2026 جىلعى 2 ناۋرىزدا ءىلياس جانسۇگىروۆ اتىنداعى جەتىسۋ ۋنيۆەرسيتەتىنە يتاليان ءتىلى وقىتۋشىسى الەسساندرو گراسسي جانە «Letteratè» يتاليان ءتىلىن مەڭگەرۋ ورتالىعىنىڭ ديرەكتورى ليۋبوۆ گراسسي رەسمي ىسساپارمەن كەلدى، دەپ حابارلايدى Dalanews.kz.
بۇل ساپار ۋنيۆەرسيتەتتىڭ حالىقارالىق ىنتىماقتاستىعىن كەڭەيتۋ جانە شەتەل تىلدەرىن وقىتۋ ساپاسىن ارتتىرۋ باعىتىنداعى جۇيەلى جۇمىسىنىڭ جالعاسى بولدى.
كەزدەسۋ بارىسىندا ۋنيۆەرسيتەت باسشىلىعىمەن ماركە پوليتەحنيكالىق ۋنيۆەرسيتەتى فيليالى ستۋدەنتتەرى مەن وقىتۋشىلارىنا يتاليان ءتىلىن وقىتۋ ءىسىن جەتىلدىرۋ، وقۋ-ادىستەمەلىك بازانى كۇشەيتۋ، بىرلەسكەن ءبىلىم بەرۋ جوبالارىن جۇزەگە اسىرۋ جانە الداعى ۋاقىتتا اكادەميالىق بايلانىستاردى نىعايتۋ ماسەلەلەرى جان-جاقتى تالقىلاندى. تاراپتار تىلدىك دايىندىقتى حالىقارالىق ستاندارتتارعا سايكەستەندىرۋ، تاجىريبە الماسۋ جانە بولاشاقتا ورتاق باعدارلامالار ۇيىمداستىرۋ مۇمكىندىكتەرىن قاراستىردى.
سونىمەن قاتار، الەسساندرو گراسسي كۋرسقا قاتىسۋشى ستۋدەنتتەر مەن وقىتۋشىلارعا ارناپ ينتەربەلسەندى فورماتتا اشىق ساباق وتكىزدى. ساباق بارىسىندا تىڭداۋشىلار يتاليان ءتىلىنىڭ سويلەۋ مادەنيەتى، دۇرىس دىبىستاۋ، كۇندەلىكتى قارىم-قاتىناستا قولدانىلاتىن تىلدىك قۇرىلىمدار جانە زاماناۋي وقىتۋ ادىستەرىمەن تانىستى. پراكتيكالىق تاپسىرمالار ارقىلى قاتىسۋشىلار تىلدىك داعدىلارىن جەتىلدىرىپ، يتاليان ءتىلىن ناقتى جاعداياتتاردا قولدانۋ تاجىريبەسىن الدى.
ايتا كەتۋ كەرەك، اتالعان يتاليان ءتىلى كۋرسى 2025 جىلعى 12 جەلتوقساندا باستالعان. بۇگىندە كۋرس ونلاين جانە وفلاين فورماتتا جۇرگىزىلىپ، ستۋدەنتتەر مەن وقىتۋشىلاردىڭ تىلدىك قۇزىرەتتىلىگىن ارتتىرۋعا باعىتتالعان. باعدارلاما قاتىسۋشىلارعا شەتەلدىك ارىپتەستەرمەن ەركىن قارىم-قاتىناس ورناتۋعا، اكادەميالىق جانە مادەني بايلانىستاردى دامىتۋعا مۇمكىندىك بەرىپ وتىر.
