جەتىسۋ وبلىسىندا جالپى قۇنى 9 ملن تەڭگەدەن اساتىن مال ۇرلىعى اشىلدى،- دەپ حابارلايدى Dalanews.kz
وبلىستىق پوليسيا دەپارتامەنتىنىڭ مالىمەتىنشە، 7 ماۋسىم كۇنى مۇقانشى اۋىلدىق وكرۋگىنىڭ جايىلىمىنان بەلگىسىز بىرەۋلەر 9 باس ءىرى قارانى قولدى ەتكەن. جابىرلەنۋشىگە كەلتىرىلگەن ماتەريالدىق شىعىن كولەمى 2،5 ميلليون تەڭگەنى قۇراعان. الايدا بۇل – ولاردىڭ جالعىز قىلمىسى ەمەس ەكەن. ارادا بىرنەشە كۇن وتكەن سوڭ، سول وڭىردەگى العاباس اۋىلدىق وكرۋگى اۋماعىندا تاعى ءبىر دەرەك تىركەلدى. بۇل جولى قاسكويلەر 14 باس ءىرى قارانى ايداپ اكەتىپ، شارۋاشىلىق يەسىنە 7 ميلليون تەڭگەدەن استام شىعىن كەلتىرگەن.
اتالعان دەرەكتەر بويىنشا كوكسۋ اۋداندىق پوليسيا ءبولىمىنىڭ جانە وبلىستىق كريمينالدىق پوليسيا باسقارماسىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزدى.
"ناتيجەسىندە 51 جانە 37 جاستاعى ەكى كۇدىكتى قولعا ءتۇستى. ەكەۋى دە كوكسۋ اۋدانىنىڭ جەرگىلىكتى تۇرعىندارى بولىپ شىقتى. وپەراسيا بارىسىندا MAN جۇك كولىگى توقتاتىلىپ، كولىك ىشىندە ۇرلانعان مالدىڭ ساتىپ الۋشىسى رەتىندە الماتى وبلىسىنىڭ تۇرعىنى ۇستالدى. تەكسەرۋ كەزىندە جۇك بولىگىنەن جابىرلەنۋشىلەرگە تيەسىلى 14 باس ءىرى قارا مال تابىلىپ، تاركىلەندى"، - دەلىنگەن حابارلامادا.
قازىرگى ۋاقىتتا اتالعان دەرەكتەر بويىنشا قازاقستان رەسپۋبليكاسى قىلمىستىق كودەكسىنىڭ مال ۇرلىعىنا قاتىستى بابى بويىنشا قىلمىستىق ءىس قوزعالدى.
زاڭ بويىنشا مۇنداي قىلمىس ءۇشىن ءۇش جىلدان جەتى جىلعا دەيىنگى مەرزىمگە باس بوستاندىعىنان ايىرۋ جانە مۇلكىن تاركىلەۋ تۇرىندەگى جازا قاراستىرىلعان.
