پرەزيدەنت سولتۇستىك قازاقستان وبلىسىنىڭ ەۆاكۋاسيالانعان تۇرعىندارىمەن كەزدەستى، - دەپ حابارلايدى Dalanews.kz.
پرەزيدەنت قاسىم-جومارت توقايەۆ سولتۇستىك قازاقستان وبلىسىنىڭ سۋ باسقان اۋماعىن تىكۇشاقپەن ارالاپ كورگەننەن كەيىن قارعىن سۋ سالدارىنان ەۆاكۋاسيالانعان اۋدانداردىڭ حالقىمەن كەزدەستى.
تۇرعىندارمەن اڭگىمەلەسۋ بارىسىندا قاسىم-جومارت توقايەۆ شىعىنداردى وتەۋ ءۇشىن مەملەكەت بارلىق ءتيىستى شارانى قابىلدايتىنىن ايتتى. قازىرگى ۋاقىتتا سۋ تاسقىنىنان زارداپ شەككەن بارلىق تۇرعىنعا بىررەتتىك كومەك بەرىلىپ جاتىر جانە كوميسسيا مۇلىك شىعىندارىن ەسەپتەگەننەن كەيىن وتەماقى تولەنەدى. تۇرعىن ءۇيى جارامسىز ازاماتتارعا جاڭا باسپانا سالىنادى جانە بارلىق قاجەتتى ينفراقۇرىلىممەن قامتاماسىز ەتىلەدى. سونىمەن قاتار زارداپ شەككەن تۇرعىنداردىڭ نەسيەلەرى مەن زايمدارىن تولەۋ مەرزىمى شەگەرىلەدى.
مەملەكەت باسشىسى ەشبىر ازامات نازاردان تىس قالمايتىنىن اتاپ ءوتتى.
– ءقازىر ءبارىمىز وتە كۇردەلى كەزەڭدى باستان كەشىپ جاتىرمىز. بۇل – جالپىۇلتتىق اپات. دەگەنمەن، ءبىر جاعىنان الىپ قاراساق، وڭ وزگەرىستەر دە انىق بايقالادى. سۋدىڭ بەتى قايتىپ كەلەدى. جاقىن اراداعى 10 كۇندە وتە ءقاۋىپتى بولادى دەپ ويلايمىن. ءبىراق ءبىز ەلىمىز بويىنشا اپات سالدارىن جويۋ شارالارىن قابىلداپ جاتىرمىز. بۇعان دەيىن ايتقانىمداي، ۇكىمەت زارداپ شەككەن ازاماتتاردىڭ بارلىعىنا قولداۋ كورسەتەدى. ءبىز سۋ تاسقىنى سالدارىنان بولعان بارلىق شىعىندى وتەيمىز. ءاربىر ازامات، ءاربىر وتباسى مەملەكەتتىڭ قامقورلىعىندا بولادى. بۇل – مەن ءۇشىن باستى مىندەت، – دەدى قاسىم-جومارت توقايەۆ.
سونىمەن قاتار، مەملەكەت باسشىسى ەلىمىزدىڭ ءبىرقاتار وڭىرىندەگى سۋ تاسقىنىنا بايلانىستى قالىپتاسقان كۇردەلى جاعدايدى ەسكەرە وتىرىپ، سونداي-اق بيۋدجەت قارجىسىن ۇنەمدەۋ ماقساتىندا ۇكىمەتكە، ورتالىق مەملەكەتتىك جانە جەرگىلىكتى اتقارۋشى ورگاندارعا يميدجدىك جانە باسقا دا ءىرى ءىس-شارالاردى وتكىزبەۋ جونىندە تاپسىرما بەردى.
