Shekarany kesip ótken jerinen Tilek Matraimov pen onyń týystary ustaldy dep habarlaidy jergilikti basylym Qyrǵyzstannyń Ulttyq qaýipsizdik memlekettik komitetine silteme jasap.
Mekemeniń habarlaýynsha, Tilek Matraimov, onyń uly, nemere týystary jáne jeke kúzetshilerimen qyrǵyz-ózbek shekarasyndaǵy ózennen ótip bara jatqan jerinen ustalǵan. Keibir basylymdardyń jazýynsha, arasynda depýtat Eskendir Matraimovtyń uly da bar.
Qazir olardy qyrǵyz tarapqa berý máselesi qaralyp jatyr.
Tilek Matraimov Osh oblysyndaǵy Kara-Sýýi aýdanyn segiz jyldan beri basqaryp kelgen. Parlament sailaýy aldynda ol densaýlyǵyna bailanysty demalysqa ketkenin málimdegen. Ol Qyrǵyzstannyń keden qyzmetiniń tóraǵa orynbasary bolǵan Raiymbek Matraimovtyń týǵan inisi.
Bilikke yqpaly zor dep eseptelip kelgen Matraimovtar otbasynyń taǵy bir múshesi - Eskendir "Mekenim Kyrgyzstan" partiiasy tizimi boiynsha depýtattyqqa úmitker bolǵan.
Azattyqtyń qyrǵyz qyzmeti bul klannyń elden 700 million dollar shyǵarǵanyn dáleldeitin zertteý materialyn jariialaǵan. Bul partiia ótken sailaýda 7 protsenttik mejeden ótken.
5 qazanda parlament sailaýynyń nátijesi jariialanǵannan keiin Qyrǵyzstanda jappai narazylyq sharasy bastaldy. Parlamentke ótpei qalǵan oppozitsiialyq partiialardyń liderleri men jaqtastary mitingke shyqty. Olar ákimshilik ǵimarattardy basyp alyp, túrmede otyrǵan birqatar saiasatkerlerdi bosatty. 6 qazanda Ortalyq sailak komissiiasy sailaý nátijesiniń kúshin joidy.
Birqatar oppozitsiialyq partiia ókilderi Raiymbek Matraimovty jaýapqa tartýdy talap etedi.
