وڭىردەگى اقسۋ جانە كوكسۋ قانت زاۋىتتارىنا بيىل 330 مىڭ توننا قانت قىزىلشاسى وتكىزىلىپ، زاۋىتتار ودان 42 مىڭ توننا قىزىلشا قانتىن وندىرەدى، سول سياقتى قامىس قۇراعىنان 29 مىڭ توننا قانت شىعارادى. وسىلايشا بيىل ايماقتا جالپى كولەمى 71 مىڭ توننا قانت وندىرىلەدى. بۇل تۋرالى بۇگىن استانا قالاسىندا ورتالىق كوممۋنيكاسيالار قىزمەتى الاڭىندا وتكەن بريفينگىدە جەتىسۋ وبلىسىنىڭ اكىمى بەيبىت يسابايەۆ مالىمدەدى، – دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
ونىڭ ايتۋىنشا، قىزىلشانى سۋبسيديالاۋ ءنورماتيۆى تونناسىنا 15 مىڭنان 25 مىڭ تەڭگەگە دەيىن ۇلعايتىلدى. وسى ماقساتقا بيۋدجەتتەن 8،4 ملرد. تەڭگە بولىنگەن. وعان قوسا قىزىلشا شارۋاشىلىقتارىنا ءونىمنىڭ ءار تونناسىنا تاعى 15 مىڭ تەڭگەنى ءونىم قابىلداعان زاۋىت تولەيدى. بۇل قانت قىزىلشاسىنىڭ القابىن 2 ەسە كوبەيتىپ، 8،5 مىڭ گا دەيىن جەتكىزۋگە مۇمكىندىك بەرگەن.
سونىمەن قاتار سپيكەر ەگىستىك القاپتارىن ۇلعايتۋ ءۇشىن سۋ شارۋاشىلىعى نىساندارىن قايتا جاڭعىرتۋدىڭ ماڭىزى زور ەكەنىن اتاپ ءوتتى:
– سۋ شارۋاشىلىعىنىڭ 11 وبەكتىسىنىڭ قۇرىلىسى جۇرگىزىلۋدە. تاعى 16 نىساننىڭ جوبالاۋ-سمەتالىق قۇجاتتاماسى ازىرلەنىپ جاتىر، ونىڭ 7-ەۋى - جاڭا سۋ قويماسى. سونىڭ ناتيجەسىندە الداعى 2-3 جىلدا 48 مىڭ گا جەردى سۋمەن قامتۋ جاقسارتىلىپ، تاعى 20 مىڭ گا جاڭا سۋارمالى جەر اينالىمعا ەنگىزىلەدى، – دەدى سپيكەر.
جەتىسۋ وبلىسى اكىمىنىڭ باسپا ءسوز قىزمەتى
