قايىرىمدىلىق قورى «30 كۇندە 30 باسپانا» جوباسىن قولعا العان ەدى. اتالعان قايىرلى ءىستىڭ شاپاعاتىن ەسكەلدى اۋدانى، قارابۇلاق اۋىلىنىڭ تۇرعىندارى كورىپ وتىر.
ەسكەلدىلىك قۋانباي اسىلبەك پەن حوجۋ بارشاگۇل 6 بالانىڭ اتا-اناسى. ولار تاعدىردىڭ تاۋقىمەتىن ءبىر كىسىدەي كورگەن جاندار.«بالامنىڭ تابانىنا كىرگەن شەڭگەل، مەنىڭ ماڭدايىما قادالسىن» دەيتىن اتا-انا ءۇشىن باۋىر ەتى بالاسىنىڭ دەرتپەن الپارىسۋىن كورگەننەن ارتىق ازاپ جوق.
ولاردىڭ ءبىر بالاسى مەديسينا تىلىمەن ايتقاندا «دسپ» ياعني، سەرەبرالدى سال اۋرۋىمەن اۋىرادى. بالاسىنىڭ ەمىنە، نەمەسە پانا بولار كۇركەگە قارجى جينارىن بىلمەي دەل-سال بولعان جانۇياعا اتىمتاي جومارت ازاماتتار كومەك كورسەتتى.
دىمكاس پەرزەنتى بارىن ەسكەرگەن كەڭ جۇرەكتى جاندار ءۇيدى ەمحاناعا جاقىن جەردەن الىپ بەرگەن. قۇتتى شاڭىراقتىڭ كىلتىن ازيانىڭ ەكى دۇركىن چەمپيونى، قازاقستاننىڭ ەڭبەك سىڭىرگەن سپورت شەبەرى نۇرباقىت تەڭىزبايەۆ پەن كيوكۋشينكاي كاراتەدەن تۇڭعىش (2015) جىلعى الەم چەمپيونى مەرەي ءسۇيىنوۆ تابىستاعان.
انار سابىروۆا، الماتى وبلىسى
