ءومىر قينىنشىلىقتارىنا شىداي الماعان كوپتەگەن جاستار اجىراسىپ كەتىپ جاتاتىنى جاسىرىن ەمەس. وسىنداي ساتتەردە ولار پسيحولوگيالىق كومەك-قولداۋعا اس قاجەت ەكەنىن ەستەن شىعارماۋىمىز كەرەك.
وسى رەتتە ەلىمىزدەگى ازاماتتىق باستامالاردى قولداۋ ورتالىعىنىڭ وتباسىلىق قۇندىلىقتاردى نىعايتۋدى كوزدەيتىن «زامانداس 21» قوعامدىق قورىنىڭ جوباسىنا بارىنشا قولداۋ كورسەتۋدە.
بۇگىندە جاس وتباسىلارىنداعى قۇندىلىقتى نىعايتۋ ءىسىن بۇل سالادا ۇزاق جىل تاجىريبەسى بار «زامانداس 21» قوعامدىق قورى قولعا العانى قۋانتادى.
– جوبا وتباسىمەن جۇمىس ىستەيتىن مامانداردى (پسيحولوگتار، پەداگوگتار، سۋديالار) ءوزارا ءىس-قيمىل الگوريتمى جانە وتباسىلىق قاتىناستارداعى قاقتىعىستاردى شەشۋدىڭ سىندارلى ءتاسىلى رەتىندە دايىنداۋدى كوزدەيدى. وقىتۋ بارىسىندا ماماندار جاس وتباسىلاردا ورىن الاتىن جانجالدار كەزىندە داۋلى ماسەلەنى شەشۋ ءۇشىن نە ىستەۋ كەرەكتىگىن تۇسىندىرەدى. ءبىز قاقتىعىس تۋىنداعان جاعدايدا ونى رەتتەۋدىڭ جولدارىن تۇسىندىرەمىز. وقىتۋ تاجىريبەلى ماماندار ءۇشىن دە، وتباسىن قۇرۋدى جوسپارلاپ جاتقان نەمەسە وتاۋ قۇرعان جوعارى كۋرس ستۋدەنتتەرى ءۇشىن دە قىزىقتى جانە پايدالى بولادى دەپ ۇمىتتەنەمىز، – دەيدى پسيحولوگ ءارى جوبا ۇيلەستىرۋشىسى ۆارۆارا مارحوۆەس.
پسيحولوگتىڭ پىكىرىنشە، وتباسىنىڭ بۇزىلۋىنا كوبىنە وتباسىلىق قۇندىلىقتاردىڭ سايكەس كەلمەۋى سەبەپ بولادى.
– نەكەنىڭ بۇزىلۋىنا اكەپ سوقتىراتىن سەبەپ كوپ. ولاردىڭ ءبىرى – وتباسىلىق قۇندىلىقتارداعى سايكەسسىزدىكتەر. مىسالى، جۇبايلاردىڭ ءبىرى كوپ بالالى وتباسى قۇرۋدى ارمانداسا، ەكىنشىسى ءبىلىم الۋدى ماقسات ەتەدى. ءوزارا تۇسىنىستىكتىڭ بولماۋى وتباسىنداعى جانجالدارعا اكەلەدى، - دەيدى ماماندار.
ۇيلەستىرۋشى جوبا اياسىندا جوعارى بىلىكتى پسيحولوگ – مامانداردىڭ تەگىن كەڭەس بەرەتىندىگىن اتاپ ءوتتى.
«زامانداس 21» قوعامدىق قورى جۇزەگە اسىرىپ جاتقان جوبا اياسىندا بالالار مەن اتا-انالاردىڭ قاتىسۋىمەن سونداي-اق، كونكۋرستار، سپورتتىق جارىستار سياقتى باسقا دا ءىس-شارالار ۇيىمداستىرىلاتىنىن ايتا كەتۋمىز كەرەك.
