مەكەمەنىڭ حابارلاۋىنشا، تىلەك ماترايموۆ، ونىڭ ۇلى، نەمەرە تۋىستارى جانە جەكە كۇزەتشىلەرىمەن قىرعىز-وزبەك شەكاراسىنداعى وزەننەن ءوتىپ بارا جاتقان جەرىنەن ۇستالعان. كەيبىر باسىلىمداردىڭ جازۋىنشا، اراسىندا دەپۋتات ەسكەندىر ماترايموۆتىڭ ۇلى دا بار.
ءقازىر ولاردى قىرعىز تاراپقا بەرۋ ماسەلەسى قارالىپ جاتىر.
تىلەك ماترايموۆ وش وبلىسىنداعى كارا-سۋۋي اۋدانىن سەگىز جىلدان بەرى باسقارىپ كەلگەن. پارلامەنت سايلاۋى الدىندا ول دەنساۋلىعىنا بايلانىستى دەمالىسقا كەتكەنىن مالىمدەگەن. ول قىرعىزستاننىڭ كەدەن قىزمەتىنىڭ ءتوراعا ورىنباسارى بولعان رايىمبەك ماترايموۆتىڭ تۋعان ءىنىسى.
بيلىككە ىقپالى زور دەپ ەسەپتەلىپ كەلگەن ماترايموۆتار وتباسىنىڭ تاعى ءبىر مۇشەسى - ەسكەندىر "مەكەنيم كىرگىزستان" پارتياسى ءتىزىمى بويىنشا دەپۋتاتتىققا ۇمىتكەر بولعان.
ازاتتىقتىڭ قىرعىز قىزمەتى بۇل كلاننىڭ ەلدەن 700 ميلليون دوللار شىعارعانىن دالەلدەيتىن زەرتتەۋ ماتەريالىن جاريالاعان. بۇل پارتيا وتكەن سايلاۋدا 7 پروسەنتتىك مەجەدەن وتكەن.
5 قازاندا پارلامەنت سايلاۋىنىڭ ناتيجەسى جاريالانعاننان كەيىن قىرعىزستاندا جاپپاي نارازىلىق شاراسى باستالدى. پارلامەنتكە وتپەي قالعان وپپوزيسيالىق پارتيالاردىڭ ليدەرلەرى مەن جاقتاستارى ميتينگكە شىقتى. ولار اكىمشىلىك عيماراتتاردى باسىپ الىپ، تۇرمەدە وتىرعان ءبىرقاتار ساياساتكەرلەردى بوساتتى. 6 قازاندا ورتالىق سايلاك كوميسسياسى سايلاۋ ناتيجەسىنىڭ كۇشىن جويدى.
ءبىرقاتار وپپوزيسيالىق پارتيا وكىلدەرى رايىمبەك ماترايموۆتى جاۋاپقا تارتۋدى تالاپ ەتەدى.
