الماتىدا بۇرىنعى باس پروكۋرور قايرات قوجامجاروۆتىڭ اتالاس تۋىسى تالعات ماحاتوۆقا تاعى بٸر ايىپ تاعىلدى, دەپ حابارلايدى Dalanews.kz Time.kz پورتالىنا سٸلتەپ.
الماتى قالاسىنداعى №2 بوستاندىق اۋداندىق سوتىنىڭ سۋدياسى رومان سەليتسكيي تالعات ماحاتوۆتىڭ قىلمىستىق ەرەكەتتەرٸن 87 بەتتەن تۇراتىن ٷكٸمگە ەرەڭ سىيعىزدى. ٶزٸن “قر قارجى پوليتسيياسى گەنەرالى قايرات قوجامجاروۆتىڭ ٸنٸسٸمٸن” دەپ تانىستىرعان ماحاتوۆ بٸر كەزدەرٸ ەل الدىندا سىبايلاس جەمقورلىقپەن كٷرەستٸڭ سيمۆولى سانالسا, بٷگٸندە قاتارىنان ٷش اۋىر ٷكٸم بويىنشا جازاسىن ٶتەۋشٸگە اينالدى.
ماحاتوۆ بۇعان دەيٸن:
• “كاراۆانشىلار” ٸسٸ بويىنشا باستى كۋەگەر مەدەت جاماشەۆتى ٶلتٸرگەنٸ ٷشٸن – 20 جىلعا,
• قاندى قاڭتار وقيعاسىنا قاتىسقانى ٷشٸن – 15 جىلعا,
• اسا ٸرٸ الاياقتىق, زاڭسىز قارۋ مەن جارىلعىش زاتتاردى ساقتاۋ, بيلٸك ٶكٸلٸنە كٷش قولدانۋ بويىنشا – 11 جىلعا سوتتالعان ەدٸ.
بارلىق جازا مەرزٸمدەرٸ بٸرٸكتٸرٸلٸپ, سۋديا سەليتسكييدٸڭ ٷكٸمٸمەن ماحاتوۆ جالپى 24 جىلعا باس بوستاندىعىنان ايىرىلدى.
ميلليون دوللارلىق الاياقتىق
2018 جىلى ماحاتوۆ الماتىدا كەسٸپكەر ماقسات اعايداروۆپەن كەزدەسەدٸ. ول بۇعان دەيٸن تارازداعى “وليمپيك” سپورت كەشەنٸن مەملەكەتكە 800 ميلليون تەڭگەگە ساتقان ەدٸ. ماحاتوۆ سول سەتتە قيتۇرقى جوسپار ويلاپ تاۋىپ, كەسٸپكەردٸ سالىق ورگاندارىنان تۋىنداۋى مٷمكٸن مەسەلەلەرمەن قورقىتىپ, ولاردى شەشۋ ٷشٸن سول كەزدەگٸ باس پروكۋرور (ياعني, اعاسى قايرات قوجامجاروۆ) ارقىلى مەسەلەنٸ شەشۋگە ۋەدە بەرەدٸ. باعاسى — 600 مىڭ دوللار.
سەنٸپ قالعان كەسٸپكەر ۇلىمەن بٸرگە اۆتوتۇراقتا ريۋكزاكقا سالىپ بەرگەن دوللاردى قولما-قول بەرەدٸ (سول كەزدەگٸ كۋرس بويىنشا 201 ملن تەڭگەدەن استام). بٸرنەشە كٷننەن كەيٸن ماحاتوۆ تاعى 400 مىڭ دوللار سۇراپ, ولاردى دا يەمدەنٸپ الادى. بارلىعى — 1 ميلليون دوللار.
وسىلايشا الاياقتىق جالعاسا بەرەدٸ…
ماحاتوۆ بٸر ايدان سوڭ قوردايدا كەسٸپكەرمەن قايتا كەزدەسٸپ, جالعان ەڭگٸمە ايتادى.
“باس پروكۋروردىڭ ٸنٸسٸ تەندەر جەڭٸپ الىپتى. بٸراق كەپٸلدٸككە 700 ملن تەڭگە كەرەك. ەگەر كٶمەكتەسسەڭدەر, سەندەرگە 5 ميلليارد تەڭگەنٸڭ قوسالقى كەلٸسٸمشارتىن بەرەم”, — دەيدٸ ول.
نەتيجەسٸندە كەسٸپكەر تاعى دا:
• 900 مىڭ دوللار,
• 720 مىڭ دوللار,
• جەنە كەيٸنٸرەك 214 مىڭ دوللاردى بەرەدٸ.
جالپى, ماحاتوۆ بۇل ازاماتتان 2,9 ميلليون دوللار (1 ميلليارد تەڭگەدەن استام) اقشا العان. اقشانىڭ بٸردە-بٸر تيىنى ايتىلعان ماقساتتارعا جۇمسالماعان.
جالعان اۋدارىمدار مەن حالىقارالىق الاياقتىق
2019 جىلى ماحاتوۆ ناتاليا كوبزەۆا ەسٸمدٸ الاياقپەن تانىسادى. ول جالعان شوت-فاكتۋرالار جاساپ, “قولما قول اقشا شەشۋمەن” اينالىساتىن. ماحاتوۆ قىتايمەن اقشا اۋدارۋ باعىتىن جاقسى بٸلەتٸن. وسى باعىتتا تاعى بٸرنەشە تۇلعالارمەن (كيبيروۆ, شامسۋتدينوۆ, مالتسەۆ) بايلانىس ورناتادى.
ماحاتوۆ ولارعا قىتايعا ٷلكەن كٶلەمدە اقشا اۋدارعانداي بولىپ كٶرٸنەتٸن جالعان بانك قۇجاتتارىن جاساپ بەرەدٸ. مۇنى كوبزەۆا مەن ٷش رەت سوتتالعان جاننا ماسيموۆا دايىندايدى.
نەتيجەسٸندە:
• قىتايعا جالعان قۇجاتپەن 2,9 ملن دوللار,
• جالپى جالعان بانك اۋدارىمدارى بويىنشا 6,3 ملن دوللاردىڭ قۇجاتى جاسالعان.
ماحاتوۆ بۇل قۇجاتتاردى پايدالانىپ, سەرٸكتەستەرٸنەن قولما-قول اقشا تالاپ ەتٸپ, ونى ٷش تٷرلٸ ورىننان الادى:
• پاركينگتە — 650 مىڭ دوللار,
• جانارماي بەكەتٸندە — 1 ملن دوللار,
• كافەدە — قالعان سوما.
بارلىعى – 2,4 ملن دوللار.
كەيٸنٸرەك سەرٸكتەستەرٸ SWIFT قۇجاتتارىنىڭ شىنايى ەمەستٸگٸن بايقاپ, تٷسٸنٸكتەمە تالاپ ەتەدٸ. وسى كەزدە ماسيموۆا ٶزٸن بانك مەنەدجەرٸ رەتٸندە تانىستىرىپ, بەرٸن سەندٸرەدٸ. ماحاتوۆ بولسا جاڭا ٶتٸرٸك ويلاپ تاۋىپ, “Bonatti S.p.A. – قازاقستان فيليالىمەن” داۋ بار ەكەنٸن, سونى شەشۋ ٷشٸن 2 ملن دوللار سۇرايدى. سەرٸكتەستەر تاعى دا سەنٸپ قالىپ, اقشا بەرەدٸ.
جالپى العاندا, تالعات ماحاتوۆ پەن ونىڭ سىبايلاستارى ششيماروۆ پەن كيبيروۆتان 2,86 ملن دوللاردى (970 ملن تەڭگە) زاڭسىز جولمەن يەمدەنگەن.
بۇل — بٷگٸنگٸ كٷنٸ ەل اۋزىندا “باتىر اگەنت”, “جەمقورلىقپەن كٷرەسكەر” رەتٸندە بەلگٸلٸ بولعان ادامنىڭ ناقتى سوت ٷكٸمٸندە دەلەلدەنگەن ٸستەرٸ. كەزٸندە جوعارى لاۋازىم يەلەرٸ مەن ىقپالدى تۇلعالار سەنٸم ارتقان ادامنىڭ قانداي اۋقىمداعى الاياقتىق سحەمالاردى جٷرگٸزٸپ كەلگەنٸ ەندٸ عانا انىق كٶرٸنٸپ وتىر.
