بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ وبلىستىق كاسىپكەرلەر پالاتاسىنىڭ ۇيىتقى بولۋىمەن وتكەن ەركىن فورماتتاعى كاسىپكەرلەر كەزدەسۋىنە قاتىستى. جيىندى وقو كاسىپكەرلەر پالاتاسىنىڭ ديرەكتورى اسقار ابۋباكيروۆ جۇرگىزىپ وتىردى.

جيىنعا وبلىس اكىمىنىڭ ورىنباسارلارى مەن ءوڭىر كاسىپكەرلەرى جانە بانك ديرەكتورلارى، مەملەكەتتىك مەكەمە باسشىلارى، دامۋ ينستيتۋتتارىنىڭ جەتەكشىلەرى مەن  ب ا ق وكىلدەرى  قاتىستى.

كەزدەسۋ بارىسىندا  ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىنان تۋىنداعان ماقسات-مىندەتتەر سارالانىپ، ءوڭىردىڭ دامۋ كونسەپسياسى تالقىلاندى. بيزنەستىڭ وركەندەۋىنە مەملەكەت تاراپىنان جاسالىنىپ وتىرعان قولداۋلار مەن كاسىپكەرلەردى قارجىلاندىرۋ جۇيەسىنىڭ جاڭا تەتىكتەرى ءسوز بولدى.

تۋعان جەردى تۇلەتۋ – ورتاق پارىز ەكەنىن ايتقان وبلىس اكىمى ج.تۇيمەبايەۆ كاسىپكەرلەردى تۋعان جەرگە، ەلگە دەگەن سۇيىسپەنشىلىك پەن جاناشىرلىقتىڭ ۇزدىك ۇلگىسىن كورسەتۋگە شاقىردى.

– بۇگىنگى تاڭدا، مەملەكەت تاراپىنان بيزنەستىڭ وركەندەۋىنە بارلىق قولايلى جاعدايلار جاسالىنىپ وتىر. سونىڭ ناتيجەسىندە تەك سوڭعى 3 جىلدا وبلىسىمىزدا «وڭتۇستىك» ايماقتىق ينۆەستيسيالىق ورتالىعى ارقىلى  جالپى قۇنى 23،4 ملرد. تەڭگەنى قۇرايتىن  5،7 مىڭعا جۋىق جوبا قارجىلاندىرىلدى. بۇل دەگەنىڭىز جاقسى كورسەتكىش. دەسەك تە، الدا اتقارىلاتىن جۇمىستار ءالى دە از ەمەس. بۇل رەتتە مەن بيزنەستىڭ الەۋمەتتىك جاۋاپكەرشىلىگى مەن ءوڭىر ەكونوميكاسىن وركەندەتۋدە جەكە كاسىپكەرلەردىڭ قوسىپ جۇرگەن ۇلەس، ىقپالىنىڭ زور ەكەنىن ايتقىم كەلەدى، – دەدى جانسەيىت قانسەيىت ۇلى.

سونىمەن قاتار، اكىم بيزنەسمەندەرگە ساۋدا ورتالىقتارى مەن سيتي كەشەندەرىن سالۋدى توقتاتىپ، حالىققا قاجەتتى تۇرعىن ءۇي مەن ستۋدەنتتەرگە ارنالعان جاتاقحانا سالۋدى جانە ءوڭىردىڭ ەكونوميكاسىنا سەپتىگىن تيگىزەتىن تۋريستتىك جوبالاردى سالۋ جايىن كوتەرىپ، سول جوبالاردى جۇزەگە اسىرۋعا شاقىردى.

مۇنان بولەك، جيىندا وبلىس اكىمىنىڭ ورىنباسارلارى ءوز سالالالارى بويىنشا مەملەكەتتىك-جەكەشىلىك ارىپتەستىك اياسىندا جۇزەگە اسىرىلۋى ءتيىس جوبالاردى تانىستىرىپ، بۇل باعىتتا مەملەكەتتەن كورسەتىلەتىن قولداۋلاردى ايتىپ ءوتتى.

وندا وبلىس اكىمىنىڭ ءبىرىنشى ورىنباسارى دارحان ساتىبالدى  مەملەكەتتىك-جەكەشىلىك ارىپتەستىك شەڭبەرىندە 35 جوبا سالۋ ۇسىنىلىپ وتىرعانىن اتاپ ءوتتى. ال وبلىس اكىمىنىڭ ورىنباسارى باۋىرجان جامالوۆ تۇركىستان قالاسى مەن سارىاعاش، شاردارا، تولە بي اۋداندارىندا ىسكە اسىرىلاتىن تۋريستتىك جوبالار مەن باسقا دا اۋدانداردا ىسكە اسىرۋعا بولاتىن اۋىل شارۋاشىلىق، وندىرىستىك باعىتتاعى جوبالاردى تانىستىردى.

جۇزگە جۋىق كاسىپكەرلەر باس قوسقان جيىندا ولار بيزنەستىڭ الەۋمەتتىك جاۋاپكەرشىلىگىنەن تۋىندايتىن يدەيالاردىڭ جۇزەگە اسۋىندا جانە بيزنەسكە كەدەرگى بولىپ وتىرعان نەگىزگى وزەكتى ماسەلەلەر تۋرالى پىكىرلەرىمەن ءبولىسىپ، وبلىستىڭ دامۋى بويىنشا ءوز ۇسىنىستارىن جەتكىزدى.

 

وقو اكىمىنىڭ باسپا ءسوز قىزمەتى

 

https://dalanews.kz/27771