الماتى اكىمى دارحان ساتىبالدى ناۋرىزباي اۋدانىندا جيىن وتكىزىپ، وعان اۋدان اكىمدىك باسشىلىعى، ءتيىستى باسقارما مەن كوممۋنالدىق قىزمەت وكىلدەرى قاتىستى،- دەپ حابارلايدى Dalanews.kz
كەڭەس بارىسىندا ءبىرقاتار ينفراقۇرىلىمدىق جانە الەۋمەتتىك نىساننىڭ، سونىڭ ىشىندە سۋ جانە كارىز جەلىلەرىنىڭ، سونداي-اق مەكتەپ قۇرىلىسىنا قاتىستى تۇيتكىلدى ماسەلەلەر قارالدى. جۇمىس قارقىنىنىڭ باياۋلىعىنا جول بەرمەۋ كەرەكتىگى ەرەكشە اتالدى.
«بۇگىن كوتەرىلگەن بارلىق ماسەلە حاتتاماعا ەنگىزىلىپ، باقىلاۋعا الىنادى. ينجەنەرلىك جەلى، جول مەن اباتتاندىرۋ باستى نازاردا تۇر. سەبەبى بۇل تۇرعىنداردى ءجيى الاڭداتاتىن جايتتار»، – دەدى قالا اكىمى.
شۇعىلا شاعىناۋدانىنداعى ماگيسترالدىق گاز قۇبىرىنىڭ قۇرىلىسىنا باسا نازار اۋدارىلدى. جۇمىس قارقىنى مەن ساپانىڭ تومەندىگى، سونداي-اق، كوممۋنالدىق ماقساتتا قازىلعان جەرلەردىڭ دەر كەزىندە كورىكتەندىرىلمەيتىنى تىلگە تيەك ەتىلدى.
«قالادا مىندەتتەمەسىن ورىندامايتىن، ليسەنزيالىق تالاپتاردى بۇزاتىن مەردىگەرلەر سوت ارقىلى جاۋاپسىز دەپ تانىلىپ، ليسەنزياسىنان ايىرىلۋى كەرەك. ءبىر رەت قاتاڭ ءتارتىپ ورناتىپ، ودان كەيىن بارلىعى جاۋاپكەرشىلىكتى تۇسىنەتىندەي جاساۋ قاجەت. قالاعا جۇمىس ىستەۋگە كەلگەن ءاربىر كومپانيا جۇمىسىن ادال اتقارۋعا مىندەتتى»، – دەدى دارحان ساتىبالدى.
حالىق سانى ءوسىپ جاتقان اۋداندا الەۋمەتتىك نىسانداردى كوبەيتۋ دە ماڭىزدى. جىل سوڭىنا دەيىن «كەلەشەك مەكتەپتەرى» ۇلتتىق جوباسى مەن وزگە دە باعدارلامالار اياسىندا 8 مىڭنان استام وقۋشىعا ارنالعان 6 جاڭا مەكتەپ پەن قوسىمشا عيماراتتار پايدالانۋعا بەرىلەدى.
سول كۇنى اكىم تۇرعىنداردى قابىلداپ، سۋمەن جابدىقتاۋ، جول، قوعامدىق كولىكتىڭ جۇمىسى، اباتتاندىرۋ، باسقارۋشى كومپانيالاردىڭ قىزمەتى جانە قالا قۇرىلىسى نورمالارىنىڭ ساقتالۋى بويىنشا وتىنىشتەردى قارادى. ءاربىر ماسەلە بويىنشا تۇسىندىرمە بەرىلىپ، ناقتى ورىندالۋ مەرزىمى انىقتالدى.
