"ازاماتتار جاساعان تاڭداۋدىڭ تۇپكىلىكتى قورىتىندىسىن زاڭعا سايكەس ورتالىق رەفەرەندۋم كوميسسياسى رەسمي تارتىپپەن شىعارادى. ءبىراق ءقازىردىڭ وزىندە قازاقستان حالقى ىنتىماق پەن بىرلىكتىڭ، ءپاتريوتيزمنىڭ، وتان تاعدىرىنا ورتاق جاۋاپكەرشىلىكتىڭ كەرەمەت ۇلگىسىن كورسەتتى دەپ ايتا الامىز. ازاماتتارىمىزدىڭ باسىم بولىگى وركەندەۋ، ادىلەت، زاڭ مەن ءتارتىپ، تابيعاتتى ايالاۋ جانە تازالىق جولىن تاڭدادى. بۇل – وتە جاقسى جول. جاڭا حالىق كونستيتۋسياسى ەلىمىزدى تىڭ جەتىستىكتەر مەن تابىستارعا باستايدى. بۇعان ەشقانداي كۇمان جوق. داۋىس بەرۋشىلەر سانى بويىنشا ەڭ جوعارى رەكوردتىق كورسەتكىش تىركەلدى. مۇنداي جاعداي كوپتەن بەرى بولماپ ەدى. ۋچاسكەگە كەلىپ، ازاماتتىق ۇستانىمىن انىق بىلدىرگەن بارشاعا العىس ايتامىن. وسى ارقىلى كۇللى الەمگە قازاق قوعامىنىڭ ساياسي مادەنيەتى جوعارى ەكەنىن پاش ەتتىك. "بىرلىك بار جەردە تىرلىك بار". بىرلىك بار جەردە وركەندەۋ بار. ەلدىڭ قۋاتى – بىرلىكتە. بىزگە تاتۋلىق پەن دوستىق، سابىرلىق پەن تاباندىلىق، جاسامپازدىق پەن ۇقىپتىلىق، ەڭبەكقورلىق پەن سەنىمدىلىك اۋاداي قاجەت. سوندا عانا وزىق، دامىعان، باسەكەگە قابىلەتتى ەل بولامىز"، – دەدى پرەزيدەنت.

"جاڭا كونستيتۋسيا – تاۋەلسىزدىك پەن ەگەمەندىك تىرەگى. اتا زاڭىمىز – ادام قۇقىعى مەن بوستاندىعىنىڭ مىزعىماس كەپىلى. ءبىز ءبىر ەل بولىپ زاڭ مەن ءتارتىپ ساقتالاتىن، جاۋاپتى جانە جاسامپاز ازاماتتارى بار ادىلەتتى قوعام قۇرۋ جولىندا ماڭىزدى قادام جاسادىق. وسىلايشا، بۇگىن ۇلت تاريحىنىڭ جاڭا پاراعىن اشتىق. الدا اۋقىمدى جۇمىستار كۇتىپ تۇر. ەڭ باستىسى، حالقىمىز تۇبەگەيلى وزگەرىستەردى بارىنشا قولدايدى. ءبىز ورتاق مۇددە جولىندا كۇش بىرىكتىرىپ، كەلەر ۇرپاققا وركەنيەتتى، وزىق قازاقستاندى امانات ەتەمىز. مەن بۇعان كامىل سەنەمىن. وسى رەفەرەندۋم كەزىندە جاستار بەلسەندى تۇردە سايلاۋعا قاتىستى. جاستارىمىزعا مىڭ دا ءبىر راقمەت! جاستارىمىزدىڭ داۋىسى، ءۇنى وتە جاقسى ەستىلدى. ءارقاشان امان بولىڭىزدار! قازاق ەلىنىڭ قاسيەتتى تاۋەلسىزدىگى ماڭگى بولسىن! وتانىمىز – قازاقستان رەسپۋبليكاسى جاساي بەرسىن! جاڭا كونستيتۋسيامىز قۇتتى بولسىن!" – دەدى قاسىم-جومارت توقايەۆ.