جەتىسۋ وبلىسىندا العىس ايتۋ كۇنىنە وراي «العىس كەرۋەنى» باستالدى. شارا اياسىندا وبلىستىق قازاقستان حالقى اسسامبلەياسىنىڭ قۇرىلىمدىق بولىمشەسىنىڭ ءبىرى «جومارت جان» ورتالىعى مەن ءوڭىردىڭ ىسكەر ايەلدەر كەڭەسى 100 وتباسىعا قايىرىمدىلىق كومەك جاسادى،- دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

جالپى، وڭىردە العىس ايتۋ كۇنىنە وراي ءبىرقاتار ءىس-شارالار ۇيىمداستىرىلدى.

الدىمەن قالىپتاسقان ءداستۇر بويىنشا جۇرتشىلىق قاراتال اۋدانىنىڭ باستوبە اۋىلىندا ورنالاسقان «قازاق حالقىنا مىڭ العىس» مونۋمەنتىنە گۇل شوقتارىن قويۋ راسىمىنە قاتىستى. ءوڭىر باسشىسىنىڭ اتىنان جيىنعا قاتىسۋشىلاردى وبلىس اكىمىنىڭ ورىنباسارى دياس ەسداۋلەتوۆ قۇتتىقتادى.

سول سياقتى مونۋمەنت الدىنداعى جيىندا وبلىستىق كورەي ەتنومادەني بىرلەستىگىنىڭ اقساقالدار كەڭەسىنىڭ ءتوراعاسى ۆيكتور پاك ءسوز الدى.

"سوناۋ 30 جىلدارداعى قاسىرەتتى جىلداردىڭ جاڭعىرىعى جىلدار وتە الىستاعانىمەن، ءالى جادىمىزدا. قازاقستانعا 130 مىڭنان استام كورەي وكىلدەرى قونىس اۋداردى. ازاپ تارتىپ، اشتىق كورىپ، وتانىنان جىراقتاعان ءبىزدىڭ اتا-بابالارىمىزدى قازاق حالقى وزدەرى دە قيىنشىلىق كورىپ وتىرعانىنا قاراماستان قۇشاعىن اشىپ، قولىندا بارىمەن ءبولىستى، باسپانا سالۋعا، تۇرمىسىن تۇزەۋگە كومەكتەستى. دەپورتاسيالانعان حالىق سونىڭ ارقاسىندا بوتەندىك كورگەن جوق، قازاق جەرىن ءوز وتانىنداي قابىلدادى. سوندىقتان 1 ناۋرىز العىس ايتۋ كۇنىندە بارشا قازاق حالقىنا العىس ايتامىن"، - دەدى ول.   

بۇل مەرەكەدە ارداگەرلەر دە نازاردان تىس قالعان جوق. وبلىس اكىمىنىڭ ورىنباسارى دياس ەسداۋلەتوۆ اسسامبلەيانىڭ 20 ارداگەرىن جانە ۇلى وتان سوعىسىنىڭ 3 ارداگەرىن قۇتتىقتاپ، وبلىس باسشىلىعىنىڭ اتىنان ىزگى تىلەگىن ءبىلدىردى.   

وسى كۇنى اسسامبلەيا مۇشەلەرى «ءبىزدىڭ بالالارىمىز» اكسياسىنىڭ اياسىندا جاس انالاردى قۇتتىقتاۋ ءۇشىن وبلىستىق پەريناتالدىق ورتالىققا ارنايى بارىپ، وسى كۇنى ومىرگە كەلگەن نارەستەلەرگە قاجەتتى جيىنتىقتاردى سىيعا تارتتى. قۇرمەتكە يە بولعان ايەل-انالاردىڭ ءبىرى اسەم مالدىبەكوۆا جەتى ۇلدان كەيىن بۇگىن سەگىزىنشى پەرزەنتى – قىز بالانى ومىرگە اكەلدى.

"ۇلكەن ۇلىمىز 11 سىنىپتا وقيدى، ال كىشىمىز 1 جاستا. ەندى، مىنە، وتباسىمىز كىشكەنتاي نارەستەمەن تولىعىپ جاتىر. كۇيەۋىم جۇك كولىگىنىڭ جۇرگىزۋشىسى. قىزىمىزدىڭ ەسىمىن قالاي قويامىز دەپ اقىلداسىپ جاتىرمىز. ءىلتيپات دەگەن ات قويساق پا دەگەن ويىمىز بار. بىزگە بۇگىن سىي-قۇرمەت كورسەتىپ جاتقان بارشا ازاماتتارعا العىس ايتامىن"، - دەيدى ءا. مالدىبەكوۆا.

سونداي-اق بۇگىن وبلىس كولەمىندە بارلىق اۋدان-قالالاردا از قامتىلعان 100 وتباسىنا قايىرىمدىلىق ءىس-شارالارى كورسەتىلدى. 

ەسكە سالساق، قازاقستان حالقى اسسامبلەياسىنىڭ قۇرىلعانىنا 30 جىل تولۋىنا بايلانىستى 70-تەن استام كەشەندى ءىس-شارالار وتكىزۋ جوسپارلانىپ، سول قاتاردا بۇگىن تالدىقورعانداعى دوستىق ۇيىندە ەسكەرتكىش تاقتا ورناتىلدى.