جەتىسۋ وبلىسىندا اباي قۇنانباي ۇلىنىڭ 180 جىلدىعىنا وراي جاساندى ينتەللەكتىنىڭ كومەگىمەن مۋرال سالىندى. جاڭا ارت-نىسان تەكەلى قالاسىنداعى كوپ قاباتتى تۇرعىن ۇيلەردىڭ ءبىرىنىڭ شىرايىن كىرگىزدى،- دەپ حابارلايدى Dalanews.kz
جوبانىڭ ەرەكشەلىگى سول، جاساندى ينتەللەكت ارقىلى جاسالعان بەينەنى سۋرەتشىلەر ءبىر تاۋلىكتىڭ ىشىندە ءۇيدىڭ قابىرعاسىنا بەينەلەپ شىققان. مۋرالدىڭ سالتاناتتى اشىلۋىندا اباي شىعارمالارىنان كوركەم وقۋلار ۇيىمداستىرىلدى، سول سياقتى ويشىلدىڭ جاستارعا ارنالعان جي كومەگىمەن جاسالعان بەينەۇندەۋى كورسەتىلدى.
جەرگىلىكتى تۇرعىندار بۇل ءىس-شارانىڭ وتە اسەرلى بولعانىنان ايتادى.
– ءبىزدىڭ بۋىن اۋەزوۆتىڭ «اباي جولى» رومانىمەن، ابايدىڭ «قارا سوزدەرىمەن» وستىك. مۋرال جاساۋ يدەياسى ماعان ۇنادى. ويتكەنى زاماناۋي تەحنولوگيالاردى پايدالانۋ ارقىلى جاستار ءوز تاريحىن، اتا-بابامىزدىڭ مۇراسىن، ۇلى تۇلعالاردى ۇمىتپاي، قايتا جاڭعىرتادى. قازىرگى گادجەتتەر مەن جاھاندانۋ داۋىرىندە جاس ۇرپاق ءوز تامىرىنان اجىراپ قالماۋى كەرەك. ءتىپتى مۋرالدىڭ جانىنان ءوتىپ بارا جاتىپ-اق، كوپشىلىكتىڭ اباي كىم بولعانىن بىلگىسى كەلەتىنى ءسوزسىز، – دەيدى تەكەلى قالاسىنىڭ تۇرعىنى گۇلميرا سەرىكحان.
«جەتىسۋ جاستارى» كمم ديرەكتورى شاميل ۆانكەيەۆتىڭ ايتۋىنشا، جىل سوڭىنا دەيىن تالدىقورعان قالاسىندا تاعى ەكى مۋرال سالۋ جوسپارلانىپ وتىر، ونىڭ بىرەۋى شوقان ءۋاليحانوۆتىڭ 190 جىلدىعىنا ارنالسا، ەكىنشىسى «ادال ازامات» جوباسى اياسىندا جۇزەگە اسىرىلادى.
– ۇلى ابايعا ارنالعان مۋرال – بۇل اقىننىڭ رۋحاني مۇراسىنا كورسەتىلگەن قۇرمەت قانا ەمەس، سونىمەن قاتار شابىت كوزى، جاستارعا ۇلگى، ءارى ءوڭىردىڭ مادەني دامۋىنا قوسىلعان ماڭىزدى ۇلەس، – دەپ تۇيىندەدى ش. ۆانكەيەۆ.
