– بيىل جەرگىلىكتى بيۋدجەت قاراجاتى ەسەبىنەن 3،7 ملرد. تەڭگەگە 34 نىسان سالىنىپ، 1،92 ملرد. تەڭگەگە 10 نىساندا كۇردەلى جوندەۋ جۇمىستارى ءجۇرىپ جاتىر. وبلىس تاريحىندا ءبىرىنشى رەت ءبىر كەزەندە سايرام، ماقتاارال اۋداندارى مەن كەنتاۋ قالاسىندا 4 ءىرى ەمحانانىڭ قۇرىلىسى قاتار جۇرگىزىلۋدە، – دەدى وبلىستىڭ باس دارىگەرى.
مەملەكەتتىك-جەكەشەلىك ارىپتەستىك شەڭبەرىندە دەنساۋلىق ساقتاۋ ينفراقۇرىلىمىن ودان ءارى دامىتۋدى قامتاماسىز ەتۋ ءۇشىن شىمكەنت قالاسىندا «قايتپاس» شاعىناۋدانىندا ءبىر اۋىسىمدا 500 ادام قابىلدايتىن ەمحانا سالىنۋدا. بۇدان باسقا وبلىس ورتالىعىندا تاعى قالالىق 3 ەمحانا سالىنادى. ال وقو اكىمدىگى جاڭا ونكولوگيالىق ديسپانسەرىن سالۋعا جەر تەلىمىن ءبولدى. تۋبەركۋلەزگە قارسى ديسپانسەرىن قالا شەتىنە شىعارۋ ماسەلەسى شەشىلدى. سارىاعاش جانە شىمكەنت قالالارىندا پەريناتالدى ورتالىقتار سالۋعا جەر تەلىمدەرى ءبولىندى.
«وڭىردە مودۋلدىك قۇرامالى مەديسينالىق پۋنكت ساتىپ الۋ جوباسى ىسكە قوسىلدى. مۇنىڭ ەرەكشەلىگى ءبىر پۋنكتتىڭ قۇنى جەرگىلىكتى بيۋدجەت ءۇشىن قۇرىلىس سالۋعا قاراعاندا ەكى ەسە ارزانعا تۇسەدى. بۇرىن مۇنداي قۇرىلىس جۇرگىزۋگە 2 جىلداي ۋاقىت كەتەتىن. ال مودۋلدىك مەدپۋنكتى تولىق ىسكە قوسۋعا نەبارى 2-اق اي ۋاقىت كەتەدى. وبلىس اكىمدىگىنىڭ قولداۋىمەن بيىل وسىنداي 20 پۋنكت ورناتىلادى. 2018 جىلى 67ء-سى پايدالانۋعا بەرىلەدى. وسىلايشا وبلىستىڭ مەديسينالىق پۋنكتتەرگە دەگەن قاجەتتىلىگىن قىسقا مەرزىمدە 100% وتەيتىن بولامىز»، – دەدى م.ەگىزبايەۆ.
جەدەل مەديسينالىق كومەك قىزمەتىن حالىقارالىق ستاندارتتارعا سايكەستەندىرۋ جانە جاڭعىرتۋ ماقساتىندا شىمكەنت قالالىق جەدەل مەديسينالىق جاردەم كورسەتۋ ستانسياسى سەنىمگەرلىك باسقارۋعا شەتەلدىك كومپانياعا بەرىلدى. وعان قوسىمشا 6 بەكەت اشىلدى.
وقو اكىمىنىڭ باسپا ءسوز قىزمەتى
