ماڭعىستاۋ وبلىسىنداعى جەتىباي كەنتىندە TechnoTrading LTD كومپانياسىنىڭ ونداعان جۇمىسشىسى توقسان سايىن بەرىلەتىن سىياقىنى تولەۋدى، جالاقىلارىن كوتەرۋدى، جۇمىسشىلاردى قۋدالاۋدى توقتاتۋدى تالاپ ەتىپ، جۇمىستى توقتاتتى.
Techno Trading LTD كاسىپورنىندا ەلەكتريك بولىپ ىستەيتىن ەرلان كەنجەبەكتىڭ حابارلاۋىنشا، جۇمىسشىلار 1 ماۋسىمنان باستاپ جۇمىسقا شىقپاعان. جۇمىسشىلار جەتىباي جانە قىزىلتوبە اۋىلدارىندا ءتورت سەحتىڭ جۇمىسى توقتاپ تۇرعانىن، ءار سەحتا 50-گە دەيىن جۇمىسشى بارىن ايتادى.
جۇمىسشىلار جالاقىسىن 35 پايىزعا كوبەيتۋدى، توقساندىق سىياقىلارىن بەرۋدى، جۇمىسشىلاردى قۋدالاۋدى توقتاتۋدى تالاپ ەتەدى. ولار سونىمەن قاتار كومپانيادا رادياسيا، سەح ىشىندەگى ءقاۋىپتى جەرلەردىڭ جوندەلمەۋى سياقتى ءقاۋىپتى فاكتورلار ەسكەرىلمەيدى دەيدى.
Techno Trading كومپانياسىنداعى جۇمىسشىلار نارازىلىعى بىلتىردان بەرى جالعاسىپ كەلەدى. بىرنەشە مارتە ميتينگ وتكىزگەن جۇمىسشىلار جۇمىس ورىندارىن قىسقارتپاۋدى، الەۋمەتتىك تولەمدەر مەن توقساندىق سىياقىلارىن تۇراقتى تولەۋدى، جالاقىنى كوبەيتۋدى، نارازىلىق شاراسىنان كەيىنگى قىسىمدى توقتاتۋدى تالاپ ەتكەن.
نارازىلىق اكسياسىنان سوڭ التى جۇمىسشىنى جۇمىستان بوساتقان. ولاردىڭ قايتا جۇمىسقا الۋ جونىندەگى شاعىمىن قاراعان مۇنايلى اۋداندىق سوتى كومپانيا باسشىلىعىنىڭ بۇيرىعىن قۋاتتاپ شەشىم شىعارعان.
ال مەكەمە باسشىلىعى جۋرناليستەرگە تۇسىنىكتەمە بەرۋدەن باس تارتقان.
