Oblys ákimdiginde ótken qabyldaý barysynda qonaqtarǵa «Qosh keldińizder» degen Amandyq Batalov el táýelsizdiginiń 30 jyldyǵy qarsańyndaǵy oblys jetistikteri, eki óńirdiń burynnan qalyptasqan bailanystary, Jambyl Jabaevtyń meretoiyna arnalǵan sharalar jaily qysqasha baiandap berdi.
– Almaty oblysyna kelgen qadamdaryńyz qutty bolsyn! Jambyl oblysymen bizdiń óńiraralyq bailanysymyz burynnan qalyptasqan. Budan birneshe jyl buryn bizdiń oblys Tarazda mádeni kúnderin ótkizse, búgin, mine, ózderińiz óner kóshin Jetisýǵa ákelip otyrsyzdar. Eki óńirge de tán ortaq qundylyqtar, ortaq sharalar bar. Jambyl babamyz eki oblysqa ǵana emes, kúlli qazaqqa ortaq tulǵa. Buǵan deiin jyr alybynyń mýzeiin jóndeýden ótkizsek, mereitoi qarsańynda Mádeniet jáne sport ministrligi bul nysandy qaita jańǵyrtýdy qolǵa aldy. Jambyl aýylyn, kóshelerin abattandyrdyq, mádeniet úiine kúrdeli jóndeý jasap jańarttyq. 114 mln. teńge bólip, 30 tomdyq kitabyn shyǵardyq. Osynyń bári oblys ekonomikasynyń jaqsarǵanynyń arqasynda atqarylyp jatyr. Sonyń nátijesinde áleýmettik salaǵa kóp kóńil bólinip keledi, – dep atap ótken oblys ákimi Amandyq Batalov óńirdiń damýy jaily birqatar sharalardy áńgimelep berdi.
Munan soń Jambyl oblysy ákiminiń orynbasary Dáýlet Káribek jyly qabyldaý úshin oblys basshylyǵyna, jetisýlyqtarǵa rizashylyǵyn bildirip, oblys ákimi Berdibek Saparbaevtyń sálemin jetkizdi.
– Jetisýǵa saparymyzdy Jambyl babamyzǵa taǵzym etýden bastadyq. Basyna baryp, duǵa ettik, mýzeiin tamashaladyq. Elbasynyń «Atameken» tarihi-mádeni mýzeiin, Úshqońyrdaǵy dene shynyqtyrý-saýyqtyrý keshenin kórdik. Áserimiz keremet. Jetisý óńirine kelegen delegatsiia quramynda 150-dei adam bar. Uly Jibek jolynyń boiyndaǵy Tarazdyń tarihynyń bir bólshegin kórme retinde ala keldik. Án-jyrymyzdy ákeldik. Jalpy eki óńirdiń bir-birinen úirenetin, bir-birimen tájiribe almasatyn baǵyttary kóp. Bizdiń óńirde qazir qant zaýyty salynyp jatyr. Biyl 6 myń ga jerge qant qyzylshasyn ektik. Osyndai sharýashylyq jaǵynan bolsyn, óner almasý jaǵynan bolsyn qos óńirdiń ózara áriptestik bailanysy nyǵaia bersin, – dedi Dáýlet Káribek.
Qabyldaýdan keiin mádeniet kúni B.Rimova atyndaǵy drama teatrynda Kenen Ázirbaev atyndaǵy Jambyl oblystyq filarmoniianyń kontsertimen jalǵasty. Kontsertte oblys ákimi kópshiliktiń aldynda delegatsiiany Jetisýǵa arnaiy jibergen Jambyl oblysynyń ákimi Berdibek Saparbaevqa ystyq yqylasyn bildirip, ónerpazdardyń shyǵarmashylyǵyna tabys tiledi.
Atap ótsek, mádeni kúnder aiasynda jambyldyqtar B.Rimova atyndaǵy drama teatrynda «Taraz – Uly dalanyń kóne shahary» atty jyljymaly kórme uiymdastyrdy. Kitaphanalary «Ótkeni – ónege, búgini – bekem, bolashaǵy – jarqyn Jambyl óńiri» atty jyljymaly mádeni shara ótkizdi. Delegatsiia Jambyl Jabaev eskertkishine gúl shoqtaryn qoiyp, aqynnyń mýzeiin aralady. Mádeni sharalar búgin de jalǵasyp, A.Toqpanov atyndaǵy Jambyl oblystyq qazaq drama teatry jetisýlyq kórermenge «Jambyldyń qyzyl jolbarysy» atty qoiylymyn usynady.
