وبلىس اكىمدىگىندە وتكەن قابىلداۋ بارىسىندا قوناقتارعا «قوش كەلدىڭىزدەر» دەگەن اماندىق باتالوۆ ەل تاۋەلسىزدىگىنىڭ 30 جىلدىعى قارساڭىنداعى وبلىس جەتىستىكتەرى، ەكى ءوڭىردىڭ بۇرىننان قالىپتاسقان بايلانىستارى، جامبىل جابايەۆتىڭ مەرەتويىنا ارنالعان شارالار جايلى قىسقاشا بايانداپ بەردى.
– الماتى وبلىسىنا كەلگەن قادامدارىڭىز قۇتتى بولسىن! جامبىل وبلىسىمەن ءبىزدىڭ ءوڭىرارالىق بايلانىسىمىز بۇرىننان قالىپتاسقان. بۇدان بىرنەشە جىل بۇرىن ءبىزدىڭ وبلىس تارازدا مادەني كۇندەرىن وتكىزسە، بۇگىن، مىنە، وزدەرىڭىز ونەر كوشىن جەتىسۋعا اكەلىپ وتىرسىزدار. ەكى وڭىرگە دە ءتان ورتاق قۇندىلىقتار، ورتاق شارالار بار. جامبىل بابامىز ەكى وبلىسقا عانا ەمەس، كۇللى قازاققا ورتاق تۇلعا. بۇعان دەيىن جىر الىبىنىڭ مۋزەيىن جوندەۋدەن وتكىزسەك، مەرەيتوي قارساڭىندا مادەنيەت جانە سپورت مينيسترلىگى بۇل نىساندى قايتا جاڭعىرتۋدى قولعا الدى. جامبىل اۋىلىن، كوشەلەرىن اباتتاندىردىق، مادەنيەت ۇيىنە كۇردەلى جوندەۋ جاساپ جاڭارتتىق. 114 ملن. تەڭگە ءبولىپ، 30 تومدىق كىتابىن شىعاردىق. وسىنىڭ ءبارى وبلىس ەكونوميكاسىنىڭ جاقسارعانىنىڭ ارقاسىندا اتقارىلىپ جاتىر. سونىڭ ناتيجەسىندە الەۋمەتتىك سالاعا كوپ كوڭىل ءبولىنىپ كەلەدى، – دەپ اتاپ وتكەن وبلىس اكىمى اماندىق باتالوۆ ءوڭىردىڭ دامۋى جايلى ءبىرقاتار شارالاردى اڭگىمەلەپ بەردى.
مۇنان سوڭ جامبىل وبلىسى اكىمىنىڭ ورىنباسارى داۋلەت كارىبەك جىلى قابىلداۋ ءۇشىن وبلىس باسشىلىعىنا، جەتىسۋلىقتارعا ريزاشىلىعىن ءبىلدىرىپ، وبلىس اكىمى بەردىبەك ساپاربايەۆتىڭ سالەمىن جەتكىزدى.
– جەتىسۋعا ساپارىمىزدى جامبىل بابامىزعا تاعزىم ەتۋدەن باستادىق. باسىنا بارىپ، دۇعا ەتتىك، مۋزەيىن تاماشالادىق. ەلباسىنىڭ «اتامەكەن» تاريحي-مادەني مۋزەيىن، ءۇشقوڭىرداعى دەنە شىنىقتىرۋ-ساۋىقتىرۋ كەشەنىن كوردىك. اسەرىمىز كەرەمەت. جەتىسۋ وڭىرىنە كەلەگەن دەلەگاسيا قۇرامىندا 150-دەي ادام بار. ۇلى جىبەك جولىنىڭ بويىنداعى تارازدىڭ تاريحىنىڭ ءبىر بولشەگىن كورمە رەتىندە الا كەلدىك. ءان-جىرىمىزدى اكەلدىك. جالپى ەكى ءوڭىردىڭ بىر-بىرىنەن ۇيرەنەتىن، بىر-بىرىمەن تاجىريبە الماساتىن باعىتتارى كوپ. ءبىزدىڭ وڭىردە ءقازىر قانت زاۋىتى سالىنىپ جاتىر. بيىل 6 مىڭ گا جەرگە قانت قىزىلشاسىن ەكتىك. وسىنداي شارۋاشىلىق جاعىنان بولسىن، ونەر الماسۋ جاعىنان بولسىن قوس ءوڭىردىڭ ءوزارا ارىپتەستىك بايلانىسى نىعايا بەرسىن، – دەدى داۋلەت كارىبەك.
قابىلداۋدان كەيىن مادەنيەت كۇنى ب.ريموۆا اتىنداعى دراما تەاترىندا كەنەن ازىربايەۆ اتىنداعى جامبىل وبلىستىق فيلارمونيانىڭ كونسەرتىمەن جالعاستى. كونسەرتتە وبلىس اكىمى كوپشىلىكتىڭ الدىندا دەلەگاسيانى جەتىسۋعا ارنايى جىبەرگەن جامبىل وبلىسىنىڭ اكىمى بەردىبەك ساپاربايەۆقا ىستىق ىقىلاسىن ءبىلدىرىپ، ونەرپازداردىڭ شىعارماشىلىعىنا تابىس تىلەدى.
اتاپ وتسەك، مادەني كۇندەر اياسىندا جامبىلدىقتار ب.ريموۆا اتىنداعى دراما تەاترىندا «تاراز – ۇلى دالانىڭ كونە شاھارى» اتتى جىلجىمالى كورمە ۇيىمداستىردى. كىتاپحانالارى «وتكەنى – ونەگە، بۇگىنى – بەكەم، بولاشاعى – جارقىن جامبىل ءوڭىرى» اتتى جىلجىمالى مادەني شارا وتكىزدى. دەلەگاسيا جامبىل جابايەۆ ەسكەرتكىشىنە گۇل شوقتارىن قويىپ، اقىننىڭ مۋزەيىن ارالادى. مادەني شارالار بۇگىن دە جالعاسىپ، ا.توقپانوۆ اتىنداعى جامبىل وبلىستىق قازاق دراما تەاترى جەتىسۋلىق كورەرمەنگە «جامبىلدىڭ قىزىل جولبارىسى» اتتى قويىلىمىن ۇسىنادى.
