جيىنعا وبلىستىق ءبىلىم بەرۋ ۇيىمىنىڭ باسشىلارى مەن وبلىستىڭ بارلىق 16 اۋدانىنان كەلگەن 800-دەن اسا «ادال ۇرپاق» ەرىكتى مەكتەپ كلۋبتارىنىڭ مۇشەلەرى قاتىستى. شارانىڭ ماقساتى – جالپى ادامگەرشىلىك جانە ۇلتتىق قۇندىلىقتار نەگىزىندە وسكەلەڭ ۇرپاقتىڭ بويىنا سىبايلاس جەمقورلىققا قارسى مادەنيەتتى قالىپتاستىرۋ جانە وعان قارسى تۇرۋعا دايىن تۇلعالاردى تاربيەلەۋ. جيىندا ءسوز سويلەگەن دەپارتامەنت باسشىسى عالىم تۇرسىنبايەۆ:
– ەلدىڭ ەرتەڭى بولاشاق ۇرپاعىمىزدى كىشكەنتايىنان وتانسۇيگىشتىككە، ءبىلىم مەن ەڭبەككە ۇمتىلۋعا، ادالدىققا تاربيەلەۋ پارىزىمىز. بۇل سەزىمدەر ءبىزدىڭ حالقىمىزدا ەجەلدەن بار قاسيەت. سوندىقتان ءاربىر اتا-انا، ءاربىر ۇستاز بالالار ءۇشىن لايىقتى ۇلگى بولۋعا، ناعىز قاستەرلى قاسيەتتەردى تاڭداۋعا كومەكتەسۋى قاجەت، – دەدى.
سونداي-اق، ع.تۇرسىنبايەۆ ءبىلىم باسقارماسىمەن بىرلەسىپ ۇيىمداستىرىپ وتىرعان وبلىستىق سلەتتە بارلىق ۇستازدارعا وقۋشىلاردىڭ بويىنا ادالدىق پەن رۋحاني بايلىقتى دارىتۋدا قوسىپ جۇرگەن ەڭبەكتەرى ءۇشىن العىس ءبىلدىرىپ، بالالارعا ادالدىق پەن مەيىرىمدىلىك جانە جاۋاپكەرشىلىك قاسيەتتەرىن قالىپتاستىرۋدا اتا-انالارى مەن ۇستازدارىنان ءتيىستى ۇلگى الۋ كەرەكتىگىن شاقىردى.
ءىس-شارا بارىسىندا «ادال ۇرپاق» ەرىكتى مەكتەپ كلۋبتارى، ياعني 16 اۋدان وقۋشىلارى اراسىندا شەرۋ، فلەشموب، قولونەرشىلەر كورمەسى، شاحمات ويىنى، سۋرەت سالۋ جانە بەينەروليك كونكۋرسى ءوتىپ، ناتيجەسىمەن جەڭىمپازدار انىقتالىپ، ولارعا سىيلىقتار مەن گرامموتالار تاپسىرىلدى.
تۇركىستان وبلىسى اكىمىنىڭ باسپا ءسوز قىزمەتى
