وڭتۇستىك قازاقستان وبلىسىندا زاڭدى جەر قويناۋىن پايدالانۋشىلاردىڭ بيۋدجەتكە تولەگەن سالىقتارى مەن الەۋمەتتىك جارنالارىنا قايتا تالداۋ جۇرگىزىلمەك. وبلىس اكىمدىگىنىڭ كەزەكتى وتىرىسىندا ايماق باسشىسى ج.تۇيمەبايەۆ جاۋاپتى سالا باسشىلارىنا وسىنداي مىندەت قويدى.

وڭىردەگى 175 جەر قويناۋىن پايدالانۋشىلاردىڭ 70ء-نىڭ ءوز ماقساتىندا پايدالانۋ ءۇشىن ءتيىستى قۇجاتتارى جوق ەكەنىن ايتقان اكىم مۇنىمەن قويماي ولار اۋىل شارۋاشىلىعى جەرلەرىن قازىپ جاتىر دەدى.

− كارەر يەلەرى 2015-2016 جىلدارى جەر قويناۋىن پايدالانعانى ءۇشىن بار بولعانى   109 ملن. تەڭگە تولەگەن. بۇل قۇم، تاس تاسىعان اۋىر جۇك كولىكتەرى بۇزعان جولداردىڭ جوندەۋ شىعىنىن وتەمەيدى. ناقتى جەر قويناۋىن پايدالانۋشىلاردىڭ زاڭدى جانە زاڭسىز ىس-ارەكەتتەرىنەن مەملەكەتكە كەلتىرىلگەن شىعىندى تالداۋدى سالا باسشىلارىنا جۇكتەيمىن، − دەدى ايماق باسشىسى.

وبلىستا جەر قويناۋىن پايدالانۋ سالاسىن مەملەكەتتىك رەتتەۋ جۇمىستارىنىڭ بارىسى تۋرالى بايانداعان وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى م.وتارشييەۆ  قولدانىستاعى زاڭناماعا سايكەس، پايدالى قازبالار كومىرسۋتەك شيكىزاتى، قاتتى پايدالى قازبالار جانە كەڭ تارالعان پايدالى قازبالار بولىپ نەگىزگى 3 تۇرگە بولىنەتىنىن ايتتى.

ونىڭ ايتۋىنشا، كەڭ تارالعان پايدالى قازبالاردى بارلاۋ جانە وندىرۋگە ارنالعان 168 كەلىسىمشارت جانە اۆتوموبيل جولدارىنىڭ قۇرىلىسىنا پايدالانۋ ءۇشىن كەڭ تارالعان پايدالى قازبالاردى يگەرۋگە 7 رۇقسات تىركەلگەن. ال، ورتالىق اتقارۋشى ورگان تاراپىنان بەرىلگەن قۇقىقتار نەگىزىندە، قاتتى پايدالى قازبالاردى يگەرۋگە وبلىس اۋماعىندا  27 كەلىسىمشارت  جانە   1 كەلىسىمشارت تابيعي گازدى بارلاۋ بويىنشا تىركەلگەن.

جيىندى قورىتىندىلاعان اكىم وبلىستا زاڭسىز جەر قويناۋىن پايدالانۋدى توقتاتۋ بويىنشا اتقارىلىپ وتىرعان جۇمىستاردى قايتا زەرتتەپ، سارالاپ ناقتى ۇسىنىس ەنگىزۋدى. سونىمەن قاتار، زاڭسىز جەر قويناۋىن پايدالانۋشىلارعا توسقاۋىل قويۋ جانە زاڭدى جەر قويناۋىن پايدالانۋشىلاردىڭ قىزمەتىن رەتتەۋ بويىنشا قۇزىرلى ورگاندارمەن بىرلەسكەن ءىس-شارالار جوسپارىن ازىرلەۋدى جاۋاپتى سالا جەتەكشىلەرىنە جۇكتەدى.



وقو اكىمىنىڭ باسپا ءسوز قىزمەتى