جەتىسۋ وبلىسىنداعى «قازسۋشار» رمك فيليالى جەرگىلىكتى شارۋالارمەن سۋ بەرۋ بويىنشا 7404 كەلىسىمشارت جاساسقان. بۇگىنگى تاڭدا 100 مىڭ گەكتاردان استام ەگىستىك جەر سۋارىلىپ، 527،5 ملن تەكشە مەتر سۋ الىندى، سونداي-اق 17 مىڭ گەكتار القاپتا ىلعالداندىرۋ جۇمىسى جۇرگىزىلدى،- دەپ حابارلايدى Dalanews.kz
ۆەگەتاسيالىق كەزەڭ باستالار الدىندا ديقاندارمەن اۋىسپالى ەگىستى ساقتاۋ، ىلعالدى كوپ قاجەت ەتەتىن داقىلدار كولەمىن قىسقارتۋ، شارۋاشىلىقىشىلىك كانالداردى مەحانيكالىق جولمەن تازالاۋ، سونداي-اق سۋ ۇنەمدەيتىن تەحنولوگيالارعا كەزەڭ-كەزەڭىمەن كوشۋ بويىنشا ءتۇسىندىرۋ جۇمىستارى جۇرگىزىلدى.
شىلدە ايىنىڭ ءبىرىنشى ونكۇندىگىندە جاۋىن-شاشىننىڭ از ءتۇسۋى مەن اۋا رايىنىڭ قولايسىزدىعىنا بايلانىستى فيليال كانالدار ارقىلى سۋدى كەزەكپەن بەرۋ تۋرالى شەشىم قابىلدادى. سونىمەن قاتار قاراتال اۋدانىنىڭ ديقاندارىن سۋمەن قامتاماسىز ەتۋ ءۇشىن كوكسۋ وزەنىنەن قوسىمشا سۋ جەتكىزىلدى.
«بارلىق وندىرىستىك ۋچاسكەدە شارۋالاردىڭ سۇرانىسىنا سايكەس سۋ بەرىلەدى. ۆەگەتاسيا قالىپتى رەجيمدە ءوتىپ جاتىر. تاۋلى مۇزدىقتاردان باستاۋ الاتىن وزەندەردىڭ دەڭگەيى جىل بويى جاۋعان جاۋىن-شاشىن مولشەرىنە جانە اۋا تەمپەراتۋراسىنا بايلانىستى. فيليال ماماندارى سۋارمالى سۋدىڭ ءادىل ءبولىنۋىن تۇراقتى باقىلاۋدا ۇستاپ وتىر. قازىرگى تاڭدا وڭىردە جاعداي تۇراقتى»، – دەدى جەتىسۋ وبلىسىنداعى «قازسۋشار» رمك فيليالىنىڭ ديرەكتورى سايات قۇدايبەرگەنوۆ.
