وندا ەڭ الدىمەن 2017 جىلدىڭ قاڭتار-شىلدە ايلارىندا اتقارىلعان جۇمىستار بويىنشا 15 مينۋتتىق ۆيدەو روليك كورسەتىلىپ، بارلىق دەپۋتاتتارعا وبلىستىڭ الەۋمەتتىك-ەكونوميكالىق دامۋى جايى باياندالعان كىتاپشا ۇلەستىرىلدى.
2017 جىلدىڭ 7 ايىنىڭ قورىتىندىسىمەن وبلىستا ماڭىزدى الەۋمەتتىك-ەكونوميكالىق كورسەتكىشتەردىڭ ءوسىمى ساقتالعان. ماسەلەن، وسى ۋاقىت ىشىندە وبلىستا 439،1 ملرد. تەڭگەنىڭ ونەركاسىپ ءونىمى ءوندىرىلىپ، وتكەن جىلدىڭ سايكەس كەزەڭىمەن سالىستىرعاندا 0،3 پايىزعا وسكەن. ال، ونەركاسىپ سالاسىنداعى وڭدەۋ ونەركاسىبى 301،3 ملرد. تەڭگەنى قۇراپ، 34،6 ملرد. تەڭگەگە ارتقان.
باياندامادا كورسەتىلگەندەي وسى جىلى نەگىزگى كاپيتالعا 229،9 ملرد. تەڭگە ينۆەستيسيا تارتىلىپ، بۇل رەسپۋبليكاداعى ۇلەسىنىڭ 5،7 % قۇراعان. وڭىرگە كوپتەپ ينۆەستيسيا تارتۋ ماقساتىندا جىل باسىنان بەرى شەتەل ينۆەستورلارىمەن 40-تان اسا ىسكەرلىك كەزدەسۋلەر ۇيىمداستىرىلدى. ناتيجەسىندە، ءباا – مەديسينالىق بۇيىمدار جانە دارىلىك زاتتار شىعاراتىن زاۋىت سالۋ، رەسەي ەلىمەن – ەۆرو-5 ستاندارتىنا ساي جانار-جاعارماي وندىرەتىن مۇناي وڭدەۋ زاۋىتىن سالۋ، ال جۇڭگو ەلىمەن بىرلەسە بيوەتالون، فوسفور تىڭايتقىشىن شىعاراتىن جانە 200 مۆت كۇن ەلەكتر ستانسياسى قۇرىلىستارىن جۇرگىزۋ ماقساتىندا كەلىسىمدەرگە كەلدى.
رەسپۋبليكا بويىنشا شاعىن جانە ورتا كاسىپكەرلىك سۋبەكتىلەرىنىڭ سانى جاعىنان كوش باستايتىن وڭتۇستىكتە بۇگىندە جۇمىس ىستەپ تۇرعان شوك سۋبەكتىلەرى 177 709 بىرلىككە جەتتى. ال، بۇل سالادا جۇمىسپەن قامتىلعاندار 331 490 ادامدى قۇرادى. ولارمەن 158،3 ملرد. تەڭگەنىڭ ءونىمى وندىرىلگەن.
سونىمەن قاتار، وڭتۇستىكتە وسى جىلى 52 مىڭعا جۋىق جەكە فەرمەرلىك قوجالىقتاردان بىرىكتىرىلگەن 297 كووپەراتيۆ قۇرىلىپ، 539-عا جەتتى. وتكەن جىلعا قاراعاندا 2 ەسە ارتقان كووپەراسيا قۇرۋ جۇمىستارى بويىنشا وڭتۇستىك قازاقستان وبلىسى رەسپۋبليكادا كوش باستاپ وتىر.
سەسسيادا ءوڭىر باسشىسىنىڭ جۇمىسىن وڭ باعالاعان حالىق قالاۋلىلارى اۋدان، قالانىڭ دامۋى جانە تۇرعىنداردىڭ ءال-اۋقاتىن جاقسارتۋ باعىتىندا ۇسىنىستارى مەن وزەكتى ماسەلەلەر بويىنشا سۇراقتارىن قويدى.
جيىندى قورىتىندىلاعان وبلىس اكىمى ج.تۇيمەبايەۆ مەملەكەت باسشىسىنىڭ كورەگەندىك ساياساتىنىڭ ارقاسىندا وبلىستىڭ دامۋى ءۇشىن بارلىق مۇمكىندىكتەر جاسالىنعانىن ايتىپ، ءوڭىردىڭ الەۋمەتتىك-ەكونوميكالىق دامۋ باعىتىنداعى جۇمىستاردى جۇزەگە اسىرۋدا بىرلەسە جۇمىس ىستەۋگە شاقىردى. سونداي-اق، اكىم ايماق حالقىنىڭ تۇرمىس-تىرشىلىگى جاقسارىپ، العا قويعان مىندەتتەر ورىندالىپ جاتقانىن جانە وسى باعىتتاعى جۇمىستار الىدە جالعاسىن تاباتىنىن جەتكىزدى.
وقو اكىمىنىڭ باسپا ءسوز قىزمەتى
