2026 جىلعى 11 اقپاندا كوكشەتاۋ قالاسىندا اۋىل پارتياسى باستاماسىمەن جانە پارتيا ءتوراعاسىنىڭ ورىنباسارى قۋانىش سەيتجانوۆتىڭ باسشىلىعىمەن وڭىرلىك فيليال وكىلدەرىنە ارنالعان «جاڭارتىلعان كونستيتۋسيا – تۇراقتى دامۋ نەگىزى» تاقىرىبىندا رەسپۋبليكالىق سەمينار-كەڭەس ءوتتى، دەپ حابارلايدى Dalanews.kz.
ءىس-شارا پارتيانىڭ جاڭا كونستيتۋسيانىڭ جوباسىن قولداۋ جانە ولاردى وڭىرلىك دەڭگەيدە جان-جاقتى ءتۇسىندىرۋ باعىتىنداعى جۇيەلى جۇمىسىنىڭ جالعاسى رەتىندە ۇيىمداستىرىلدى. سەميناردىڭ نەگىزگى ماقساتى – جاڭا اتا زاڭنىڭ مازمۇنى مەن ماڭىزىن كەڭىنەن ناسيحاتتاۋ، مەملەكەتتىك باسقارۋ جۇيەسىن جاڭعىرتۋ ۇدەرىستەرىن تالقىلاۋ جانە قۇقىقتىق مادەنيەتتى نىعايتۋ.
جيىن بارىسىندا قاتىسۋشىلار قازاقستان رەسپۋبليكاسىنىڭ جاڭا كونستيتۋسياسىنداعى نەگىزگى ەرەجەلەردى، ولاردىڭ ەلدىڭ ساياسي جۇيەسىنە ىقپالىن، بيلىك تارماقتارى اراسىنداعى وكىلەتتىكتەر تەڭگەرىمىن جەتىلدىرۋ ماسەلەلەرىن كەڭىنەن تالقىلادى. سونىمەن قاتار، جەرگىلىكتى وكىلدى ورگانداردىڭ قۇزىرەتىن كەڭەيتۋ، وڭىرلەردىڭ دەربەستىگىن ارتتىرۋ جانە قوعامدىق باقىلاۋ تەتىكتەرىن كۇشەيتۋ باعىتتارى ءسوز بولدى.
سەميناردا كونستيتۋسيالىق رەفورمانى وڭىرلەردە ىسكە اسىرۋدىڭ پراكتيكالىق قىرلارىنا ەرەكشە نازار اۋدارىلدى. وڭىرلىك وكىلدەر ءاقپاراتتىق-تۇسىندىرۋ جۇمىستارىنىڭ ءتيىمدى تاسىلدەرىمەن ءبولىسىپ، ازاماتتاردىڭ قۇقىقتىق ساۋاتتىلىعىن ارتتىرۋ جانە قوعامدىق بەلسەندىلىكتى كۇشەيتۋ ماسەلەلەرىن تالقىلادى.
ءىس-شارا اياسىندا «زاڭ مەن ءتارتىپ» جانە «ادال ازامات» تۇجىرىمدامالارى قۇقىقتىق مەملەكەتتى قالىپتاستىرۋدىڭ قۇندىلىقتىق نەگىزى رەتىندە قاراستىرىلدى. قاتىسۋشىلار زاڭ ۇستەمدىگىن نىعايتۋ، قوعامدىق جاۋاپكەرشىلىكتى ارتتىرۋ جانە مەملەكەت پەن قوعام اراسىنداعى سەنىمدى كۇشەيتۋ ماسەلەلەرىنە باسىمدىق بەردى.
سەمينار-كەڭەس قورىتىندىسى بويىنشا پارتيا وكىلدەرى جاڭا كونستيتۋسيا ءماتىنىن قولدادى.
