مەملەكەت باسشىسىنىڭ مەملەكەتتىك قىزمەتكە كىرۋدە ارتىق كەدەرگىلەردى جويۋ جانە مەملەكەتتىك قىزمەتتەن شىعۋ ءتارتىبىن جەڭىلدەتۋ تۋرالى تاپسىرماسىنا سايكەس اگەنتتىكپەن جاڭا تاسىلدەر ازىرلەنىپ، مەملەكەتتىك قىزمەت تۋرالى زاڭعا قاجەتتى تۇزەتۋلەر ەنگىزىلدى.

بۇل تۋرالى ق ر مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ مەملەكەتتىك ورگاننىڭ 2022 جىلعى جۇمىس قورىتىندىسى بويىنشا كەڭەيتىلگەن القا وتىرىسىندا باياندادى.

بىرىنشىدەن، مەملەكەتتىك گرانتپەن وقۋ ورىندارىن اياقتاعان ۇزدىك تۇلەكتەر اۋدان مەن اۋىلدا تومەنگى لاۋازىمدارعا كونكۋرستىق ىرىكتەۋسىز تىكەلەي تاعايىندالاتىن بولادى.

بۇل بىلىكتى جاستاردى مەملەكەتتىك قىزمەتكە ىنتالاندىرۋعا، جاس مامانداردىڭ اۋدان مەن اۋىلدىق ايماقتارعا ورالۋىنا، سونىمەن قاتار وڭىرلەردەگى كادر تاپشىلىعىن ازايتۋعا سەپتىگىن تيگىزىپ، مەملەكەتتىك قىزمەتكە كىرۋدى جەڭىلدەتەدى.

ەكىنشىدەن، «ب» كورپۋسىنىڭ جوعارى لاۋازىمدارىنا ۋاكىلەتتى ورگاننىڭ كەلىسىمىمەن كونكۋرستىق ىرىكتەۋسىز تىكەلەي تاعايىنداۋ مۇمكىندىگى بەرىلىپ وتىر. بۇل ءبىرىنشى باسشىلاردىڭ ءوز قىزمەتشىلەرى ءۇشىن جاۋاپكەرشىلىگىن ارتتىرادى.

ۇشىنشىدەن، ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ جوعارى ۇلگەرىمىن كورسەتكەن تۇلەكتەرى وقۋدى بىتىرگەننەن كەيىن ءبىر جىل ىشىندە ەلوردانى قوسپاعاندا، جەرگىلىكتى ورگاندارعا جەكەلەگەن لاۋازىمدارعا كونكۋرستىق ىرىكتەۋسىز تاعايىنداۋ قاراستىرىلدى.

تورتىنشىدەن، ەكى توقسان بويى ءتيىمسىز دەپ باعالانعان قىزمەتشىلەردىڭ لاۋازىمى تومەندەتىلەدى، ال تومەنگى بوس لاۋازىم بولماعاندا – قىزمەتتەن شىعارىلادى. بۇل اپپاراتتى ءتيىمسىز مەملەكەتتىك قىزمەتشىلەردەن بوساتۋعا ىقپالىن تيگىزىپ، مەملەكەتتىك قىزمەتتەن شىعۋ ءتارتىبىن جەڭىلدەتەدى.

ق ر ءمقىا باسپا ءسوز قىزمەتى