جەتىسۋ وبلىسىندا تاريحي داتا - كونستيتۋسيانىڭ 30 جىلدىعىنا ارنالعان شارالار ءوڭىردىڭ بارلىق اۋدان-قالالارىن قامتىپ، شامامەن 300-گە جۋىق ءىس-شارا وتكىزىلەدى دەپ مەجەلەنىپ وتىر. سونىڭ ىشىندە تۇرعىن ۇيلەر، جاڭا الەۋمەتتىك جانە ينفراقۇرىلىمدىق نىساندار، بيزنەس ناسىندارى اشىلادى دەپ جوسپارلانعان. سول سياقتى ازاماتتاردىڭ قۇقىقتىق ساۋاتىن ارتتىرۋعا ەرەكشە كوڭىل بولىنەدى،- دەپ حابارلايدى Dalanews.kz
اتاپ ايتقاندا، مەرەيتويلىق داتا اياسىندا كەربۇلاق اۋدانىندا 60 پاتەرلى كوپقاباتتى ءۇيدىڭ، قاراتال اۋدانى ۇشتوبە قالاسىندا 10 تۇرعىن ءۇيدىڭ كىلتتەرى جەرگىلىكتى تۇرعىندارعا تابىستالاتىن بولادى.
سول سياقتى كوكسۋ اۋدانىندا بالاباقشا، بالالار ويىن الاڭى، «جانۇيا» قولداۋ ورتالىعى ىسكە قوسىلسا، الاكول اۋدانى، ءۇشبۇلاق، قىزىلقايىڭ اۋىلدارىندا فەلدشەرلىك-اكۋشەرلىك پۋنكتتەر اشىلادى دەپ كۇتىلۋدە. سونىڭ ىشىندە 30 جىلدىققا 30 ءىس-شارا وتكىزۋدى جوسپارلاپ وتىرعان پانفيلوۆ اۋدانىندا 6 جاڭا مەديسينا نىسانى، 1 جاڭا مەكتەپ، جوندەۋدەن كەيىنگى 2 مەكتەپ، «قورعاس – شىعىس قاقپاسى» ارنايى ەكونوميكالىق ايماعىندا تەمىر وڭدەۋ زاۋىتى، جاركەنت قالاسىندا جۇگەرى كەپتىرۋ سەحى، "سارىوزەك – كوكتال" باعىتىنداعى «قويبىن» كوپىرى قولدانىسقا بەرىلەدى.
جەتىسۋ وبلىسىنىڭ قازاقستان حالقى اسسامبلەياسى دا بۇل مەرەكەلىك شاراعا ءوز ۇلەسىن قوسىپ، ديالوگ الاڭىن قۇرىپ، سەمينار ترەنينگ، مەرەكەلىك جيىن وتكىزبەكشى.
سونداي-اق قۇقىقتىق ساۋاتتىلىقتى ارتتىرۋ باعىتىندا زاڭگەرلەرمەن، دەپۋتاتتارمەن، قوعام بەلسەندىلەرىمەن كەزدەسۋلەر وتكىزىلەدى. ءتۇرلى سپورتتىق جارىستار، مۋزەيلەرگە ەكسكۋرسيالار ۇيىمداستىرىلادى.
اتاپ وتسەك، وڭىردە وتكىزىلەتىن شارالار زاڭدى قاستەرلەۋگە ۇندەۋ، «زاڭ مەن ءتارتىپ» قاعيداتىن ۇستانۋدىڭ ماڭىزىن پاش ەتۋ، ەل دامۋىنىڭ جاڭا كەزەڭىندەگى كونستيتۋسيانىڭ ءرولىن ايشىقتاۋعا باعىتتالىپ وتىر.
