جاساندى ينتەللەكت – تەك تەحنولوگيالىق جاڭالىق ەمەس، ول ءبىلىم مەن عىلىم سالاسىنىڭ دامۋىنا سەرپىن بەرەتىن جاڭا باعىت. «AI Sana» باعدارلاماسى ءبىلىم بەرۋ جۇيەسى مەن عىلىم سالاسىن سيفرلىق ترانسفورماسيالاۋ جولىندا ماڭىزدى ءرول اتقارىپ، ەلىمىزدىڭ تەحنولوگيالىق دامۋىنا ۇلەس قوساتىن جاس مامانداردى دايىنداۋعا زور مۇمكىندىك بەرەدى، دەپ حابارلايدى Dalanews.kz.

ءىلياس جانسۇگىروۆ اتىنداعى جەتىسۋ ۋنيۆەرسيتەتىندە ستۋدەنتتەر اراسىندا «AI SANA CONTEST: WE LEARN، CREATE، CHANGE THE FUTURE» اتتى رەسپۋبليكالىق بايقاۋ ۇيىمداستىرىلدى. بايقاۋ ءبىلىم الۋشىلاردىڭ جاساندى ينتەللەكت قۇرالدارىن شىعارماشىلىق جانە تەحنيكالىق تۇرعىدا قولدانۋ داعدىلارىن دامىتۋعا باعىتتالدى.

«بايقاۋدىڭ نەگىزگى ماقساتى – جاساندى ينتەللەكت مۇمكىندىكتەرىن كەڭىنەن ناسيحاتتاۋ، قىسقا بەينەروليكتەر فورماتىنداعى اۆتورلىق جوبالاردى قولداۋ، سونداي-اق ۆيزۋالدى جانە دىبىستىق كونتەنت جاساۋداعى جي الەۋەتىن كورسەتۋ. بايقاۋعا ءوتىنىم قابىلداۋ 2026 جىلعى 18 قاڭتاردا باستالدى. ءبىلىم الۋشىلاردان بارلىعى 62 ءوتىنىم كەلىپ ءتۇستى. جالپى، ستۋدەنتتەردىڭ شىعارماشىلىق جانە تەحنولوگيالىق الەۋەتى جوعارى ەكەنى دودادا ايقىن كورىندى»، – دەيدى بايقاۋ كوميسسياسىنىڭ ءتوراعاسى، سيفرلاندىرۋ جانە ستراتەگيالىق دامۋ جونىندەگى پرورەكتور تيمۋر جۇماعۇلوۆ.

ستۋدەنتتەر كوزىمەن بولاشاقتى ايقىندايتىن بايقاۋ «ۇزدىك ساحنالىق سيۋجەت»، «ۇزدىك ۆيزۋالدى گەنەراسيا»، «ۇزدىك دىبىستىق/مۋزىكالىق كومپوزيسيا» اتتى ءۇش نوميناسيا بويىنشا ءوتتى. تورەلىك ەتكەن قازىلار القاسىنىڭ قۇرامىندا تالدىقورعان جوعارى پوليتەحنيكالىق كوللەدجىنىڭ ديرەكتورى شىڭعىس نۇرعوجايەۆ، سيفرلاندىرۋ جانە تەحنيكالىق قامتاماسىز ەتۋ دەپارتامەنتى ديرەكتورىنىڭ مىندەتىن اتقارۋشى داۋلەت باتىربەكوۆ، جاساندى ينتەللەكت جانە ۆيرتۋالدى شىندىق زەرتحاناسىنىڭ مەڭگەرۋشىسى ءقىدىرالى احمەت، پروسەستەردى سيفرلاندىرۋ جانە اۆتوماتتاندىرۋ ءبولىمىنىڭ باسشىسى مىندەتىن اتقارۋشى جايلاۋ ەراسىل، فيزيكا جانە ماتەماتيكا كافەدراسىنىڭ وقىتۋشى-لەكتورى جالعاس احمەتوۆ، اقپاراتتىق تەحنولوگيالار جانە جاساندى ينتەللەكت كافەدراسىنىڭ وقىتۋشى-لەكتورى اسەل ورازبايەۆا، شىعارماشىلىق ءبىلىم بەرۋ كافەدراسىنىڭ وقىتۋشى-اسسيستەنتى ارسلان باراكوۆ بولدى.

«ۇزدىك ساحنالىق سيۋجەت» نوميناسياسى بويىنشا جۇلدەلى ءى ورىندى ءمۇسىلىم ايمارا، ءىى ورىندى لاۋرا بايباتىروۆا، ءىىى ورىندى تەن ۆيكتوريا يەلەندى.

«ۇزدىك ۆيزۋالدى گەنەراسيا» نوميناسياسى بويىنشا ءى ورىندى امانگەلدى راحات، ءىى ورىندى ەسىمبەك روكسانا، ءىىى ورىندى ەرعالي ءالي جەڭىپ الدى.

«ۇزدىك دىبىستىق (مۋزىكالىق) كومپوزيسيا» نوميناسياسىندا ءى ورىنعا اسەتحان نۇراسىل ءادىل ۇلى، ءىى ورىنعا باقىتجان قىزى ارۋجان، ءىىى ورىنعا ەجەليەۆ ماكسيم يە بولدى.

«قازىرگى ۋاقىتتا الەمدى جاساندى ينتەللەكتسىز ەلەستەتۋ قيىن. ءبىز ChatGPT، DALL·E، Midjourney، Runway جانە ElevenLabs سياقتى نەيروجەلىلەردى پايدالانا وتىرىپ، بولاشاقتا جەتىسۋ وڭىرىندە ءتۋريزمدى قالاي دامىتۋعا بولاتىنىن جانە تۋعان جەرىمىزدىڭ كەلەشەك كەلبەتىن كورسەتتىك»، – دەيدى كونكۋرسقا قاتىسۋشى ايمارا ءمۇسىلىم.

اتالعان بايقاۋ ستۋدەنتتەردىڭ شىعارماشىلىق الەۋەتىن ارتتىرىپ قانا قويماي، جاساندى ينتەللەكت سالاسىنداعى بىلىمدەرى مەن تاجىريبەلەرىن شىڭداۋعا، سونداي-اق بولاشاق سيفرلىق قوعامعا بەيىم مامان قالىپتاستىرۋعا ىقپال ەتەدى، – دەيدى ۇيىمداستىرۋشىلار.