استانا قالاسىندا مەكتەپ ەسەپشىلەرى بيۋدجەتتىڭ قوماقتى قاراجاتىن جىمقىرعانى ءۇشىن سوتتالدى، دەپ حابارلايدى Dalanews.kz.
ەلوردا پروكۋراتۋراسى تەكسەرۋ قورىتىندىسى بويىنشا مەكتەپتەردىڭ بىرىندە بيۋدجەت قاراجاتىن جىمقىرۋ فاكتىلەرىن انىقتاعان.
– 7 جىل بويى جوق مەكتەپ قىزمەتكەرلەرىنە جالاقى مەن سىياقىلار زاڭسىز اۋدارىلعان. مەملەكەتكە كەلتىرىلگەن شىعىننىڭ جالپى سوماسى 130 ملن تەڭگەدەن استام. تەرگەۋ بارىسىندا مەكتەپ قىزمەتكەرلەرى ءوز كىنالارىن تولىق مويىندادى. سوت ۇكىمىمەن كىنالىلەر 7 جىلعا باس بوستاندىعىنان ايىرۋ جازاسىنا سوتتالدى، – دەلىنگەن حابارلامادا.
مەملەكەت پايداسىنا كەلتىرىلگەن ماتەريالدىق شىعىن سوتتالعانداردان وندىرىلگەن. ۇكىم زاڭدى كۇشىنە ەندى.
