىر سايلاۋ وتكىزىپ، ەلدە قوردالانعان ماسەلەلەردى شەشۋگە كىرىسپەك. سول ارقىلى داعدارىسقا قارسى جۇيەلى جۇمىس اتقارۋدى كوزدەيدى.

ەكىنشىدەن، سىرتقى ساياساتتا الۋان ءتۇرلى وزگەرىستەر بولىپ جاتقانىنا بەيجاي قاراۋعا بولمايدى. ەرتە قامدانىپ، اۋەلى مەملەكەتتىك قۇرىلىمدى جاڭارتۋ كەرەك. ول ءۇشىن پارلامەنتتىك سايلاۋ وتكىزىلۋى ءتيىس. سوندا عانا جاڭا ۇكىمەت جاساقتالىپ، ولار پارمەندى جۇمىسقا كىرىسەدى.

ۇشىنشىدەن، كەلەر جىلى، ءتىپتى الداعى بىرنەشە جىل بويى بۇگىنگىدەن دە قيىن داعدارىس تولقىنى كەلەدى. سول ءۇشىن ءال-اۋقاتىمىز جاقسىراق كەزدە سايلاۋ وتكىزىپ الۋ ۇكىمەتكە دە، ەلگە دە ءتيىمدى.

ال بۇعان كەرى پىكىرلەر تىپتەن كوپ.

بىرىنشىدەن،  ەلىمىزدەگى ەكونوميكالىق قيىنشىلىقتى، اسىرەسە تەڭگەنىڭ كۇن ساناپ قۇنسىزدانۋىن ءسال دە بولسا ۇمىتتىرىپ، سايلاۋ ناۋقانىن ۋلاتىپ-شۋلاتىپ وتكىزۋ – ساياسي ءتاسىلدىڭ ءبىرى. بۇل سايلاۋدان ەشتەڭە وزگەرمەيدى. «نۇر وتان» باياعىداي شاپپاي بايگە الادى.

ەكىنشىدەن، ءقازىر تەڭگەنى ازەر اۋىزدىقتاپ وتىر. پرەزيدەنت نازاربايەۆتىڭ ءوزى سوڭعى ەكى جىلدا تەڭگەنىڭ باعامىن ۇستاپ تۇرۋ ءۇشىن قىرۋار قارجى جۇمسالعانىن ايتتى. كەلىمبەتوۆ تۋرالى ەل اراسىندا وڭدى پىكىر جوعىن ەسكەرىپ، ونىڭ ورنىنا ۇلتتىق بانكتى باسقارۋعا باسقا ادامدى اكەلدى. ۇلتتىق بانكتىڭ قازىرگى ءتوراعاسى اقىشيەۆ تا ۇزاق وتىرمايدى. سايلاۋ وتكەن سوڭ تەڭگەنى مۇلدەم ەركىن دالىزگە جىبەرەدى. مەملەكەتتىك باقىلاۋ الىنادى. دەمەك، تەڭگە كۇن ساناپ قۇلدىراي تۇسەدى. بۇگىنگى باعام بويىنشا ءبىر دوللار 310 تەڭگەنى كورسەتىپ تۇرسا، الدا 500 تەڭگەگە ساۋدالانۋى مۇمكىن. تەك سايلاۋدان كەيىن.

ۇشىنشىدەن، بيلىك بۇدان وزگە دە ساياسي ناۋقانداردى وسى سايلاۋ ارقىلى جۇزەگە اسىرۋى مۇمكىن. ەلدە ەكونوميكالىق قيىنشىلىق بولىپ جاتقانىن قانشا جاسىرعانمەن، ۇكىمەت شاراسىز حالدە تۇر. سىرتقى قارىز كۇن ساناپ كوبەيىپ كەلەدى، حالىقتىڭ ءومىر ءسۇرۋ دەڭگەيى الەمدەگى ەڭ كەدەي ەلدەردەگى جاعدايمەن تەڭەستى. وسىنىڭ بارىنە توزىمدىلىك تانىتپاي، الدەبىر بۇلىك باستالار بولسا، جاڭا بيلىك قۇرامى ساقاداي-ساي ازىرلىكتە بولۋى شارت...

باسقا-باسقا، قازاق تەڭگەسىنە سەنىمسىزدىك كۇن ساناپ كۇشەيىپ كەلەدى. قالتالىلار تۇگەلدەي بانكتەگى دەپوزيتتەرىن، ىشكى اينالىمداعى اقشالارىن دوللارعا ايىرباستاپ ۇلگەرگەن. ءتىپتى، كۇندەلىكتى ساۋدادان تۇسكەن قارجىلارىن ءىرى كومپانيالار كۇن سايىن دوللار ساتىپ الىپ، دوللار كۇيىنشە ساقتاۋدى ادەتكە اينالدىرعان. ءبىز مۇنداي تەندەنسيانى تەڭگە تراگەدياسى دەپ اتاماسقا شاراسىزبىز. بيلىك بۇل تەندەنسيامەن كۇرەسۋگە، تەڭگەگە سەنىمدىلىك ۇيالاتۋعا قاۋقارسىز. دوللار ساۋداسىن ىرىققا كوندىرۋگە شامالارى جەتپەيدى. ويتكەنى، قارا حالىقتىڭ ءوزى قولىنداعى ازىن-اۋلاق تيىن-تەبەنىن دوللارمەن ساقتاۋعا ۇمتىلادى.

سونىمەن، جۋىرداعى بىرنەشە اپتانىڭ كولەمىندە سايلاۋ تۋرالى ادەمى ۇران ەستىسەڭىز، تاڭعالماڭىز.