جاڭاوزەندە مەكتەپ تۇلەكتەرى جول اپاتىنا ۇشىرادى. قۇزىرلى ورگاندار جاعدايعا پىكىر ءبىلدىردى، دەپ حابارلايدى Dalanews.kz.
جەرگىلىكتى Lada.kz باسىلىمى مالىمەتىنشە، وبلىستىق ءبىلىم باسقارماسى 23 مامىردا جاڭاوزەن قالاسىندا بولعان جول-كولىك وقيعاسىنا قاتىستى الەۋمەتتىك جەلىلەر مەن مەسسەندجەرلەردە تاراعان "جول اپاتىنا مەكتەپ ءبىتىرۋشى تۇلەكتەر سەبەپ بولدى" دەگەن اقپارات شىندىققا سايكەس كەلمەيتىنىن ايتقان.
باسقارما اقپاراتىنا سۇيەنسەك، جاڭاوزەندە بولعان جول اپاتىنا Toyota Hilux، Toyota Land Cruiser 100 جانە Lexus LX 450 ماركالى كولىكتەر قاتىسقان.
پوليسيانىڭ رەسمي اقپاراتىنا سايكەس، Toyota Hilux كولىگىنىڭ جۇرگىزۋشىسى (مەكتەپ تۇلەگى ەمەس) الدا كەلە جاتقان Land Cruiser 100 كولىگىن باسىپ وزۋعا ارەكەت جاساعان ساتتە جول اپاتى بولعان. سوقتىعىس ناتيجەسىندە ءۇشىنشى كولىك Lexus LX 450 زاقىمدانعان، ال ونىڭ ىشىندە مەكتەپ ءبىتىرۋشى تۇلەكتەر وتىرعان.
وقيعا سالدارىنان ەشكىم زارداپ شەكپەگەن.
"جول اپاتىنا مەكتەپ بىتىرۋشىلەر سەبەپكەر بولدى دەگەن اقپارات شىندىققا جاناسپايدى. بۇل وقيعاعا قاتىستى رەسمي ورگانداردىڭ تەكسەرۋ ناتيجەلەرى مەن دەرەكتەرىنە عانا سەنۋدى سۇرايمىز"، – دەلىنگەن ءبىلىم باسقارماسىنىڭ مالىمدەمەسىندە.
