اقمولا وبلىسىندا سۋمەن جابدىقتاۋ جەلىلەرىن سالۋعا ەلگە قايتارىلعان زاڭسىز يەمدەنىلگەن اكتيۆتەر قاراجاتى ەسەبىنەن 21،5 ملرد تەڭگە ءبولىندى، دەپ حابارلايدى Dalanews.kz.

مەملەكەت باسشىسىنىڭ تاپسىرماسى بويىنشا قازاقستاندا ەلگە قايتارىلعان زاڭسىز يەمدەنىلگەن اكتيۆتەر قاراجاتى ەسەبىنەن الەۋمەتتىك ماڭىزى بار نىسانداردى سالۋ جالعاسۋدا. اقمولا وبلىسىندا سۋمەن جابدىقتاۋ جۇيەسىن سالۋعا ارناۋلى مەملەكەتتىك قوردان 21،5 ملرد تەڭگە ءبولىندى.

بۇگىندە وڭىردە سۋمەن جابدىقتاۋ سالاسىندا 28 جوبا جۇزەگە اسىرىلۋدا. زەرەندى اۋدانىندا جاڭا سۋ قۇبىرى جەلىلەرىن سالۋعا جانە قولدانىستاعى سۋ قۇبىرى جەلىلەرىن جاڭعىرتۋعا 6 ملرد 564 ملن تەڭگە قاراستىرىلعان. جۇمىستار اقادىر، جىلىمدى، قاناي بي، كوكتەرەك، سادوۆوە، ترويسك، ۆاسيلكوۆسكوە، وركەن، وزەن جانە باراتاي اۋىلدارىندا جۇرگىزىلۋدە. 

ولاردىڭ ىشىندەگى ەڭ ءىرىسى – 1 مىڭنان استام ادام تۇراتىن وركەن كەنتىندەگى ۇزىندىعى 6 شاقىرىم سۋمەن جابدىقتاۋ جۇيەسى. جوبانىڭ قۇنى – 583 ملن تەڭگە.

ودان بولەك، وبلىستىڭ 9 اۋدانىندا 2 ملرد 287 ملن تەڭگەدەن استام سوماعا سۋمەن جابدىقتاۋدىڭ جاڭا كوزدەرىن سالۋ جانە قولدانىستاعى جۇيەلەردى رەكونسترۋكسيالاۋ جۇزەگە اسىرىلۋدا. نىسانداردى پايدالانۋعا بەرۋ وسى جىلدىڭ سوڭىنا جوسپارلانۋدا.

ساندىقتاۋ اۋدانىندا توپتىق سۋ قۇبىرى سالىنۋدا. جوبا بويىنشا 22،3 شاقىرىم سۋمەن جابدىقتاۋ جەلىلەرىن سالۋ كوزدەلگەن. ونى جۇزەگە اسىرۋعا ارناۋلى مەملەكەتتىك قوردان 200 ملن تەڭگە ءبولىندى.

سونداي-اق نۇرا توپتىق سۋ قۇبىرىن رەكونسترۋكسيالاۋ جانە پوكروۆسكوە اۋىلىنان تالاپكەر جانە قاجىمۇقان اۋىلدارىنا سۋ قۇبىرىن تارتۋ جۇمىستارى جۇرگىزىلۋدە. ەكى جوبانىڭ جالپى قۇنى – 9،5 ملرد تەڭگە.

قازىرگى ۋاقىتتا اقمولا وبلىسىندا قالالىق ەلدى مەكەندەردە سۋمەن جابدىقتاۋ قىزمەتى 99%-دى، ال اۋىلدىق ەلدى مەكەندەردە 96،6%-دى قۇرايدى.

بۇگىنگى تاڭدا ەلىمىزدە قايتارىلعان اكتيۆتەرگە دەنساۋلىق ساقتاۋ، سپورت، سونداي-اق ينجەنەرلىك جەلىلەر مەن سۋ قۇرىلىستارىن جاڭارتۋ سالالارىنداعى جوبالار جۇزەگە اسىرىلۋدا.