سالتاناتتى جيىنعا قاتىسقان وڭتۇستىك قازاقستان وبلىسىنىڭ اكىمى ج.تۇيمەبايەۆ، دەنساۋلىق ساقتاۋ سالاسى ماماندارىن كاسىبي مەرەكەلەرىمەن قۇتتىقتاپ، ۇزدىك دارىگەرلەرگە پاتەر مەن اۆتوكولىك كىلتىن تابىستادى.
ايماق باسشىسى پاتەر كىلتىن وبلىستىق كلينيكالىق اۋرۋحاناسىنىڭ جانساقتاۋ ءبولىمىنىڭ مەڭگەرۋشىسى ساي ۆياچەسلاۆقا، ال سۋ جاڭا Lada Granta اۆتوكولىگىنىڭ كىلتىن ورداباسى اۋدانىنىڭ ورتالىق بالالار ءبولىمىنىڭ مەڭگەرۋشىسى ايگەرىم يمانوۆاعا بەردى.
بۇدان بولەك، اكىم دەنساۋلىق سالاسىندا تالماي ەڭبەك ەتكەن دارىگەرلەردى «وبلىسقا سىڭىرگەن ەڭبەگى ءۇشىن» مەدالىمەن جانە وبلىس اكىمىنىڭ قۇرمەت گراموتاسى مەن العىس حاتىمەن ماراپاتتادى.
مەرەكەلىك شارادا سونىمەن قوسا، وزگەدە مەرەكە يەلەرىنە ق ر دەنساۋلىق ساقتاۋ مينيسترلىگىنىڭ «ەڭبەك ارداگەرى» مەدالى، ق ر «دەنساۋلىق ساقتاۋ ءىسىنىڭ ۇزدىگى»، ق ر «دەنساۋلىق ساقتاۋ ىسىنە قوسقان ۇلەسى ءۇشىن»، «كاسىپوداققا سىڭىرگەن ەڭبەگى ءۇشىن» توسبەلگىلەرىمەن ناگرادتالسا، ءبىرقاتار ازاماتتار قازاقستان رەسپۋبليكاسى دەنساۋلىق مينيسترلىگىنىڭ قۇرمەت گراموتاسى مەن العىس حاتىمەن ماراپاتتالدى. وسىلايشا، بۇل كۇنى 100-دەن استام مەديسينا قىزمەتكەرلەرىنىڭ ەڭبەگى ەلەنىپ، قۋانىشقا بولەندى.
سالتاناتتى جيىننىڭ سوڭى مەرەكەلىك كونسەرتتىك باعدارلامامەن جالعاسىن تاپتى.
ايتا كەتەيىك، وڭتۇستىكتە 30 مىڭنان استام ادام دەنساۋلىق سالاسىندا ەڭبەك ەتسە، ونىڭ 7 مىڭنان استامى دارىگەرلەر، ال 23 مىڭى ورتا بۋىندى قىزمەتكەرلەر بولىپ كەلەدى.
ەسكە سالايىق، ەلىمىزدەگى ايماقتار اراسىندا ءبىرىنشى بولىپ وڭتۇستىك قازاقستان وبلىسىنىڭ ورتالىعىندا ترانسپلانتاسيا قولعا الىنعان بولاتىن. دارىگەرلەرىمىز بۇگىنگە 82 بۇيرەك جانە 8 باۋىر الماستىرۋ وتالارىن جاسادى. ال وسى جىلى وبلىسىمىزدا تۇنعىش رەت «قايتىس بولعان دونوردان» اعزا الماستىرۋ جۇرگىزىلىپ، 2 بۇيرەك الماستىرۋ وتاسى ءساتتى جۇزەگە استى.
وقو اكىمىنىڭ باسپا ءسوز قىزمەتى
