زاڭگەر اننا چەرنوۆا الەۋمەتتىك جەلىدە دەپۋتات داۋلەت تۇرلىحانوۆتىڭ ۇلىنا قاتىستى ۇكىم قايتا قارالاتىنىن مالىمدەدى. ول ءماجىلىس دەپۋتاتى ءارى تانىمال قازاق بالۋانى داۋلەت تۇرلىحانوۆتىڭ ۇلىنان سوققى جەگەن بولاتىن، - دەپ حابارلايدى Dalanews.kz.
"جوعارعى سوتتا ءماجىلىس دەپۋتاتى داۋلەت تۇرلىحانوۆتىڭ ۇلىنا قاتىستى ءبىزدىڭ ءىس بويىنشا اسكەري سوت ۇكىمى قايتا قارالادى. اسكەري سوتتىڭ ۇكىمىمەن ول بۇزاقىلىق نيەتپەن ەكى ادامنىڭ دەنساۋلىعىنا قاساقانا ورتاشا زيان كەلتىرگەنى ءۇشىن 107-باپتىڭ 2-بولىگى 1)،5) تارماعى بويىنشا 500 اەك كولەمىندە جازا الدى. ۇكىم وتە جەڭىل تۇردە تاعايىندالدى. اسكەري ءبولىمدى تاستاپ كەتكەنى، بەرىلگەن انتتى بۇزعانى، قىلمىس جاسالعان ساتتە ىشىمدىككە ماس بولعانى ءۇشىن قايتالاپ جازالاۋ تۇرىندەگى جازانى اۋىرلاتاتىن ءمان-جايلار ەسەپكە الىنباعان.
...ءبىزدىڭ وقيعامىزدا ادىلدىك ورنايتىنىنا ۇمىتتەنەمىن! ءبارى الەۋمەتتىك جاعدايى مەن مارتەبەسىنە قاراماستان زاڭ مەن سوت الدىندا تەڭ!" - دەدى ول.
ايتا كەتەيىك، الماتىدا اسكەري قىزمەتكەر بەلگىلى ادۆوكاتتى سوققىعا جىققان بولاتىن. بۇل وقيعا بىلتىر 11 اقپانعا قاراعان ءتۇنى الماتىنىڭ ساۋدا ورتالىقتارىنىڭ ءبىرىنىڭ ماڭىنداعى پاركينگتە بولدى. ءىس حالىق تاراپىنان قوعامدىق داۋ تۋدىردى. بۇل وقيعا تۋرالى ادۆوكات ولەگ چەرنوۆتىڭ ايەلى اننا ديميترييەۆيچ Facebook پاراقشاسىندا جازدى.
الماتى پوليسيا دەپارتامەنتى سول كەزدە بۇل دەرەك ق ر قىلمىستىق كودەكسىنىڭ 293-بابى "بۇزاقىلىق" بويىنشا سوتالدى تەرگەۋدىڭ ءبىرىڭعاي تىزىلىمىنە تىركەلگەنىن حابارلادى.
ال كەيىن ادۆوكاتتى سوققىعا جىققان اسكەري قىزمەتكەر گرەك-ريم كۇرەسىنەن قازاقستاندىق جانە بۇرىنعى كەڭەس وداعىنىڭ پالۋانى داۋلەت تۇرلىحانوۆتىڭ ۇلى بولىپ شىقتى. بۇل اقپاراتتى دەپۋتات تۇرلىحانوۆتىڭ ءوزى راستاعان بولاتىن. ول ۇلىنا قاتىستى داۋعا كوزقاراسىن ءبىلدىرىپ، كەشىرىم سۇرادى.
