بۇل تۋرالى سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ وكىلدەرىنە سىلتەمە جاساپkaz.tengrinews.kz حابارلادى.
«بۇعان دەيىن ۇستالعان تۇڭعىشباي جامانقۇلوۆ ءوز قورعاۋشىسىنىڭ كوزىنشە «فەنيكس» ءفيلمىنىڭ وندىرىسىنە بولىنگەن بيۋدجەت قاراجاتىن جىمقىرعانىن تولىقتاي مويىندادى، ءوز ىسىنە وكىندى جانە شىعىندى وتەپ بەرۋگە ۋادە ەتتى. جامانقۇلوۆ قاراجاتتىڭ قولما-قول اقشاعا اينالدىرىلعان دەرەگىن راستادى جانە بيۋدجەت قاراجاتىنىڭ جەكە ماقساتتارعا جۇمسالعانىن ايتتى»، — دەلىنگەن باسپا ءسوز حابارلاماسىندا.
جامانقۇلوۆ وزىنە قاتىستى بۇلتارتپاۋ شاراسىن كەپىلاقىمەن بوساتۋعا اۋىستىرۋعا جانە ق ر قىلمىستىق كودەكسىنىڭ 65-بابىنا سايكەس، قىلمىستىق جاۋاپكەرشىلىكتەن بوساتۋدى سۇراپ، ءوتىنىش ءبىلدىردى.
قىلمىستىق جاۋاپكەرشىلىكتەن بوساتۋ تۋرالى ءوتىنىش ت. جامانقۇلوۆتىڭ، ن.يۋدينانىڭ جانە گ.ىسقاقوۆانىڭ شىعىندى تولىقتاي وتەگەنىنەن كەيىن قاراستىرىلادى.
«3 قاراشادا تۇڭعىشباي جامانقۇلوۆ شىعىندى ءىشىنارا وتەدى جانە تانىمالدىعى، جاسى جانە كەپىل مۇلىك قالدىرۋىنا بايلانىستى، «كەپىلاقىمەن بوساتۋ» بۇلتارتپاۋ شاراسى تاڭدالدى»، — دەدى ۆەدومستۆوداعىلار.
ايتا كەتەيىك، مۇنىڭ الدىندا مادەنيەت جانە سپورت ءمينيسترى ارىستانبەك مۇحامەدي ۇلى تۇڭعىشباي جامانقۇلوۆتىڭ ۇستالۋىنا قاتىستى پىكىر بىلدىرگەن بولاتىن. ءمينيستردىڭ ايتۋىنشا، تۇڭعىشباي جامانقۇلوۆ كەشىرىم سۇراۋ ءۇشىن ارنايى استاناعا كەلگەن. «ءبىر اپتا بۇرىن ول ارنايى كەلىپ، كەشىرىم سۇرادى. ىسىنە وكىنەتىنىن ايتتى. ارينە، بۇل ماسەلە وڭاي ەمەس. ۇزاق ويلاندىم. مەن وعان كومەك كورسەتۋگە دايىنمىن (…). كەپىل بەرۋگە دە دايىنمىن»، — دەدى مادەنيەت جانە سپورت ءمينيسترى ارىستانبەك مۇحامەدي ۇلى.
ەسكە سالايىق، وسىعان دەيىن قازاقستاندىق اكتەردىڭ ۇستالعانى حابارلانعان ەدى. سىبايلاس جەمقورلىققا قارسى ءىس-قيمىل ۇلتتىق بيۋروسى «فەنيكس» كوركەمفيلمىنىڭ تۇسىرىلىمدەرىنە بولىنگەن قاراجاتتىڭ جىمقىرىلعانىن انىقتاعان بولاتىن.
