قالىپتاسقان ۇردىسكە ساي جاڭا وقۋ جىلى قارساڭىندا وتكىزىلگەن كەڭەس جۇمىسىنا وبلىس اكىمى اماندىق باتالوۆ، قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ عىلىم كوميتەتىنىڭ ءتوراعاسى ەركىن سادىقوۆ جانە وبلىستىڭ بارلىق اۋدان-قالاسىنان ءبىلىم بەرۋ سالاسىنىڭ قىزمەتكەرلەرى قاتىستى.
وبلىس اكىمىنىڭ ورىنباسارى جاقسىلىق ومار كونفەرەنسيانى رەسمي تۇردە اشىپ، جۇرگىزىپ وتىردى.
نەگىزگى باياندامانى وقىعان الماتى وبلىستىق ءبىلىم باسقارماسىنىڭ باسشىسى ءلاززات بازارقۇلوۆا،كونفەرەنسياعا قاتىسۋشىلارعا وتكەن وقۋ جىلىنىڭ، ۇبت-نىڭ قورىتىندىسىن بايانداپ، جاڭا وقۋ جىلىندا جۇكتەلەتىن نەگىزگى ماسەلەلەرگە توقتالدى.
ءبىلىم باسقارماسى باسشىسىنىڭ سوزىنە سۇيەنەر بولساق، جاڭا وقۋ جىلىنا قويىلار تالاپتاردىڭ نەگىزگىسى - ءبىلىم دەڭگەيىن كوتەرۋ، پەداگوگيكالىق ۇجىمنىڭ اراسىنداعى ءتارتىپ پەن ۇيىمشىلدىقتى ارتتىرۋ، ءاربىر ۇستاز بەن مەكتەپ اكىمشىلىگىنىڭ جۇمىس ناتيجەلىلىگىنە قويىلار تالاپتى كۇشەيتۋ بولىپ تابىلادى. باياندامادا مەملەكەت باسشىسى مەن ق ر ءبىلىم جانە عىلىم مينيسترلىگىنىڭ جاڭادان ەنگىزگەن تالاپتارىن ۇستازدار قاۋىمىنىڭ بۇلجىتپاي ورىنداۋى قاجەتتىگىجايىندا ايتىلدى. اتاپ ايتقاندا، ءۇش تۇعىرلى ءتىل ساياساتى، «رۋحاني جاڭعىرۋ» باعدارلاماسىن جۇزەگە اسىرۋ، پەداگوگتاردىڭ بىلىكتىلىگىن ارتتىرۋ جانە وزگە دە ماڭىزدى تاپسىرمالار جۇكتەلدى.
وتكەن جىلدىڭ جەتىستىكتەرىنە توقتالعان وبلىستىڭ باس ۇستازى پروبلەمالىق ماسەلەلەرگە دە كوڭىل اۋداردى. ولاردىڭ ىشىندە ۇبت-نىڭ ناتيجەسىكوڭىل كونشىتپەدى. ل.بازارقۇلوۆا وسى ىسكە جاۋاپتى تۇلعالارعا، سونىڭ ىشىندە وبلىستىق ءبىلىم باسقارماسىنا دا كەمشىلىكتەردى الداعى وقۋ جىلىندا قايتالاماۋدىڭ قام-قارەكەتىن ويلاستىرۋعا بۇگىننەن باستاپ كىرىسۋدى تالاپ ەتتى.
كونفەرەنەسيا بارىسىندا ءسوز سويلەگەن قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ عىلىم كوميتەتىنىڭ ءتوراعاسى ەركىن سادىقوۆ، ءبىلىم مەن عىلىمدى دامىتۋدىڭ جاڭا مەملەكەتتىك باعدارلاماسى مەن ءبىلىمدى دامىتۋدىڭ جاڭارتىلعان مازمۇنى تۋرالى تولىقتاي ءتۇسىندىرىپ بەردى.
جارىسسوزگە قاتىسقان ۇستازدار كۇن تارتىبىندە بۇگىنگى كۇننىڭ وزەكتى ماسەلەلەرىنە توقتالدى. ولاردىڭ ىشىندە پەداگوگتاردىڭ باسەكەگە قابىلەتتىلىگى، جاڭاشا ءبىلىم بەرۋ مازمۇنى، پاتريوتتىق تاربيە، دۋالدى وقىتۋ، تەحنيكالىق جانە كاسىبي ءبىلىم بەرۋدە ەڭبەك نارىعىنىڭ سۇرانىسىنا ساي كەلەتىن بىلىكتى كادرلار دايىنداۋ ماسەلەلەرى ايتىلدى.
پەداگوگتاردىڭ تامىز كونفەرەنسياسىن ءوڭىر باسشىسى اماندىق باتالوۆ قورىتىندىلادى.
ۇستازدار قاۋىمىن جاڭا وقۋ جىلىنىڭ باستالۋىمەن قۇتتىقتاپ، جۇمىستارىنا تابىس تىلەي كەلە، جاڭا وقۋ جىلىنا قويىلعان تاپسىرمالاردىڭ باسىم باعىتتارىن ايقىنداپ ءوتتى.
- قۇرمەتتى جيىنعا قاتىسۋشىلار، قۇرمەتتى ۇستازدار! كەلەر وقۋ جىلىندا پەداگوگتارىمىزعا ۇلكەن مىندەتتەر ارتىلادى. ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ۇسىنعان قوعامدىق سانانى جاڭعىرتۋ جوسپارىن ىسكە اسىرۋ بويىنشا وسكەلەڭ ۇرپاقپەن تۇسىندىرمە جۇمىستارىن بىرلەسىپ جۇرگىزۋىمىز قاجەت.
مەملەكەت باسشىسى نۇرسۇلتان ءابىش ۇلى نازاربايەۆتىڭ قولداۋىنىڭ ارقاسىندا ءبىلىم بەرۋدىڭ قازاقستاندىق ۇلگىسى دامۋدىڭ جاڭا ساتىسىنا كوتەرىلۋدە، بەلسەندى تۇردە زاماناۋي ينفراقۇرىلىم قالىپتاسۋدا. سول سەبەپتى، كۇش-جىگەرىمىزدى ءبىر ارناعا بۇرىپ، بارلىق باعىتتار بويىنشا بىرلەسە جۇمىس جاساۋمىز قاجەت. ءبىزدىڭ ماقساتىمىز ورتاق، ول ەلىمىزدىڭ وسكەلەڭ ۇرپاعىنا ساپالى ءبىلىم بەرۋ، ۇلت جاندى، ەلىمىزدىڭ ماقتان تۇتار ازاماتتارىن تاربيەلەپ شىعۋ، - دەدى ا. باتالوۆ.
ءوز ءسوزىن جالعاسىتار كەلە ءوڭىر باسشىسى ءبىلىم سالاسىنىڭ اقساپ تۇرعان كۇن تارتىبىندەگى ماسەلەلەرىنە ەرەكشە كوڭىل ءبولۋ قاجەتتىگىن ەسكەرتتى. سولاردىڭ ىشىندە ۇبت-نىڭ ناتيجەسى، بالالاردى قوسىمشا بىلىممەن قامتۋدىڭ از ۇلەسى، مەكتەپ ديرەكتورلارىنىڭ اتىمەن بايلانىستى ورىن العان كەلەڭسىز وقيعالار، كادرلاردى جۇمىسقا قابىلداۋ كەزىندەگى ءوز ىسىنە جاۋاپسىزدىق ماسەلەلەرى بار. سونداي-اق وبلىس اكىمى تاربيەلەۋ ءىسىنىڭ بوساڭسىپ كەتۋىنىڭ سالدارىنان ۋاقىتىنان ەرتە جۇكتى بولۋ، جاسوسپىرىمدەر اراسىنداعى قىلمىستىڭ ارتۋ دەرەكتەرىنىڭ كوبەيىپ بارا جاتقاندىعىنا دا نازار اۋداردى.
وسى اتالعان ماسەلەلەرگە بايلانىستى اماندىق باتالوۆ اۋدان-قالا اكىمدەرىنە، وبلىستىق ءبىلىم باسقارماسىنىڭ باسشىسىنا جۇمىستارىن قايتا قاراپ، ايتىلعان ءاربىر باعىت بويىنشا ءتيىستى شارا قولدانۋدى جۇكتەدى. سونىمەن قاتار وبلىس اكىمى اۋدان-قالا اكىمدەرىنە فيزيكا ءپانىنىڭ مۇعالىمدەرىن وقۋشىلارىمەن بىرگە «استانا ەكسپو-2017» حالىقارالىق مامانداندىرىلعان كورمەسىنە بارىپ قايتۋىن، ولاردى جاتىن ورىنمەن جانە تاماقتانۋىن قامتاماسىز ەتۋدى تاپسىردى.
ءوڭىر باسشىسى ءۇش تىلدە وقىتۋدى جەتىلدىرۋ، «رۋحاني جاڭعىرۋ» باعدارلاماسىن جۇزەگە اسىرۋ، مەكتەپكە دەيىنگى، تەحنيكالىق جانە كاسىپتىك ءبىلىم بەرۋ ماسەلەسىمەن قاتار اتا-انا قامقورلىعىنسىز قالعان بالالاردى باسپانامەن قامتۋ ماسەلەسى ەرەكشە باقىلاۋدا تۇرعاندىعىن ەسكەرتتى.
وسىدان كەيىن ءوزىنىڭ كاسىبي شەبەرلىگىن شىڭداۋعا ۇلكەن كوڭىل ءبولىپ، ۇستازدىق ەتۋدىڭ جاڭا ادىستەرىن تۇراقتى ەنگىزىپ جۇرگەن بىرنەشە ۇستازداردىڭ ەسىمىن اتاپ، وتكەن جىلدىڭ قورىتىندىسى بويىنشا ۇزدىك دەپ تانىلعان ۇستازداردى مارپاتتاۋ ءراسىمىن وتكىزدى. ولاردىڭ ىشىندە «قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى» جانە «ى.التىنسارين» اتىنداعى توسبەلگىلەرمەن ماراپاتتالعاندارى دا بولدى. سونداي-اق ۇستازدارعا وبلىس اكىمىنىڭ قۇرمەت گراموتالارى مەن العىس حاتتارى بەرىلدى.
ەستەرىڭىزگە سالار بولساق، ءى.جانسۇگىروۆ اتىنداعى مادەنيەت سارايىنىڭ فويەسىندە وبلىستىڭ ءبىلىم بەرۋ مەكەمەلەرىنىڭ اتقارىپ جاتقان جۇمىستارىنىڭ باسىم باعىتتارىن كورسەتەتىن كورمە ۇيىمداستىرىلدى.
اعىمداعى جىلى الماتى وبلىسىنىڭ ءبىلىم بەرۋ سالاسىنىڭ بيۋدجەتى 153،7 ملرد. تەڭگەنى قۇرادى. ونىڭ ىشىندە ءبىلىم بەرۋ نىساندارىنىڭ قۇرىلىسىنا 27 ملرد. تەڭگەدەن استام قاراجات قاراستىرىلعان. وڭىردە 48 ءبىلىم بەرۋ نىسانىنىڭ قۇرىلىسى مەن قالپىنا كەلتىرۋ جۇمىستارى جۇرگىزىلۋدە. جىل سوڭىنا دەيىن 44 مەكتەپتىڭ 35ء-ى پايدالانۋعا بەرىلەدى. ءبىلىم كۇنىندە 24 جاڭا مەكتەپ ءوزىنىڭ العاشقى وقۋشىلارىنا ەسىگىن اشپاق. وسى مەكتەپتەردىڭ 23ء-ى ءۇش اۋىسىمدا وقىتۋ ماسەلەسىن شەشەتىن بولادى. ال 2018 جىلى تاعى 10 مەكتەپ سالۋ ارقىلى ءۇش اۋىسىمدا وقىتۋ ماسەلەسى تولىقتاي شەشىلمەك. سونىمەن قاتار، بيىلعى جىلى 24 مەكتەپتە كۇردەلى جوندەۋ جۇمىستارى جۇرگىزىلگەندىگىن اتاپ وتكەن ءجون.
الماتى وبلىسى اكىمىنىڭ باسپا ءسوز قىزمەتى
