كەز-كەلگەن ساتتە دۇنيەنىڭ استاڭ كەستەڭى شىعۋى مۇمكىن. دۇشپانىڭىز دامىلدامايدى ويتكەنى. قاستاندىق جاساۋى مۇمكىن. بۇل جۇزەگە اسپاسا توڭكەرىس ۇيىمداستىرۋ مۇمكىن.
اتىڭىزدى لاستاپ، ابىرويىڭىزدى بىلعاۋى مۇمكىن. ماقساتى ما؟ ماقساتى ءسىزدى تاقتان تايدىرۋ.
"قويشى..." دەرسىز.
"ديكتاتوردىڭ دۇشپانى - دەموكراتيا ەمەس پە؟
دەموكراتيانى تۋ ەتكەندەردى بەسىگىندە تۇنشىقتىرادى ەمەس پە بۇلار؟ ديكتاتۋرالى ەلدە وپپوزيسيا جوق"، – دەپ قارسى ءۋاج ايتۋىڭىزعا دا بولادى.
ول دا راس.
اككى ديكتاتور مۇنىڭ بارىنە ءازىر جۇرەدى انىعىندا. تولقۋعا دا، توڭكەرىسكە دە دايىن مۇنداي ديكتاتورلار.
"دەموكراتيالىق رەفورما جۇرگىزبەدىڭ"، – دەپ قىڭقىلداعان اقش پەن باتىسقا دا قولدانار ايلاسى بار. ايلاسى بولماسا ءومىر بويى تاعىندا تاپجىلماي وتىرماس ەدى، تاعىندا ولمەس ەدى...
اككى ديكتاتور ساياسي وپپوزيسيانى تۇنشىقتىرۋدىڭ سان ءتۇرلى امالىن بىلەدى. تالاي رەت سىننان وتكەرگەن. تاجىريبەلەگەن.
سونىڭ ءبىرى قول استىنداعى قاۋىمدى، حالىقتى تاڭنىڭ اتىسى كۇننىڭ باتىسى قورقىنىشتا ۇستاۋ. ۇنەمى ۇرەيدە ءومىر سۇرەتىن ادام ءسىزدىڭ ساياسي وپپونەنتىڭىزدىڭ قاتارىنا وتۋگە جۇرەگى داۋالامايدى. ساياسي قارسىلاستارىڭىزدىڭ كوزىن قانداي قانىشەرلىكپەن جويعانىڭىزدى كورگەن ول. كورگەن دە تۇسىنگەن...
ولاردىڭ وپپوزيسيا قاتارىنا وتسەم دەگەن وي-قۇلقىن ءسىز، مىنا ءسىز كۇل-تالقان ەتكەنسىز.
جوق، مۇنى ءسىز ويلاپ تاپقان جوقسىز. بۇل ديكتاتۋرانىڭ كلاسسيكالىق ءستيلى.
شىنىمەن سولاي. ديكتاتور ءۇشىن ساياسي قارسىلاسىن جەڭۋدىڭ ءبىر جولى – ونى جەر بەتىنەن جوعالتىپ جىبەرۋ. تىپ-تيپىل. ءىس ءتۇسسىز. زىم زيا قىلۋ...
تۋرا ماعىناسىندا ايتىپ وتىرمىز. لاتىن امەريكاسىنداعى اۆتوريتارلى ەلدەردىڭ باسشىلارى بۇل ءتاسىلدى بەرتىنگە دەيىن پايدالانىپ كەلدى.
"بىرەۋدى جوق قىلۋدى نەمەسە جوعالتىپ جىبەرۋدى" مۇنداعى ديكتاتورلار ۇيرەنشىكتى دۇنيەگە اينالدىرعان.
ءولى-تىرىسى بەلگىسىز. ۇيىنەن شىققان ورالماعان...
1976-81 جىلداردىڭ اراسىندا ارگەنتينانى بيلەپ توستەگەن رافاەل ۆيدەلا (سۋرەتتە) 2012 جىلى ءوزىنىڭ بيلىگى تۇسىندا 7000-8000 ادامدى "جوعالتىپ" جىبەرگەنىن مويىندايدى. وكىنبەيدى ءبىراق.
"جۇيەنى ساقتاپ قالۋدىڭ جالعىز جولى وسى ەدى.
جۇرت كوزىنەن جاسىردىق. ەل دۇرلىكپەۋ ءۇشىن، سىرت كوز كيلىكپەۋ ءۇشىن بۇلاردى جوعالتىپ جىبەرۋىمىزگە (ولتىرۋىمىزگە) تۋرا كەلدى" دەيدى ول.
مۇنىسى بەر جاعى. جوعالعانداردىڭ شيەتتەي بالالارىن ۇرلاپ اكەتىپ بوتەن وتباسىنىڭ باعىپ قاعۋىنا تاپسىرعان الگى ديكتاتور. مۇنداعى ويى ەرتەڭ الگى ۇل ەرجەتكەندە اكەسىنىڭ جولىن، اكەسىنىڭ كەگىن الماسىن دەگەن ماقسات-تۇعىن...
(جالعاسى بار)
دايىنداعان، دۋمان بىقاي
